3 Jerusalénman Egipto nacionpa mandaqnin rey chaykurmi mandaq kanqanpita Joacazta jipirqan. Nirkurmi Judá runakunata nirqan kimsa waranqa kimsa pachak (3,300) kïlu yuraq qellayta y kimsa chunka kimsa (33) kïlu qorita qoriskir impuestuta pägayänanpä. 4 Rey kanqanpita jipirmi Joacazpa wawqin Eliaquimta churarqan Jerusaléncho y Judácho rey kananpä. Tsaynöllami Eliaquimpa jutintapis trukatsirqan Joacim jutin kananpä. Joacaztanami Egiptupa prësu apakurqan.^†

5 Joacimqa^† ishkay chunka pitsqa (25) watayuq kaykarmi Judá nacioncho rey kayta qallaykurqan. Payqa chunka juk watami Jerusalénpita mandarqan. Itsanqa Tayta Diosta mana cäsukurmi jutsata rurarqan.

6 Tsay witsanmi Babilonia nacionpa mandaqnin rey Nabucodonosor Jerusalénman shamur soldädunkunawan atacarqan.^† Tsaycho Joacimta prësu tsariskirmi bronci cadënawan watarkur Babiloniaman apakuyarqan. 7 Tsaynöllami Tayta Diospa templunpita wakin manëjukunatapis Babiloniaman apakuyarqan. Tsay apakuyanqan manëjukunatami Babiloniacho taq runakuna adorayanqan diospa templunman churayarqan.

8 Rey Joacim imanö kawanqan, jutsata ruranqan y desgracia päsanqanpis Israel nacionpa y Judá nacionpa mandaqnin reykunapa acta librunchömi qellqaraykan. Paypa trokinnami tsurin Joaquínna rey karqan.

9 Joaquínqa chunka puwaq watayuq kaykarmi^a rey kayta qallaykurqan. Payqa kimsa killa chunka junaqllami Jerusalénpita mandarqan. Itsanqa Tayta Diosta mana cäsukurmi jutsata rurarqan.

10 Mushuq wata qallaykuptinmi^b Babiloniapa mandaqnin rey Nabucodonosor Joaquínta Babiloniaman prësu apatsirqan.^† Tsaynöllami Tayta Diospa templunpita mas chaniyuq manëjukunatapis apatsirqan. Tsaypitanami Judá nacionpa y Jerusalénpa mandaqnin rey kananpä Joaquínpa tiyun Sedequíasta churarqan.^†

11 Sedequías ishkay chunka juk (21) watayuq kaykarmi rey kayta qallaykurqan. Payqa chunka juk watami Jerusalénpita mandarqan. 12 Sedequíasqa Tayta Dios ninqanta profëta Jeremías willaptinpis mana cäsukurmi jutsata rurarqan.^† 13 Tayta Diospa jutincho rey Nabucodonosorwan yanapanakuyänanpä awninakushqa kaykarmi paypa contran shärirqan.^† Pasaypa mana cäsukuq karmi Israel runakunata kuyaq Tayta Diosta cäsukuyta munarqantsu.

14 Tsaynöllami Sedequías mandanqan witsan mandaq sacerdötikunapis y runakunapis pasaypa jutsa rurayman churakäyarqan. Paykunaqa juklä nacionkunacho taq runakunanö jutsata rurarmi templuman ïdulukunata apaykur adorayarqan. Tsaynö rurayarqan Jerusalén templucho tänanpä Tayta Dios akrashqa kaykaptinmi. 15 Paykuna tsaynö rurayaptinpis akranqan Israel runakunata y täkunan templunta kuyarmi unay castankuna yärakuyanqan Tayta Dios profëtankunawan imaypis willakatsirqan. 16 Tsaynö willakaykatsiptinpis runakunaqa profëtakunata manakaqman churarmi asipäyarqan. Tsaymi Tayta Dios pasaypa ajanarnin kuyanqan Israel runakunata castigarqan.

17 Tsaynö mana cäsukuq kayaptinmi Tayta Dios kacharirqan Babilonia^c nacionpa mandaqnin rey soldädunkunawan Israel runakunata ushakätsiyänanpä.^† Tsay soldädukuna chaykurmi templu rurinchöpis chölukunata espädawan wanutsiyarqan. Tsaynöllami cällikunachöpis chölukunata, jipashkunata, awkinkunata, chakwankunata y qeshyaqyashqakunata mana kuyapaypa wanutsiyarqan. Llapantami paykunapa munayninman Tayta Dios kachariykurqan. 18 Nirkurmi templupita llapan manëjukunata jatuntapis takshatapis apakuyarqan. Tsaynöllami templupita, reypa palaciunpita y reyta mandashiqninkunapa wayinkunapitapis kuyayllapä kaqkunata apakuyarqan. Llapan tsay qoriyanqantami Babiloniaman apakuyarqan. 19 Tayta Diospa templunta kayarmi^† Jerusalén markapa murällantapis llapanta juchutsirnin reypa palaciunkunatapis kayar ushayarqan. Mas chaniyuq kaqkunata llapantami ushakätsiyarqan.

20 Kawaykar quëdaqkunatanami Babiloniaman prësu apakuyarqan. Tsaychömi Babilonia runakunapa y tsurinkunapa wätayninkuna kayarqan Babilonia nacionta Persia nacionpa mandaqnin rey vincinqanyaq. 21 Tsaynöpami profëta Jeremías willakunqanta cumpliyarqan.^† Runakunata Jerusalénpita apakuyaptinmi Judá nacioncho chakrakuna qanchis chunka (70) wata jamarqan.

22 Persia nacioncho Ciro rey kayta qallaykunqan watami Ciruta Tayta Dios yarpayta qorqan Israel runakunata nacionninkunaman kutitsinanpä. Tsaynö kutitsirmi profëta Jeremías willakunqanta cumplirqan.^† Tsaymi rey Ciruqa pregunaypa y cartakuypa entëru mandanqan nacionman willakatsir nirqan: 23 “Noqa Ciro, Persia nacionpa mandaqnin rey karmi, nï: ‘Ciëlucho kaykaq Tayta Diosmi llapan nacionkunata munaynïman churamushqa. Paymi nimashqa Judácho kaykaq Jerusaléncho templunta shäritsinäpä.^† Mayqaykipis Israel casta kaqkunataqa markaykikunaman kutikuyänaykipä Tayta Dios yanapaykuyäshuy’ ”.