3 “ ‘Tsaymi Tayta Dios kar nï: Rasunpaypami wakpita kaypita contraykikuna shamur pasaypa ushakätsiyäshushqayki. Tsaynöpami jäpa runakuna duëñu tukuyäshushqayki. Imaykata ashlliyäshurnikimi penqakuyman churayäshushqayki.

4 “ ‘Noqa Tayta Diosmi nï: Israelcho jirkakuna, jirkankuna, mayukuna y raqrakunapis, nikanqäta wiyayämay. Rasunpaypami Israelcho kaykaq markakuna pipis mana tanqan raqällana kaykäyan. Tsaynöllami juk nación runakuna Israel runakunata vincirnin imaykantapis apakuyashqa. Tsaymi ñöpaykicho nacionkunapis kushipäyäshushqayki. 5 Tsaynö kaykaptinpis noqa Tayta Diosmi pasaypa ajanar tsay nacionkunapa contran y Edom nación runakunapa contran kaykä. Tsay runakuna pasaypa kushikurnin y penqakuyman churarninmi kuyanqä nacionnïta duëñu tukuyashqa’ ”.

6 Nirkurmi mastapis Ezequielta Tayta Dios nirqan: “Israelcho jirkakunata, jirkankunata, raqrakunata y pampakunata noqapa jutïcho willar niy: ‘Tayta Diosmi nin: Juklä nación runakuna Israel runakunata manakaqta tumpayanqanpitami pasaypa rabyanashqa kaykä. 7 Tsaymi makïta joqarkur jurar nï: Tsay nación runakunatapis chikiqninkunami penqakuyman churar ashlliyanqa.

8 “ ‘Israel jirkakuna, Israel runakuna kutiyämunanpänami kaykäyan. Qamkunachöqa jatusaq llimllasapa jachakunami wiñayanqa. Tsay jachakunapa wayuynintami Israel runakuna kutimur mikuyanqa. 9 Qamkunaman bendicionnïta churamuptïmi murukur kawayanqa. 10 Tsaymi llapan Israel nacioncho runakuna atskaman mirayanqa. Tsunyaqpä ushakätsishqa markakunachöpis yapaymi täyanqa. Juchutsishqa markakunatapis yapaymi shäritsiyanqa. 11 Runakunapis y uywakunapis mirarmi unay kayanqannö yapaypis atska kayanqa. Ñöpata kawayanqanpitapis mas allimi kawayanqa. Tsayrämi Tayta Dios kanqäta musyayanqa.

12 “ ‘Israel jirkakuna, qamkuna kayanqayki kaqpa kuyanqä Israel runakuna yapaymi puriyanqa. Paykunapa herencianmi kayanki. Wamrankunatapis manami yapay wanutsiyankinatsu’.

13 “Tayta Diosmi nin: ‘Juklä nación runakunami penqakuyman churayäshurniki niyan: “Israel jirkakunaqa runa mikuq y wamrakunata ushakätsiqmi kayan”.

14 “ ‘Tsaynö niyaptinpis kananpitaqa mananami imaypis runakunata ushakätsiyankinatsu ni wamrankunatapis wanutsiyankinatsu. 15 Jäpa nación runakuna ashlliyäshunaykita manami kachapäshänatsu. Tsaynöpis mananami wamrakunata mikuyankinatsu’. Tayta Diosmi tsaynö nin”.

16 Tayta Diosmi nimarqan: 17 “Runapa tsurin, Israel runakuna jutsata rurarmi täyanqan nacionninta impüruyätsiyashqa. Warmipa killa qeshyan impüru kanqannömi paykuna rurayanqanpis pasaypa impüru kaykan. 18 Runakunata wanutsir y ïdulukunatapis adorarninmi nacionninta impüruyätsiyashqa. Tsaynö rurayanqanpitami pasaypa rabyanar paykunata castigarqä. 19 Tsaymi paykunata qarqur juklä nación markakunamanpis mashtakätsirqä. Jutsata rurayanqanman tupumi paykunata castigarqä.

20 “Qarquptï maymanpis chäyanqan markakunachömi runakuna niyaq: ‘Kay runakuna adorayanqan Diosqa kuyanqan runakunata manami tsapayta kamäpakushqatsu. Tsaymi nacionninpita qarqushqa kaykäyan’. Tsaynö nirmi santu jutïta manakaqman churayarqan. 21 Israel runakuna maymanpis chäyanqancho santu jutïta manakaqman churayaptinmi pasaypa llakikü.

