Tsakishqa tullukuna kawariyämunqan
37
Juk junaqmi atska tullukuna jitaraykanqan pampaman Tayta Diospa Espïritun apamarqan. 2 Tsayman chaykatsimar entëru kuchunpa puritsimaptinmi atska tullukunata pampacho jitaraykaqta rikarqä. Tsay tullukuna pasaypa yuraqashqami kayarqan. 3 Tsaymi nimarqan: “Runapa tsurin, ¿kay tullukuna kawariyämunqatsurä?”Nimaptinmi nirqä: “Tayta Dios, tsaytaqa qamllami musyanki”.
4 Tsaymi nimarqan: “Tsay tullukunata willar niy: ‘Yuraqashqa tullukuna, Tayta Dios ninqanta wiyayay. 5 Tayta Diosmi nishunki: Jamanikikunata qamkunaman kutitsimuptïmi kawariyämunki. 6 Anku aytsaykikunata yuritsimurmi aytsaykitapis juntatsishä. Nirkurmi qaraykikunata yurirkatsir jamanikikunata kutitsipaptï kawayämunki. Tsayrämi Tayta Dios kanqäta musyayanki’ ”.
7 Tsaymi Tayta Dios nimanqannölla willakurqä. Willakuykaptï bunrururrä maqakuptinmi patsa kuyur qallaykurqan. Tsaymi tullukuna cuerpunkunaman llapan kutiyarqan. 8 Rikaraykaptïmi tullukuna jananpa anku aytsankuna yurir aytsankuna juntaptin qaranpis tsapaskirqan. Jamaninmi itsanqa karqanrätsu.
9 Tsaymi Tayta Dios nimarqan: “Runapa tsurin, jamanin shamunanpä jutïcho qayakur niy: ‘Tayta Diosmi nin: Kawatsikuq jamaykuna, chuskunläpita shamur kay wanushqa jitaraykaqkuna kawariyänanpä yaykuyay’ ”.
10 Tayta Dios nimanqannölla willakuykaptïmi jamaninkuna yaykuskiptin kawarimur ichirkuyarqan.† Yupaytapis mana atipaypä soldädukunanörämi kayarqan.
11 Yapaymi Tayta Dios nimarqan: “Runapa tsurin, kay tullukunanömi Israel runakuna kaykäyan. Paykunami nikäyan: ‘Tsakishqa tullunö kaykarqa tsaynöllanachi imaypis kakushun. Tsaynö karmi ima ruraytapis kamäpakuntsiknatsu. Chipyaq ushakashqanönami kaykantsik’.
12 “Tsaynö niyaptinpis Israel runakunata niy: ‘Tayta Diosmi nin: Kuyanqä runakuna, juklä nación panteoncho yuraqashqa tullunö kayaptikipis qamkunata jipimurmi Israel nacionman kutitsiyäshayki. Ayata kawatsimuqnömi alli kawayänaykipä yanapayäshayki. 13 Tsaynö ruraptïmi Tayta Dios kanqäta musyayanki.
14 “ ‘Wanushqanö kayaptikipis Espïritüta qamkunaman churar kawatsimurmi markaykikunaman kutitsiyämushayki. Tsaymi musyayanki Tayta Dios kar ninqäta rasunpaypa cumplinqäta’. Tayta Diosmi tsaynö nin”.
Judáta y Israelta jukllaylla kananpä ninqan
15 Tayta Diosmi yapay nimarqan: 16 “Runapa tsurin, juk qeruman qellqay ‘Judápita kaq Israel runakuna’ nir. Juk qerumanna qellqay ‘Efraínpita kaq Israel runakuna’ nir. 17 Nirkur jukllayllana kayänanpä ishkanta tsoqpay. Tsaynöpami ishkan jukllayllanöllana kayanqa.
18 “Imapä tsayta ruranqaykitapis tapuyäshuptiki 19 ninki: ‘Tayta Diosmi nin: Efraínpita y Judápita Israel runakunatami jukllatsashä. Tsaynöpami ishkanpis makïchöna kayanqa’.
20 “Tsay qellqanqayki qerukunata Israel runakuna rikayänanpä ishkanta tsoqparkur aptaranki. 21 Tsaypitana ninki: ‘Tayta Diosmi nin: May nacioncho kayaptinpis Israel runakunata jipimurmi kikinkunapa nacionninman pushashä. 22 Juk nacionllana kayänanpämi paykunata Israelcho jukllatsashä. Paykunapa mandaqnin reypis jukllayllanami kanqa. Mananami imaypis ishkay nacionman rakikäyanqanatsu. 23 Melananqä ïdulukunatapis manami adorayanqanatsu ni jutsatapis manami rurayanqanatsu. Conträ shärishqa kayaptinpis perdonarmi salvashä. Paykunami kuyanqä runakuna kayanqa y noqanami paykunapa Diosnin kashä.
24 “ ‘Sirvimaqnï Davidmi mandaqnin rey kanqa. Payllami mitsiqnin kanqa.† Tsaymi ninqäkunata cäsukayämar leynïkunata y yachatsinqäkunatapis cumpliyanqa. 25 Sirvimaqnï Jacob y paykunapa unay castankuna täyanqan nacionchömi täyanqa. Tsurinkunapis y paykunapita aywaraqkunapis tsaychömi imayyaqpis täyanqa. Sirvimaqnï Davidmi imayyaqpis paykunapa mandaqnin rey kanqa.
26 “ ‘Paykunawanmi añaw kawayänanpä pactuta rurashä. Tsay pactu ruranqäqa manami imaypis ushakanqatsu. Atskaman mirayänanpämi kamakätsishä. Imaypis paykunawan kanäpämi templütapis paykuna kayanqancho ruratsishä. 27 Tsaynöpami paykunawan täshä. Noqami Diosnin kashä. Paykunanami kuyanqä runakuna kayanqa.† 28 Templü paykunacho imayyaqpis kaptinmi maytsay nación runakuna musyayanqa Israel runakunata kuyaq Tayta Dios kanqäta. Paykunatami akrashqä santu kayänanpä’ ”.