Jeremíasta rey Sedequías rugakunqan
37
Josíaspa tsurin Sedequíasnami Joacimpa tsurin Coníaspaa trokin Judá nacioncho rey karqan. Rey kananpämi Babiloniapa mandaqnin rey Nabucodonosor churarqan. 2 Manami rey Sedequíaspis, yanapaqninkunapis ni Judá runakunapis wiyakuyarqantsu profëta Jeremíaswan Tayta Dios willakatsinqanta.3 Juk junaqmi rey Sedequías Selemíaspa tsurin Jucaltawan Maasíaspa tsurin sacerdöti Sofoníasta kacharqan profëta Jeremíasta rugar niyänanpä: “Tayta Diosnintsiktashi mañakuykunki yanapaykayämänanpä”.
4 Tsay witsan manarä prësu tsariyaptinmi Jeremías libri puriykarqan. 5 Tsay witsanmi Babiloniab soldädukuna musyayarqan Faraónpa soldädunkuna Jerusalén runakunata yanapayänanpä Egiptupita shamuykäyanqanta. Tsayta musyaskirmi Jerusalénta jiruruypa tsaparaykäyanqanpita Babilonia soldädukuna paykunawan pelyayänanpä aywayarqan.
6 Tsaymi profëta Jeremíasta Tayta Dios nirqan: 7 “Israel runakunata kuyaq y llapanta mandaq Tayta Dios karmi nï: Mañakamänaykipä tsaynö rugakuyäshuptiki Judá nacionpa mandaqnin reyta niy: ‘Yanapayäshunaykipä shamurpis Faraónpa soldädunkuna manami yanapayäshunkitsu, sinöqa nacionninkunamanmi kutikuyanqa. 8 Tsayta rikarmi Babilonia soldädukuna kutimur Jerusalénta atacar munayninman churayanqa. Nirkurnami wayikunatapis chipyaq rupatsiyanqa.
9 “ ‘Noqa Tayta Diosmi nï: Babilonia soldädukuna mana kutiyämunanpä kanqanta ama yarpäyaytsu. Paykunaqa atacayäshunaykipä kutiyämunqami. 10 Tsay soldädukunata wanutsiyaptikipis juk ishkay kawaykar quëdaqkuna antsa kaykarpis toldunkunapita shamurmi kay markata rupatsiyanqa’ ”.
Jeremíasta carcelman wichqanqan
11 Faraónpa soldädunkuna shamuykäyanqanta musyaskir Babilonia soldädukuna aywakuyashqana kaptinmi 12 Jerusalénpita Jeremías yarquykarqan Benjamín particho castankunawan herenciata rakipänakuyänanpä. 13 Benjamín Punku ninqanpa Jerusalénpita yarquykaqtami punku täpaqkunapa capitannin Irías prësu tsarir nirqan: “¡Qamqa Babilonia soldädukunaman takukaqmi aywaykanki!”
(Iríasqa Selemíaspa tsurin y Hananíaspa willkanmi karqan.)
14 Tsaynö niptinmi Jeremías nirqan: “¡Manami Babilonia soldädukunamantsu aywaykä!”
Tsaynö nikaptinpis mana wiyaypami Jeremíasta prësu tsariskir mandaqninkunaman Irías aparqan. 15 Chaykatsiptinmi mandaqkuna pasaypa ajar Jeremíasta maqaykatsir carcelman wichqatsiyarqan. Ñöpataqa tsay cárcel karqan secretariu Jonatánpa wayinmi. 16 Tsay wayi rurin pözuchömi atska junaq Jeremías qaykurarqan.
17 Nirkurmi rey Sedequías palaciunman qayaykatsir Jeremíasta pakayllapa tapur nirqan: “¿Imallataqa Tayta Dios willashushqaykiku?”
Tsaynö tapuptinmi Jeremías nirqan: “Awmi tayta, willamashqami. Babiloniapa mandaqnin reypa munayninchöshi qam kanki”.
18 Nirkurnami rey Sedequíasta Jeremías tapurqan: “Tayta rey, ¿imatatä qampa contrayki rurashqä carcelman wichqatsimänaykipä? Tsaynöpis yanapashuqnikikunapa contran y Judá runakunapa contran ¿imatatä rurashqä? 19 Babiloniapa mandaqnin rey mana atacamänantsikpä kanqanta niq profëtaykikuna ¿maytä? 20 Tayta rey, imanö kaptinpis secretariu Jonatánpa wayincho kaykaq carcelman amana kutitsimaytsu. Tsayman kutitsimaptikiqa wanushächi. Tayta rey, tsaynö rugakunqäta awniykallämay”.
21 Tsaynö rugakuptinmi rey Sedequías awnir ordenarqan palaciupa sawanllanchöna prësu wichqarätsiyänanpä. Tsaynöpami Jeremías prësu wichqararqan palaciupa sawannincho. Nirkurmi Sedequías ordenarqan Jerusaléncho tanta ushakanqanyaq Tanta Ruraqkuna niyanqan cällipita qoyay qoyay juk tantata apapäyänanpä.