22 “Tsaynö kayanqanpita Israel runakunata niy: ‘Tayta Diosmi nin: Israel runakuna, jutsata rurayanqaykipitami maytsay nacionchöpis runakuna manakaqman churayäman. Tsaynö kaykaptinpis manami qamkuna raykuqtsu tsay nacionkunapita qoriyämushayki, tsaypa trokinqa santu jutï raykuqmi jipiyämushayki. 23 Jutïta manakaqman churayänanpä qamkunami jutsayuq kayashqayki. Qamkunata jipimurnami tsay nación runakunata musyatsishä jutï santu kanqanta. Munayyuq Tayta Dios kanqäta musyayänanpämi llapan runakuna rikaykäyäshuptiki jipimushayki’. Tayta Diosmi tsaynö nin.

24 “ ‘Tsay nacionkunapita noqami jipimushayki. Jäpa markakunapita qorimurmi kikikikunapa nacionnikikunaman qorimushayki. 25 Chuya yakuwanmi mayllayäshayki. Qanraykikunatapis chipyaqmi awishayki. Ïdulukunata adorar impüru rikakuyanqaykipitapis mayllayäshaykimi.

26 “ ‘Nirkurmi mushuq shonquta y mushuq espïrituta qoyäshayki. Mana cäsukuq rumi shonquykikunatapis cäsukuq alli shonqumanmi tikratsishä. 27 Yanapayäshunaykipämi Espïritüta qamkunaman churamushä. Tsaynöpami leynïkunata y yachatsinqäkunata cumplir kawayanki.^† 28 Unay castaykikunata rikatsinqä nacionchömi täyanki. Qamkunami kuyanqä runakuna kayanki. Noqanami qamkunapa Diosnikikuna kashä.^†

29 “ ‘Jutsata mana rurayänaykipämi yanapayäshayki. Trïguta pasaypa wayutsimuptïmi muchuypis ni mallaqaypis kanqanatsu. 30 Tsaynöllami früta wayuq tukuyläya jachakunata y chakrakunacho mikuykunatapis alli wayutsishä. Tsaymi imaypis mallaqäyankinatsu ni juklä nación runakunapis penqakuyman churayäshunkinatsu. 31 Tsayrämi mana allita rurayanqaykipita y melanaypä jutsata rurayanqaykipita penqakuyanki.

32 “ ‘Tayta Diosmi nin: Israel runakuna, shumaq tantiyakuyay. Manami qamkuna raykuqtsu juklä nacionkunapita qorimushayki, sinöqa santu jutï raykuqmi. Qamkunaqa jutsaykikunapita pasaypa penqakur umpuräkuyay.

33 “ ‘Tayta Diosmi nin: Jutsaykikunata mayllaskirmi kutitsiyämushayki. Tsaychömi juchutsishqa markaykikunata shäritsir yapay täyanki. 34 Purunyashqa chakrata yapay murupakuyaptinmi pïmay päsaqkunapis rikar 35 kushishqa niyanqa: “Kay chakrakunaqa purunyashqami karqan. Kananqa Edén^† huertanö kuyayllapämi kaykan. Chipyaq ushakashqa, tsunyaq y raqällana markakunapis kananqa jinchi murallashqa runa tänan markanami kaykan”.

36 “ ‘Tsaynöpami ñöpan nacionkunacho kawaykar quëdaq runakuna musyayanqa chipyaq ushakashqa kaykaptinpis noqa Tayta Dios yapay shäritsinqäta. Tsaynöllami musyayanqa qachpa chakrakunatapis yapay alli chakramanna tikratsinqäta. Noqa Tayta Diosmi tsaynö nï. Ninqätaqa cumplishämi.

37 “ ‘Tayta Diosmi nin: Israel runakuna rugakayämanqanta cäsurmi üshanörä atskaman mirayänanpä kamakätsishä. 38 Fiesta kaptin Jerusaléncho sacrificiupä atska üshakuna unay kayanqannömi tsay markakunacho atska runakuna täyanqa. Israel nacioncho juchutsishqa markakunachöpis atska runakunami täyanqa. Tsayrämi Tayta Dios kanqäta musyayanqa’ ”.