Sedequías Judá nacioncho rey kanqan
52
Sedequías ishkay chunka juk (21) watayuq kaykarmi rey kayta qallaykurqan. Payqa chunka juk watami Jerusalénpita mandarqan. Mamanmi karqan Libna markapita Jeremíaspaa tsurin Hamutal. 2 Sedequíaspis taytan Joacimnöllami Tayta Diosta mana cäsukur jutsata rurarqan. 3 Tsaymi Tayta Dios ajanarnin Jerusaléncho taq runakunata y Judá nacioncho taq runakunata ñöpanpita qarqurqan.Rey Sedequíasta Babilonia runakuna prësu tsariyanqan
Tsaypitanami rey Sedequías Babilonia nacionpa mandaqnin reypa contran shärirqan. 4 Tsaymi rey Nabucodonosor llapan soldädunkunawan Jerusalén frentinman chaykur campamentuta rurayarqan.† Nirkurnami marka murälla waqtanpa allpata qotutsiyarqan tsaypa yarkur atacayänanpä.
Tsaynö päsarqan Sedequías puwaq wata rey kaykaptinmi. Nabucodonosor Jerusalénman chanqan junaqmi karqan chunka kaq killacho chunka junaq.b 5 Jerusalénta tsaynö jiruruypa tsaparäyarqan hasta Sedequías chunka juk wata mandar qallaykunqanyaqmi.
6 Runakuna mikuyänanpä imapis mana kaptinmi chusku kaq killacho isqun junaqc kaykaptin 7 marka murällata uchkuskiyarqan. Babiloniad soldädukuna markata jiruruypa tsaparäyaptinmi Jerusaléncho soldädukuna paqaspa qeshpirnin reypa huertanpa päsar ishkay murälla punkupa yarquyarqan. Tsaypitanami Arabá pampaman aywaq näniman aywakuyarqan.
8 Tsaynö qeshpiykäyaptinmi Babilonia soldädukuna rey Sedequíasta taripaykur Jericó pampacho tsariyarqan. Tsaymi Sedequíasta soldädunkuna jaqiskir wakpa kaypa qeshpir aywakuyarqan. 9 Rey Sedequíasta tsaynö prësu tsariykurmi Babilonia nacionpa mandaqnin rey Nabucodonosorman apayarqan. Nabucodonosorqa Hamatcho kaykaq Ribla markachömi kaykarqan.e Tsaycho juzgarmi 10 rey Sedequías rikaraykaptin tsurinkunata wanutsiyarqan. Tsaynöllami Judá nacionpa autoridäninkunatapis wanutsiyarqan. 11 Kikin Sedequíastanami ishkan ñawinkunata jipiskir cadënawan watarkur Babiloniaman prësu apayarqan.† Tsaychömi wanunqanyaq prësu wichqararqan.
Babilonia runakuna templuta juchuskatsir runakunata prësu apakuyanqan
12 Nabucodonosor chunka isqun watana Babiloniapa mandaqnin rey kaykaptinmi pitsqa kaq killacho y chunka junaqchof Jerusalénman Nabuzaradán charqan. Nabuzaradánqa Nabucodonosorpa wardiankunapa capitanninmi karqan. 13 Jerusalénchömi Tayta Diospa templunta, reypa palaciunta†, llapan wayikunata y autoridäkunapa despächunkunatapis kayar ushayarqan.† 14 Nirkurnami Jerusalén markapa murällankunatapis soldädukuna juchutsiyarqan.
15 Nirkurnami Jerusaléncho quëdaq runakunata Babiloniaman Nabuzaradán prësu aparqan. Tsaynöllami aparqan wakin muchuqkunata, Babilonia reypa janan shäriq runakunata y ñöpata mana apayanqan artesänukunatapis. 16 Mas muchuq kaq runakunatami itsanqa patsallancho jaqiykurqan chakrakunata aruyänanpä y üvakunata uryayänanpä.
