Rikachakuqnö Ezequiel kanqan
33
Tayta Diosmi nimarqan: 2 “Runapa tsurin, marka mayikikunata willar niy: ‘Musyayanqaykinöpis may nacionchöpis guërra kaptinqa juk runatami rikachakunanpä churayan. 3 Paymi contran soldädukuna nacionninman yaykuykaqta rikar juklla cornëtata tukan marka mayinkuna kamarikuyänanpä. 4 Cornëtata wiyaykar mana kamarikuyaptinqa contrankuna chaykurmi tsay markacho taq runakunata wanutsiyanqa. Mana kamarikurqa kikinkunami wanuyänanpä jutsayuq kayanqa. 5 Tsaynö ushakäyanqa cornëtata wiyaykarpis mana kamarikurmi. Kamarikuq kaqmi itsanqa wanuypita qeshpinqa.6 “ ‘Tsay rikachakuq runa contran soldädukuna shamuykaqta rikaykar cornëtata mana tukaptinqa markaman yaykuskirmi pitapis lluta wanutsiyanqa. Jutsa ruraq kayanqanpita tsay runakunata wanutsiyaptinpis cornëtata mana tukanqanpitami rikachakuq runa jutsayuq kanqa’.
7 “Runapa tsurin, Israel runakunapa rikachakuqninnö kanaykipämi churashqä.† Tsaymi willanqäta paykunata willanki. 8 Jutsa ruraq runata ushakätsinäpä kaqta willaptï jutsa rurayta kacharinanpä mana niptikiqa qammi jutsayuq kanki tsay runa wanunqanpita. 9 Jutsa rurayta kacharinanpä nikaptiki tsaynölla jutsata rurarqa jutsanpitami tsay runa wanunqa. Willanqaykichöqa wanuptinpis manami jutsayuqnatsu kanki.
Llapan runa kawananta Tayta Dios munanqan
10 “Runapa tsurin, Israel runakunata niy: ‘Qamkuna nikäyanki jutsa rurayanqaykipita Tayta Dios castigayäshuptiki mana awantayanqaykitami. Tsaynöpis nikäyanki manana kawayänaykipä kanqantami’.
11 “Tsaymi Tayta Dios jurar nin: ‘Jutsa ruraqkuna wanuyänanta manami munätsu. Tsaypa trokinqa llutan ruraykunata kacharir noqa munanqänö kawayänantami munä. Israel runakuna, jutsa ruraynikikunata kacharir wiyayämay. ¿Imanirtä wanuyta ashiykäyanki?’†
12 “Runapa tsurin, Israel mayikikunata niy: ‘Alli runapis jutsata rurarqa castigashqami kanqa. Mana alli runapis jutsa rurayta kacharirqa perdonashqami kanqa.
13 “ ‘Aybësisqa alli runapis allita ruraq kanqanman yärakurmi llutan rurayman churakan. Tsay runata alli kawananpä awnishqa karpis mana allitana ruraptinqa wanutsishämi. Ñöpata allita ruranqankunatapis manami yarpäshänatsu.
14-15 “ ‘Aybësisqa mana alli runa jutsa rurayta kacharir munanqänömi kawan. Tsaymi jaqankuna prenda churayanqanta y suwakunqanta kutitsir leynïkunata cäsukun. Tsaynö kawaq runataqa wanutsinäpä nishqa karpis manami wanutsishänatsu. 16 Ñöpata jutsa ruranqankunatapis manami yarparäshänatsu. Llutankunata manana rurarqa mananami wanunqanatsu’.
17 “Tsaynö niptikimi marka mayikikuna niyäshunki: ‘Jutsa ruraqkuna jutsa rurayta kachariyaptinpis Tayta Dios ama perdonanmantsu. Perdonarqa llutantami ruraykan. Alli runatami itsanqa jutsankunapita perdonanman. Mana perdonarqa llutantami ruraykan’. Tsaynö nirqa llutantami parlaykäyan.
18 “Yapaymi nï: Alli runapis jutsata rurarqa wanunqami. 19 Jutsa ruraq runa jutsa rurayta kacharir munanqänö kawarqa salvakunqami. 20 Israel runakuna, ¿imanirtä nikäyanki shumaq mana juzganqäta? Imanöpis kawayanqaykiman tupumi llapaykikunatapis juzgayäshayki”.†
Jerusalénta ushakätsiyänanpä ninqan
21 Babiloniaman prësu apayämanqanpita chunka ishkay wataman aywaykaptinnami chunka kaq killa pitsqa junaqcho Jerusalénpita qeshpimuq runa nimarqan: “¡Jerusaléntami chipyaq ushakätsiyashqa!” 22 Tsay runa chämunanpä juk junaq pishiykaptinmi patsa tsakanqan höra Tayta Dios shimïta pashtarkatsirqan. Tsaymi tsay tuta runa chämunanpäqa parlarqäna.a
23 Tsaymi Tayta Dios nimarqan: 24 “Runapa tsurin, raqällana kaykaq Israel markakunacho taykaq runakunami nikäyan: ‘Abrahamqa japallan kaykarmi kay nacionta munaynincho tsarararqan. Noqantsikpis atskaq kaykarqa ¡imanirtä kay nacionta munaynintsikcho tsararantsiktsu!’
25 “Tsaymi paykunata ninki: ‘Tayta Diosmi nin: Qamkunaqa uywakunapa yawarnintami mikuykäyanki. Tsaynöllami ïdulukunata mañakuykäyanki y runa mayikitapis wanuykätsiyanki. ¿Tsaynö kaykarku kay nacionpa duëñun kayta munaykäyanki? 26 Qamkunaqa wanutsikuq, ïduluta adoraq y jukpa warminwan kakuqmi kaykäyanki. ¿Tsaynö kaykarku kay nacionpa duëñun kayta munaykäyanki?’
27 “Ezequiel, paykunata mastapis niy: ‘Tayta Diosmi jurar nin: Raqällana kaykaq markakunacho taqkunapis guërrawanmi wanuyanqa. Chakracho taqkunatapis jirka uywakunami mikuyanqa. Qaqakunacho y machaykunacho taqkunapis pestiwanmi wanuyanqa. 28 Chipyaq ushakätsiptïmi Israel nación tsunyaq tikranqa. Tsaypaqa manami pipis purinqanatsu. Tsaynö ushakätsiptïmi runa tukuyänanpä pipis kanqanatsu. 29 Melananqäta rurayanqaykipita kay nacionta ushakätsiptïrämi Tayta Dios kanqäta musyayanki’.
30 “Runapa tsurin, Israel runakunami marka murällakunacho y wayi punkukunachöpis qorikaykur niyan: ‘Tayta Diospa willakuyninta Ezequiel willakunqanta wiyaq aywashun’. 31 Tsaynö nir qorikarmi willanqaykita wiyaq tukuyan. Nirkurqa manami cäsukayämantsu. Kuyayämanqanta nirpis manami rasunpaypatsu kuyayäman. Tsaypa trokinqa imaykayuq kaypä ayrajashqa karmi llutanta rurayänallanpä yarpachakuykäyan.