Jerusalén markata Babilonia runakuna ushakätsiyanqan
39
Puwaq wata y chunka killanaa Judá nacionpa mandaqnin rey Sedequías kaykaptinmi Babilonia nacionpa mandaqnin rey Nabucodonosor llapan soldädunkunawan aywar Jerusalénta atacayänanpä jiruruypa churanakuyarqan. 2 Chunka wata y chusku killa isqun junaqb Sedequías rey kaykaptinnami tsay soldädukuna murällata uchkuskir markaman yaykuyarqan. 3 Babilonia nacionpa mandaqnin reypa capitanninkuna yaykuskirmi chawpi punkuman churanakuyarqan. Paykuna kayarqan Nergal-sarezer, Samgar-nebo, mandaq Sarsequim, mandaq Nergal-sarezer y reypa llapan capitanninkunapis.4 Tsayta rikaykurmi rey Sedequías llapan soldädunkunawan paqaspa qeshpir reypa qenchan ninqanpa päsar yarquyarqan ishkay murälla ninqan punkupa. Nirkurmi Arabá pampaman aywaq nänipa aywakuyarqan. 5 Tsaynö qeshpiykäyaptinmi Babiloniac soldädukuna qatiparnin Jericó pampacho rey Sedequíasta taripäyarqan.
Prësu tsariykurmi Babiloniapa mandaqnin rey Nabucodonosorman apayarqan. Nabucodonosorqa Hamatcho kaykaq Riblad markachömi kaykarqan. Chaykatsiyaptinmi Nabucodonosor juzgarqan. 6 Riblachömi rey Sedequías rikaraykaptin tsurinkunata wanutsiyarqan. Tsaynöllami Judá nacionpa autoridäninkunatapis wanutsiyarqan. 7 Kikin Sedequíastanami ishkan ñawinkunata jipiskir cadënawan watarkur Babiloniaman prësu apayarqan.
8 Jerusalénchönami reypa palaciunta y tsaycho kaq wayikunatapis Babilonia soldädukuna kayar ushayarqan. Tsaynöllami Jerusalén markapa murällantapis juchutsiyarqan. 9 Tsaypitanami wardiakunapa capitannin Nabuzaradán kawaykar quëdaq runakunata y payman takukaqkunatapis Babiloniaman apatsirqan. 10 Judá nacionchöqa pasaypa muchuqkunallatami jaqiykuyarqan. Paykuna arukuyänanpämi üva chakrakunata y murukuyänanpä chakrakunatapis rikatsirqan.
Prësu kanqanpita Jeremíasta kacharinqan
11 Babiloniapa mandaqnin rey Nabucodonosormi wardiakunapa capitannin Nabuzaradánta nirqan: 12 “Jeremíasta shumaq rikanki. Imatapis munanqantaqa kamaripaykunki”.
13 Tsaynö niptinmi wardiakunapa capitannin Nabuzaradán, palaciucho mandaq Nabusazbán, mandaq Nergal-sarezer y Babilonia nacionpa mandaqnin reypa llapan capitanninkunapis 14 carcelpa patiunpita† Jeremíasta jipitsiyämurqan. Nirkurmi wayinman kutitsinanpä Ahicampa tsurin y Safánpa willkan Gedalíasta entregayarqan. Tsaynöpami quëdaq Judá mayinkunawan Jerusaléncho Jeremías tarqan.
Ebed-melecta Tayta Dios promitinqan
15 Carcelpa patiunllachörä Jeremías prësu kaykaptinmi Tayta Dios nirqan: 16 “Etiopíapita Ebed-melecta† niy: ‘Israel runakunata kuyaq y llapanta mandaq Tayta Diosmi nin: Kay markacho alli kaway kananpa trokin desgracia chämunanpämi nirqä. Tsay ninqätaqa cumplishämi. Tsaynö päsanqanta qampis rikankimi. 17 Tsaynö kaptinpis mantsarinqayki runakunapita noqami tsapäshayki. 18 Noqaman yärakamunqaykipitami mana wanutsiyäshunaykipä tsapäshayki. Noqa Tayta Diosmi tsaynö nï’ ”.