24
Judá nacioncho Joacim rey kaykanqan witsanmi Babiloniapa mandaqnin rey Nabucodonosor Judá nacionta atacar vincirqan.† Judá nacionta kimsa wata munaynincho tsararaykaptinmi Joacimqa contran shärirqan. 2 Tsaypitanami asaltantikunata Tayta Dios kacharqan Judá nacionta ushakätsiyänanpä. Tsay asaltantikunami Babiloniapitaa, Siriapita, Moabpita y Amónpita shayämurqan. Tsaynö päsarqan Tayta Diospa sirviqnin profëtakuna willakuyanqannöllami.3 Asaltantikunata Tayta Dios tsaynö kacharqan Judá nación runakunata ñöpanpita qarqunanpämi. Tsaynö rurarqan rey Manasés tukuy niraq jutsata ruranqanpitami. 4 Manasésqa jutsaynaq runakunatami Jerusaléncho tsaytsikata wanutsirqan. Tsaynö ruranqanpitami Tayta Dios perdonarqantsu.
5 Rey Joacim imata ruranqanpis Judá nacionpa mandaqnin reykunapa acta librunchömi qellqaraykan. 6 Joacim wanuskiptinnami tsurin Joaquínna rey karqan.
7 Babilonia nacionpa mandaqnin reyqa Egipto raqrapita hasta Éufrates mayuyaqmi llapan markakunata munaynincho tsarararqan. Tsaynö tsararaptinmi Egipto nacionpa mandaqnin reyqa soldädunkunawan Judá nacionta atacayarqannatsu.
Joaquínta y wakin runakunata Babiloniaman prësu apayanqan
8 Joaquínqa chunka puwaq watayuq kaykarmi rey kayta qallaykurqan. Payqa kimsa killallami Jerusalénpita mandarqan. Mamanmi karqan Jerusalén markapita Elnatánpa tsurin Nehusta. 9 Joaquínpis taytannöllami Tayta Diosta mana cäsukur jutsata rurarqan.
10 Tsay witsanmi Babilonia nacionpa mandaqnin rey Nabucodonosor soldädunkunata kacharqan Jerusalénta atacayänanpä. Jerusalénman chaykurnami soldädunkuna jiruruypa tsapaskiyarqan atacayänanpä. 11 Tsaycho atacaykäyaptinmi kikin Nabucodonosorpis tsayman charqan. 12 Pelyayta mana valurarmi rey Joaquínpis, mamanpis, mandashiqninkunapis, soldädunkunapa capitanninkunapis y yätsiqnin runakunapis rey Nabucodonosorpa munayninchöna kayarqan. Tsaynö päsarqan Nabucodonosor puwaq watana Babilonia nacionpa mandaqnin rey kaykaptinmi.†
13 Jerusalénman yaykuskirnami rey Nabucodonosor templupitapis y palaciupitapis qoripita rurashqa manëjukunata jipitsirqan. Rey Salomón qoripita ruratsinqankunatapis pakiskirmi templupita apatsirqan. Llapan tsaykuna päsarqan Tayta Diospa profëtankuna willakuyanqannöllami.† 14 Tsaypitanami rey Nabucodonosorqa Jerusalénpita chunka waranqa (10,000) runakunata Babiloniaman prësu apakurqan. Tsaynöllami prësu apakurqan capitankunata, allinnin soldädukunata, artesänukunata y herrërukunatapis. Muchuq runakunallatami tsaycho jaqiykurqan.
15 Tsaynöllami Babiloniaman prësu apakurqan rey Joaquínta, mamanta, warminkunata, capitanninkunata y Judá nacioncho taq llapan yachaq runakunatapis.† 16 Tsaynöllami prësu apakurqan qanchis waranqa (7,000) soldädukunata y juk waranqa (1,000) artesänukunata y herrërukunata. Llapan tsay runakunaqa guërraman aywayänanpä kallpankunachönami kayarqan. 17 Nirkurmi Babilonia nacionpa mandaqnin rey Nabucodonosorqa Joaquínpa tiyun Mataníastana churarqan rey kananpä. Tsaynö churarmi jutinta trukatsirqan Sedequías jutin kananpä.†
Sedequías Judá nacioncho rey kanqan
18 Sedequías ishkay chunka juk (21) watayuq kaykarmi rey kayta qallaykurqan.† Payqa chunka juk watami Jerusalénpita mandarqan. Mamanmi karqan Libna markapita Jeremíaspa tsurin Hamutal. 19 Sedequíaspis taytan Joacimnöllami Tayta Diosta mana cäsukur jutsata rurarqan. 20 Tsaymi Tayta Dios ajanarnin Jerusaléncho taq runakunata y Judá nacioncho taq runakunata ñöpanpita qarqurqan.
Tsaypitanami rey Sedequías Babilonia nacionpa mandaqnin reypa contran shärirqan.†