Israel nacioncho autoridäkunata qayapanqan
34
Tayta Diosmi nimarqan: 2 “Runapa tsurin, Israel runakunapa autoridäninkunapa contran willakur† niy: ‘Tayta Diosmi nin: Qamkunaqa kikikikunallapä yarpachakurmi üshäkunataa shumaq rikaykäyankitsu. Üsha mitsiq runakunaqa ¿manaku üshankunata shumaq rikayanman? 3 Üshakunapa lichinta upuykarpis, millwanpita latsapaykikunata jatikuykarpis y weran kaqta mikuykarpis manami shumaqtsu rikaykäyanki. 4 Uyutaqkunatapis manami kachiykätsiyankitsu ni qeshyaykaqkunatapis manami jampiykäyankitsu. Chakin pakishqakunatapis manami watapaykäyankitsu. Jukpa üshanman takukaptinpis manami qoriyämunkitsu ni oqrakaptinpis manami ashiyankitsu. Tsaypa trokinqa maqa maqarkurmi munayanqaykita ruratsiyanki.5 “ ‘Mitsiqniynaq kar üshäkuna wakpa kaypa mashtakaptinmi† jirka uywakuna mikur ushayan. 6 Maytsay jirkakunapa y raqrakunapami oqrakashqa puriyan. Maytsaypa mashtakäyaptinpis manami pipis ashintsu ni watukantsu’.
7 “Autoridäkuna, Tayta Dios ninqanta shumaq wiyayay. 8 Tayta Diosmi jurar nin: ‘Üsha mitsiq üshankunata shumaq rikanqannö mana rikayaptikimi suwakunapis üshäkunata apakuyan y tukuy niraq jirka uywakunapis mikukuyan. Üsha mitsiqnïkuna kaykarpis oqrakaq üshäkunata manami ashiykäyankitsu. Tsaypa trokinqa kikillaykikunapä yarpachakurmi paykunata shumaq rikaykäyankitsu’.
9 “Üsha mitsiqkuna, Tayta Dios ninqanta shumaq wiyayay. 10 Tayta Diosmi nin: ‘Qamkunapa contraykikunami kaykä. Üshäkunata mana alli mitsiyanqaykipitami juzgayäshayki. Üshäkunata mikur mana ushayänaykipämi makikikunapita qorikushä’.
Üsha mitsiq imanö kanqan
11 “Tayta Diosmi nin: ‘Kikïmi üshäkuna ashiq aywar qorikamushä. 12 Oqrakashqa üshankunata mitsiq runa ashinqannömi noqapis üshäkunata ashishä.† Pukutaycho pantakar maypa aywayashqa kayaptinpis qorikamushämi. 13 Maytsay markakunapitapis y nacionkunapitapis qorikamushämi. Kikinpa nacionninman kutiykatsimurmi Israel nación jirkankunacho shumaq mitsishä. Mayukuna ñöpan chakrakunacho y maychöpis runakuna täyanqanchömi paykunata katsishä. 14 Israel nación jirkankunachömi alli qewa kanqancho mitsishä. Tsaycho pacha junta mitsiykurmi alli qenchacho punutsishä. 15 Mana mantsakuyänanpämi kikï täpashä’.† Tayta Diosmi tsaynö nin.
16 “ ‘Oqrakaqkunatapis ashi ashiykurmi† qenchanman qorimushä. Chakin pakishqakunatapis watapäshämi. Uyutaqkunatapis kachinman jampita tallurkurmi qarashä. Wera kaqkunata y kallpasapa kaqkunatami itsanqa ushakätsishä. Rurayanqanman tupumi juzgashä’.
17 “Tayta Diosmi nin: ‘Kuyanqä runakuna, llapaykita juzgarmi üshapita cabrata rakiqnö llutan ruraqkunata rakiyäshayki.† 18 Wakinnikiqa alli qewata mikurmi contentakuyänaykipa trokin jarutakuykäyanki. Chuya yakuta upurpis jarurmi putkataykäyanki. 19 ¿Tsaynö putkatäyanqaykitatsurä upuyanqa? ¿Tsaynö jarutakuyanqaykitatsurä wakin üshäkuna mikuyanqa?’
20 “Tsaymi Tayta Dios nin: ‘Kikïmi wera kaqkunatapis y uyu kaqkunatapis shumaq rikashä. 21 Wakinniki wera karmi uyu üshäkunata tanqar, takar y maytsaypapis qarqur ushaykäyanki. 22 Tsaynö qarquyaptikipis uyu üshäkunata pipis manana ñakatsinanpämi tsapäshä. Llutanta rurayanqaykipitami juzgayäshayki.
23 “ ‘Üshäkunata shumaq rikananpämi alli mitsikuqta churashä. Tsay mitsikuqmi kanqa sirvimaqnï David. Paymi mitsiqnin kanqa.† 24 Noqami paykunapa Diosnin kashä. Sirvimaqnï Davidmi paykunapa mandaqnin rey kanqa.† Noqa Tayta Diosmi tsaynö nï.
25 “ ‘Kuyanqä runakunawanmi pactuta rurashä imaypis yanapaptï añaw kawayänanpä. Israel nacionpitaqa mikukuq jirka uywakunata illakätsishämi. Tsaymi jäkuq jirkakunachöpis muntikunachöpis mana mantsariypa punuräyanqa. 26 Sagrädu lömäpa ñöpankunaman pushaykurmi paykunaman bendicionnïta churashä. Tamyatapis tiempullanchömi tamyatsimushä. 27 Kikinkunapa chakranchömi añaw kawayanqa. Frütakunapis mikuykunapis allimi wayunqa. Jäpa runakunapa makinpita jipimuptïmi Tayta Diosnin kanqäta musyayanqa.
28 “ ‘Mayqan nación runakunapis mananami yapayqa munaynincho tsararäyanqanatsu ni mana alli uywakunapis mikuyanqanatsu. Tsaypa trokinqa imapis mana mantsaritsiptinmi añaw kawakuyanqa. 29 Mikuyninkunapis qoriyta mana atipayanqanyaq wayuptinmi muchuypis kanqanatsu. Juklä nación runakunapis manami asipäyanqanatsu. 30 Tsaynöpami üshäkuna musyayanqa noqa Tayta Diosnin paykunawan kaykanqäta y paykunata kuyanqäta’. Tayta Diosmi tsaynö nin.
31 “ ‘Qamkunaqa alli qewächo mitsinqä üshäkunami kaykäyanki. Kuyanqä runakunami kaykäyanki. Noqanami Diosnikikuna kaykä’. Tayta Diosmi tsaynö nin”.