17 Tsaynöllami pakir ushayarqan templucho broncipita rurashqa jatunkaray columnakunata, carrëtakunata y lamar niyanqan jatunkaray lavatoriuta. Nirkurnami tsay pakiyanqan broncita Babiloniaman apakuyarqan. 18 Tsaynöllami apakuyarqan uchpa qorikuyänankunata, pälakunata, llipta jipikuyänankunata, tazonkunata, wishllakunata y wakin manëjukunatapis. Tsay manëjukunami broncipita rurashqa karqan sacrificiukunata rupatsir manijayänanpä. 19 Tsaynöpis capitán Nabuzaradánmi apakurqan inciensiu qoshnitsikuyänankunata, shansha apakuyänankunata, tazonkunata, uchpa qorikuyänankunata, candelabrukunata, wishllakunata, cöpakunata y llapantapis qoripita y qellaypita kaqkunata.
20 Apakuyanqan broncita manami pësaytapis kamäpakuyarqantsu. Tsay bronci karqan ishkay columnakunapita, lamar niyanqan jatunkaray lavatoriupita, lavatoriu jamaränanpä ruratsinqan chunka ishkay törukunapita y carrëtakunapita. Tsaykunataqa rey Salomónmi Tayta Diospa templunpä ruratsirqan.
21 Templu punkucho columnakunaqa puwaq metru largunömi karqan. Rakunnami pitsqa metru pullannö karqan. Raktannami qanchis centïmetru karqan. Tsay columnakunaqa jäku shonqumi karqan. 22 Columna puntancho ishkay metrunömi broncipita rurashqa tumaypa adornun karqan. Tsay adornu entëru kuchunpa awashqa shikra niraqmi karqan. Shikrapita warkuränanpämi broncipita rurashqa granäda niraqkunapis karqan. Jukaq columnapis tsay niraqllami karqan. 23 Cada columnachömi isqun chunka soqta (96) granäda niraqkuna karqan. Puntancho kaq adornuchömi juk pachak (100) granäda niraqkuna karqan.†
24 Mandaq sacerdöti Seraíastanami wardiakunapa capitannin Nabuzaradán prësu tsarirqan. Paytawanmi mandashiqnin sacerdöti Sofoníasta y templu punku täpaq kimsa runakunatapis prësu tsarirqan. 25 Tsaynöllami prësu tsarirqan soldädukunapa capitanninta, reyta yätsiq qanchis runakunata, soldädu kayänanpä tsariq capitanta y soqta chunka (60) mayor runakunatapis. 26 Babilonia nacionpa mandaqnin rey Nabucodonosor Ribla markacho kaptinmi wardiakunapa capitannin Nabuzaradán llapan tsay prësu tsarinqan runakunata Riblaman aparqan. 27 Tsaychömi Nabucodonosor nirqan tsay runakunata wanutsiyänanpä. Tsaynöpami Judá runakunata wakinta wanutsiyarqan y wakintana juklä nacionman apayarqan.
28 Kaychömi qellqaraykan Judápita ayka runakunata Nabucodonosor prësu apatsinqanpis. Qanchis watana rey kaykarmi Nabucodonosor prësu apatsirqan kimsa waranqa ishkay chunka kimsa (3,023) Judá runakunata. 29 Chunka puwaq watana rey kaykarmi Jerusalénpita Nabucodonosor prësu apatsirqan puwaq pachak kimsa chunka ishkay (832) runakunata. 30 Ishkay chunka kimsa (23) watana Nabucodonosor rey kaykaptinmi wardiakunapa capitannin Nabuzaradán prësu apatsirqan qanchis pachak chusku chunka pitsqa (745) Judá runakunata. Llapan apatsinqan runakunami chusku waranqa soqta pachak (4,600) runakuna kayarqan.
Babiloniacho carcelpita Joaquínta jipinqan
31 Babiloniapa mandaqnin rey Evil-merodac mandayta qallaykunqan watami Judá nacionpa mandaqnin rey Joaquínta kuyapar carcelpita jipitsirqan. Tsaynö jipitsirqan Babiloniaman prësu apayanqanpita kimsa chunka qanchis (37) wata ushaykaptin chunka ishkay killacho ishkay chunka pitsqa (25) junaqchömi.g 32 Kushi kushi parlaparmi Joaquíntaqa Babiloniacho prësu kaykaq reykunapitapis mas alli rikarqan. 33 Tsaynöpami rey Joaquínqa carcelcho kanqan latsapanta trukakuskir Babilonia nacionpa mandaqnin reywan imaypis juntu mikurqan. 34 Gastunkunapäpis wanunqanyaqmi qoyay qoyay qellayta reypita chaskiq.