Edom nacionta ushakätsiyänanpä ninqan
35
Tayta Diosmi nimarqan: 2 “Runapa tsurin, Seir† jirkapa tikraskir edomita runakunata ima päsananpä kaqtapis willakuy. 3 Willakur niy:“ ‘Tayta Diosmi nin:
Edomita runakuna, contraykimi rikakushqä.
Qamkunata castigarmi markaykikunatapis tsunyaykaq raqällatana jaqirishä.
4 Chipyaq ushakätsiptïmi markaykikuna tsunyaq rikakunqa.
Tsayrämi Tayta Dios kanqäta musyayanki.
5 “ ‘Qamkunaqa imaypis Israel runakunapa contranmi kayashqayki.
Tsaymi juk nación runakuna atacayaptinpis yanapayänaykipa trokin wanutsishqa kayänanpä entregayashqayki.
6 Paykunata entregayanqaykinömi qamkunatapis wanutsiyäshunaykipä entregashayki.
Noqa Tayta Diosmi tsaynö kananpä jurä.
7 “ ‘Edom nacionnikita pasaypa tsunyaqtami jaqiykushä.
Nacionnikipita yarquq kaqta y kutimuq kaqtapis wanutsishämi.
8 Maytsaychöpis espädawan wanutsiyäshunaykipämi kamakätsishä.
Tsaymi jirkakunacho, jirkankunacho, mayukunacho y mayu kuchun pampakunachöpis ayakunallana jitaräyanqa.
9 Imayyaqpis tsunyaqlla kananpämi kamakätsishä.
Markaykikunatapis chipyaq ushakashqatami jaqiykushä.
Tsayrämi Tayta Dios kanqäta musyayanki.
10 “ ‘Qamkunami niyashqayki Judá naciontawan Israel nacionta duëñu tukuyänaykipä kanqanta.
Tsaynö niyashqayki tsay nacionkunacho taq runakunata kikï yanapaykaptïmi.
11 Tsaymi jurar nï:
Israel runakunata ajapäyanqaykiman tupu, chikiyanqaykiman tupu y contran shäriyanqaykiman tupumi noqapis qamkunata ushakätsiyäshayki.
Tsaynöpami Israel runakunapis musyayanqa qamkunata castiganqäta.
12 “ ‘Israel runakunata castigaptïmi kushipar niyashqayki:
“Allirächi Israel nación pasaypa tsunyaq rikakush.
Tsay jananman noqantsikpis chipyaq ushakätsishun”.
Tsaynö niyanqaykipitami kikikikunata ushakätsiyäshayki.
Tsayrämi musyayanki noqa Tayta Dios llapan niyanqaykita musyanqäta.
13 Qamkunaqa noqapa conträ parlarmi imaykatapis shimikikunaman chanqanta parlayashqayki.
Alläpa runa tukur tsaynö parlayanqaykitami wiyashqä.
14 “ ‘Tayta Diosmi nin:
Edom nacionnikita ushakätsiptï maytsay nación runakunami kushikuyanqa.
15 Israel nacionta ushakätsiyaptin kushipäyanqaykinömi noqapis ushakätsiyäshuptiki kushipäyäshayki.
Edom nacionniki chipyaqmi ushakanqa.
Tsayrämi Tayta Dios kanqäta musyayanki’.