Chusku kaq poesía
4
Álef1 ¡Qoripis yanayashqanami kaykan!
¡Mananami chipipinnatsu!
Templu pirqaraq rumikunapis llapan cälli esquïnakunachömi jitaraykan.
Bet
2 Sión runakunaqa qori pürupitapis mas kuyaypämi kayashqa.
Kananqa mana yachaq runa ruranqan mitu mankanömi kaykäyan.
Guímel
3 Chacalkunapis wawankunata kuyarmi chuchuyan.
Kuyanqä runakunaqa tsunyaqcho taq avestruznömi wamrankunatapis kuyayta yachayantsu.†
Dálet
4 Chuchuykaq wamrakunapapis yakunaywanmi qallunpis jaqrunman laqakaykan.
Wamrakuna mallaqar mañakuyaptinpis manami pipis kantsu imallatapis qaraykunanpä.
He
5 Alli allillata mikuqkunapis kananqa mallaqaywanmi cällikunacho wanuykäyan.†
Kuyayllapä wayicho wiñaqkunapis kananqa qanra jitakunachömi taykäyan.
Vav
6 Sodoma runakuna jutsata rurayanqanpitapis alläpa kaqmi marka mayïkuna jutsata rurayashqa.
Sodoma markaqa pipis mana atacaykaptinmi illaqpita ushakarqan.†
Zayin
7 Rashta y lichi yuraq kanqannömi Jerusalén autoridäkunapis jutsaynaq y alli runakuna kayarqan.
Wera kayaptinmi ñawinkunapis saltanarqanrä.
Qaqllankunapis zafiro ruminörämi chipipirqan.
Jet
8 Kananqa pasaypa yanayashqami kaykäyan.
Cällikunacho purirpis mana reqiypämi kaykäyan.
Pasaypa uyu kayaptinmi tullunkunapis yupanakuykäyan.
Tet
9 Mallaqaywan wanuqkunaqa pasaypami ñakayarqan.
Guërracho wanuqkunami itsanqa alläpa ñakayashqatsu.
Yod
10 Jerusalénpita yarquyta mana kamäpakurmi pasaypa mallaqar wamrankunatapis mikuyashqa.
Kuyapäkuq warmikunapis wawankunatami kusinayashqa.†
Caf
11 Jerusalénta tsaynö castigarmi ajanayninta Tayta Dios qallqütsishqa.
Sión markata ninawan rupatsirmi wayikunata cimientuntinta chipyaq ushakätsishqa.
Lámed
12 Maytsay nacioncho reykunapis ni pï runapis manami criyiyashqatsu chikimaqnintsikkuna Jerusalénta vinciskir yaykayämunanpä kanqanta.
Mem
13 Tsaynö llapanpis kashqa profëtakuna jutsata rurayanqanpita y sacerdötikuna mana allikunata rurayanqanpitami.
Tsaynöllami paykunaqa jutsaynaq runakunatapis wanutsiyashqa.†
Nun
14 Tsay profëtakuna y sacerdötikunami kananqa cällikunacho qapranö tapra tapra puriykäyan.
Wanutsiyanqan runakunapa yawarninwan pichukushqa kayaptinmi pipis yatayllapis yataykuyta munantsu.†
Sámej
15 Paykunata rikarmi runakuna niyan:
“¡Qanra shonqu runakuna, ama yatayämaytsu!
¡Kaypita maypapis aywakuyay!”
Tsaynö chikishqa karmi Jerusalénpita qeshpir maytsay nacionkunamanpis aywakuyashqa.
Tsay nacionkunacho taq runakunapis niyanmi:
“Kay purikuq runakunaqa markantsikcho ama täyätsuntsu”.
Pe
16 Kikin Tayta Diosmi rabyanarnin profëtakunatawan sacerdötikunata Jerusalénpita qarqushqa.
Paykunataqa manami yanapannatsu.
Tsaymi sacerdötikunatapis ni mayor runakunatapis respitayannatsu.
Ayin
17 Juklä nación soldädukuna yanapamänantsikpä shuyarashqapis manami shayämushqatsu.
Shuyarar rikachakuykashqallami ñawintsikpis tsakaskishqa.†
Tsade
18 Chikimaqnintsikkuna rikarämashqami cälliman yarquytapis munashqantsiktsu.
Ushakänantsikpä höra chämuptinmi wanuypis janantsikchöna kashqa.
Qof
19 Anka pajanqanpitapis mas ras aywaqmi chikimaqnintsikkuna kayashqa.
Jirkakunapapis qatikachämashqantsikmi.
Tsunyaqpa qeshpishqapis shuyaraykämashqantsikmi.
Resh
20 Tayta Dios akranqan mandamaqnintsik reytapis prësumi tsariyashqa.†
Paymi tsapämaqnintsik kashqa.
Pay rikamashqa mayqan nacionpis achäquita mana ashipämänantsikpä kanqantami yarparqantsik.
Sin/Shin
21 Uz particho kaq Edom nación runakuna, ama kushipäyämaytsu.
Qamkunamanpis castïgu chämunqami.
Tsaymi machashqa qallapächu jitaraq runa penqakuypä kanqannö qamkunapis penqakuypä kayanki.
Tav
22 Sión runakuna, castïguta chaskishqantsiknami.†
Yapayqa mananami prësu apamäshunnatsu.
Edomita runakuna, qamkunatami itsanqa jutsata rurayanqaykipita Tayta Dios castigayäshunki.
Paymi llapan jutsaykikunata shimpiyäshunki.†