Pitsqa kaq poesía
5
Tayta Dios, ima ñakaycho kayanqätapis rikaykarqa kuyapaykallämay.Kayläya desgraciacho kaykäyaptïqa yanapaykallämay.†
2 Chakräkunachöpis juklä nación runakunami murukuyan.
Wayïkunachöpis jäpa runakunanami taykäyan.
3 Taytaynaq waktsa wamrakunanömi kaykäyä.
Mamäpis castaynaq viüdanömi kaykan.
4 Kananqa kikïkunapa yakükunatapis upuyänäpä rantiyärämi.
Kikïkunapa yantäkunatapis pägakurrämi yantakuyä.
5 Chikimaqnïkunapis tsarin tsarinmi qatikachaykäyäman.
Mayjina pishiparpis manami jamayta tariyätsu.
6 Egipto runakunata y Asiria runakunatami mikuyta kamaripäyämänanpäpis rugakuyä.
7 Unay castäkunaqa jutsata rurarpis castïguta manarä chaskirmi wanukuyashqa.
Paykuna jutsata rurayanqanpitami noqakunana castïguta chaskiykäyä.
8 Kananqa wätay runakunapa munayninchömi kaykäyä.
Paykunapa munayninpita jipiyämänanpä manami pïnïkunapis kantsu.
9 Tsunyaqpita mikuyta apamurpis asaltantikunapa makinpitami qeshpiyämü.
10 Pasaypa mallaqpä kayaptïmi jornu wayllaqnörä cuerpükunapis achachan.
11 Sióncho warmikunata y Judá markakunacho jipashkunatapis fuerzarmi ushayashqa.
12 Mandaqnïkunatapis makinkunata watarkurmi warkuyashqa.
Mayor runakunatapis manami respitayashqatsu.
13 Kallpasapa kaqkunataqa mulinu rumita tanqar tumatsiyänanpämi apakuyashqa.
Chölukunatapis yantatami apariytapis mana puëdiyanqanyaq aparitsiyashqa.
14 Mayor runakunapis marka punkucho manami jamaräyannatsu.
Chölukuna y jipashkunapis mananami cantayannatsu.
15 Kushikuytapis mananami tariyänatsu.
Kushikur tushuyänäpa trokinmi wanupakushqanö kaykäyä.
16 Umäkunapita corönäkuna shushuqnömi munayyuq kayanqäpis ushakashqa.
¡Ay noqalläkuna!
Pasaypa jutsata rurayanqäpitami ñakaykäyä.
17 Llakikuyllawanmi shonqükunapis pasaypa nanaykan.
Waqayllawanmi ñawïkunapis tsakaskinna.
18 Sión jirkan pasaypa tsunyaraptinmi munti uywakunallana puriyan.
19 Tayta Dios, ima kaptinpis qammi itsanqa imayyaqpis mandamaqnï rey kanki.
Ciëlupitami imayyaqpis mandayämanki.†
20 ¿Imanirtä pasaypa qonqaykayämashqayki?
¿Imanirtä kaytsika unay kachariykayämashqayki?†
21 Tayta Dios, perdonaykayällämay.
Perdonayämaptikiqa qamllamannami yärakayämushä.
Kamakaykatsillay unay kawayanqänö yapay kushishqa kawayänäpä.
22 ¿Imanirtä rikayämaytapis munankinatsu?
¿Pasaypanaku noqakunawan rabyakushqayki?