3 “Mastami Tayta Dios nin: ‘Babiloniapa mandaqnin reymi soldädunkunawan kay markata vincir munaynincho tsararäyanqa’ ”.

4 Jeremías tsaynö willakunqanta wiyarmi tsay autoridäkuna reyman aywaykur niyarqan: “Kay runata wanutsishun. Tsaynö parlarqa kaycho kaykaq soldädukunata y llapan runakunatapis mantsariykätsinmi. Nacionnintsik alli kananta kay runa manami munantsu, tsaypa trokinqa desgracia chämunantami munan”.

5 Niyaptinmi rey Sedequías nirqan: “Makikikunachömi kaykan. Imatapis yarpäyanqaykita rurayay. Wanutsiyta munayaptikipis manami michäkütsu”.

6 Tsaynö niptinmi reypa tsurin Malquíaspa mitu pözunman waskawan watarkur Jeremíasta jatiyarqan. Tsay pözuqa karqan carcelpa patiunchömi. Tsay pözucho atska mitu kaptinmi Jeremíasqa ruriyaq jatikarqan.

7 Etiopía runa Ebed-melecmi musyarqan Jeremíasta pözuman jatiyanqanta. Payqa palaciucho autoridämi karqan. Benjamín Punku kaqchönami reyqa sesionta ruraykarqan. 8 Palaciupita rey kaqman aywaykurmi Ebed-melec nirqan: 9 “Tayta rey, profëta Jeremíasta mitu pözuman jatir pasaypa mana allitami tsay runakuna rurayashqa. Tsaychöqa mallaqaypitachi wanunqa. Mikuypis markacho manami kannatsu”.

10 Tsaynö niptinmi Ebed-melecta rey nirqan: “Kimsa chunka (30) runakunata pushakurkur ayway profëta Jeremías manarä wanuqta jipiyämunaykipä”.

11 Tsaymi runakunata pushakurkur Ebed-melec aywarqan reypa palaciuncho makwa latsapakuna churaräkunanman. Tsaypita ratashkunata apakurkur aywarmi tsay ratashkunata Jeremíasta waskawan jitaparqan. 12 Jitaparmi Ebed-melec nirqan: “Waska mana nanätsishunaykipä tsay ratashkunata ikishnikiman churakuy”.

Ninqannöllami Jeremías churakurqan. 13 Shumaq churakuskiptinnami waskawan sutaypa pözupita jipiyämurqan. Tsaypitanami carcelpa patiuncho Jeremías wichqararqan.

14 Tsaypita juk junaqmi templuman yaykuna kimsa kaq punkuman rey Sedequías profëta Jeremíasta qayatsirqan. Tsaychömi nirqan: “Imatapis mana llullapämaypa rasun kaqta willamay”.

15 Tsaymi Jeremías nirqan: “Tayta rey, rasun kaqta willaptï wanutsimankichi. Yätsiptïpis manami cäsukamankitsu”.

16 Tsaynö niptinmi rey Sedequías jurarnin nirqan: “Manami wanutsishaykitsu ni wanutsiyta munayäshuqniki runakunapa makinmanpis churashaykitsu. Tsay ninqäta cumplinäpämi kawayta qaramaqnintsik Tayta Diospa jutincho jurä”.

Wakinkuna mana wiyayänanpämi rey Sedequías shapshapyayllapa tsaynö jurarqan.

17 Tsaymi Sedequíasta Jeremías nirqan: “Israel runakunata kuyaq y llapanta mandaq Tayta Diosmi nin: ‘Babiloniapa mandaqnin rey kachamunqan capitankunaman juklla entregakuptikiqa manami qamtapis ni castaykikunatapis wanutsiyäshunkitsu. Tsaynö ruraptiki kay markatapis manami rupatsiyanqatsu. 18 Paykunaman mana entregakuptikimi itsanqa Babilonia soldädukuna yaykamur kay markata rupatsiyanqa. Tsaynö rurayaptin qampis manami qeshpinkitsu’ ”.

19 Tsaymi Sedequías nirqan: “Babilonia soldädukunaman aywarqa paykunapa makinkunacho kaykäyaq Judá mayintsikkuna maqayämänantami mantsarï”.

20 Niptinmi Jeremías nirqan: “Tayta rey, Tayta Dios nikäshuptikiqa wiyakuy. Wiyakurqa paykunapa makinman manami chankitsu, tsaypa rantinqa allimi kawanki. 21 Mana aywaptikiqa kay markata ushakätsiyänanpä kanqantami Tayta Dios musyatsimashqa. 22 Palaciuykicho quëdaq warmikunata llapantami Babiloniapa mandaqnin rey kachamunqan capitankuna apakuyanqa. Washayta mana kamäpakuptikimi tsay warmikuna niyäshunki:

23 Rey Sedequíasta mastami Jeremías nirqan: “Tayta rey, warmikikuna y tsurikikuna llapanmi Babilonia soldädukunapa makincho kayanqa. Qampis qeshpiyta mana kamäpakurmi Babiloniapa mandaqnin reypa munaynincho prësu kanki. Paymi soldädunkunata mandanqa kay markatapis rupatsiyänanpä”.

24 Tsaynö niptinmi Jeremíasta Sedequías nirqan: “Autoridäkuna wanutsiyäshunaykita mana munarqa nimanqaykita ama pitapis willaytsu. 25 Parlanqantsikta musyaskir autoridäkunami tapuyäshunki. Tsaynöpis niyäshunki llapan nimanqaykita mana willaptiki wanutsiyäshunaykipä kanqantami. 26 Tsaynö niyäshuptiki parlanqantsikta imatapis ama willaytsu. Tsaypa trokinqa ninki Jonatánpa wayinman prësu mana kutitsinäpä y tsaycho mana wanunaykipä rugakamanqaykita”.

27 Rey ninqannöllami llapan autoridäkuna Jeremías kaqman aywaykur tapuyarqan. Tapuyaptinpis rey yachatsinqannöllami Jeremías nirqan. Jeremíaswan rey parlayanqanta mayqanpis mana wiyayashqa karmi imatapis mana parlakuypa witikuyarqan.

28 Jerusalénman Babilonia soldädukuna yaykuyanqan junaqyaqmi carcelpa patiuncho Jeremías prësu kaykarqan.