2 Tsaynö nimaptinmi Tayta Diospa Espïritun noqaman yaykamur ichïtsimarqan. Nirkurmi Tayta Dios parlapämar 3 nimarqan: “Runapa tsurin, Israel runakunamanmi kachashayki willakuynïta willakunaykipä. Tsay runakuna mana wiyakuq karmi conträ rikakuyashqa. Unay castankuna conträ kayanqannömi paykunapis conträ rikakuyashqa. 4 Tsay mana tantiyakuq rumi shonqu runakunamanmi qamta kachaykä noqa Tayta Dios imata nikanqätapis willanaykipä. 5 Willaptikipis pasaypa mana wiyakuq karmi wiyayäshunkitsu. Tsaynö karpis profëta kanqaykita musyayanqami.

6 “Runapa tsurin, paykunata ama mantsaytsu. Kashakuna rurinchönö karpis, alacrankuna täyanqanchönö karpis paykuna niyanqanta ama mantsaytsu. Nanaq ñawinpa rikapäyäshuptikipis ama mantsaytsu. Tsay runakunaqa mana wiyakuqmi kayan. 7 Wiyakuyänan o mana wiyakuyänan kaptinpis noqa ninqäta willakuy. Paykunaqa mana wiyakuqmi kayan.

8 “Runapa tsurin, nikanqäta shumaq wiyamay. Ama paykunanö mana wiyakuq kaytsu. Kanan aptaykätsinqäta mikunaykipä shimikita kichay”.

9 Tsaymi rikarqä röllun aptashqa maki noqa kaqläpa makyaraykämuqta. 10 Tsay rölluta kichaskiptinmi rikarqä ishkanläpa qellqashqa kaykaqta.^† Tsaychömi qellqaraykarqan wanupakuy cantu, waqay cantu y mantsariy cantukunalla.