Jeremías qellqatsinqan rölluta templucho Baruc liyipanqan
36
Josíaspa tsurin Joacim† chusku watana Judá nacioncho rey kaykaptinmia Jeremíasta Tayta Dios nirqan: 2 “Rey Josías kaykanqan witsanpita hasta kananyaq llapan parlapanqäkunata mushuq rölluman qellqay. Qamta parlaparmi musyatsishqä Israel runakunata, Judá runakunata y wakin nación runakunata castiganäpä kanqantapis. Tsay llapanta mana qonqaypa qellqay. 3 Paykunata castiganäpä kanqanta musyar Judá runakuna capazchi jutsa rurayta kachariyanmanpis. Kachariyaptinqa jutsankunapita perdonashämi”.4 Tsaymi Tayta Dios llapan revelanqanta Neríaspa tsurin Baructa qayaykur mushuq rölluman qellqananpä Jeremías dictarqan. 5 Nirkurnami Baructa Jeremías nirqan: “Musyanqaykinöpis noqataqa Tayta Diospa templunman aywanäta manami munayantsu. 6 Tsaynö kaykaptinqa qamlla aywar Judá runakuna markankunapita templuman ayunaq shayämuptin Tayta Dios imata ninqantapis kay röllupita llapan runakunata liyipanki. 7 Pasaypa rabyanar kay markata castigananpä ninqanqa mantsariypämi kaykan. Tsayta wiyar jutsa rurayanqanta kacharir Tayta Diosta rugakuyaptin capazchi perdonaykunmanpis”.
8 Tsaymi Jeremías ninqannölla templuman aywaykur Neríaspa tsurin Baruc röllucho qellqaraykaqta runakunata liyiparqan. 9 Tsaynö liyiparqan Josíaspa tsurin Joacim pitsqa wata y isqun killana Judá nacioncho rey kaykaptinmi. Tsay witsanmi llapan Judá nacioncho kaykaq markakunapita templuman aywayarqan Jerusaléncho taqkunawan Tayta Diospa ñöpancho ayunayänanpä.
10 Tsaycho qorikäyaptinmi Tayta Diospa templunman Barucpis aywarqan röllucho qellqaraykanqanta liyipänanpä. Chaykurmi secretariu Safánpa† tsurin Gemaríaspa cuartun punkupita llapan runakunata liyiparqan. Tsay cuartu karqan jana kaq patiucho y Mushuq Punku cercanchömi.
11 Tayta Dios ninqanta Baruc liyipanqantami Gemaríaspa tsurin Micaías wiyarqan. Micaíasqa Safánpa willkanmi karqan. 12 Tsayta wiyaykurmi reypa palaciunman aywar yaykurqan secretariupa despächunman. Tsaychömi tarirqan llapan autoridäkuna jamaraykäyaqta. Paykuna kayarqan secretariu Elisama, Semaíaspa tsurin Delaía, Acborpa tsurin Elnatán, Safánpa tsurin Gemarías, Ananíaspa tsurin Sedequías y wakin autoridäkunapis. 13 Paykunatami Micaías willarqan templucho runakunata Baruc imata liyipanqantapis.
14 Willaptinmi autoridäkunaqa Jehudíta kachayarqan Baructa pushamunanpä. Jehudí karqan Netaníaspa tsurin, Selemíaspa willkan y Cusipa shurukta willkanmi. Baruc kaqman chaykurmi nirqan: “Llapan runakunata liyipanqayki rölluta apakurkurshi aywashun”.
Niptinmi liyipanqan rölluta apakurkur autoridäkuna kaqman Neríaspa tsurin Baruc aywarqan.
15 Chaykuptinmi autoridäkuna niyarqan: “Taytay, jamakulläshun. Templucho liyipanqayki rölluta noqakunatapis liyipaykayällämay”. Tsaymi Baruc liyiparqan.
16 Liyipar ushaskiptinmi mantsakashqa rikänakuskir Baructa niyarqan: “Llapan liyipäyämanqaykita reyta musyatsishun”.
17 Rey kaqman manarä aywarmi Baructa tapur niyarqan: “¿Jeremíasku nishurqayki llapan tsaykunata qellqanaykipä?”
18 Barucnami nirqan: “Awmi, pay dictamayllantami rölluman llapanta qellqashqä”.
19 Tsaymi Baructa niyarqan: “Maycho kaykäyanqaykita pipis mana musyayänanpä Jeremíaswan ishkayki pakakuyay”.
Rölluta rey Joacim rupatsinqan
20 Tsaypitanami secretariu Elisamapa despächullancho rölluta churaykur rey kaykanqan patiuman aywayarqan. Chaykurmi willayarqan imata wiyayanqantapis.
21 Willayaptinmi Jehudíta rey kacharqan rölluta apapämunanpä. Tsaymi secretariu Elisamapa despächunpita rölluta apapaskamur reyta y tsaycho kaykaq autoridäkunata liyiparqan.
22 Tsay witsanqa isqun kaq killami karqan. Tamya killa kaptinmi alätsikur sälancho ninata tsarirkatsir mashakur rey kaykarqan. 23 Kimsa o chusku höjatana Jehudí liyiyllantami cuchillunwan rölluta rey roquskir mashakuykanqan ninaman jitarqan. Tsaynö ruraykällarmi llapan rölluta rupatsir usharqan. 24 Liyipanqanta wiyarpis manami rey ni yanapaqninkunapis mantsariyarqantsu ni llakikur latsapankunatapis rachiyarqantsu.
25 Tsay rölluta mana rupatsinanpä Elnatán, Delaía y Gemarías rugayaptinpis rey manami cäsurqantsu. 26 Tsaypa trokinqa tsurin Jerameelta, Azrielpa tsurin Seraíasta y Abdeelpa tsurin Selemíastami kacharqan secretariu Baructa y profëta Jeremíasta prësu tsariyämunanpä. Tsaynö kachaptinpis Tayta Dios pakashqa kaptinmi tariyarqantsu.
Juk rölluchöna qellqananpä Jeremíasta Tayta Dios ninqan
27 Jeremías dictanqan y Baruc qellqanqan rölluta rey rupatsiptinpis yapaymi Jeremíasta Tayta Dios nirqan: 28 “Yapay juk rölluman qellqatsiy Judá nacionpa mandaqnin rey Joacim rupatsinqancho qellqaranqantanölla.
29 “Nirkur rey Joacimta ninki: ‘Tayta Diosmi nin: Tsay röllucho qellqararqan Babilonia nacionpa mandaqnin rey chaykamur kay nacioncho runakunatapis y uywakunatapis ushakätsinanpä kanqanmi. Tsayta wiyar llakikunaykipa trokin ¿imanirtä ajanar tsay rölluta rupatsishqayki?
30 “ ‘Tsaynö rupatsinqaykipitami Tayta Dios kar qamta nï: Qampita aywaraqkuna manami mayqanpis David jamaranqan trönucho mandar jamaranqatsu. Wanukuptiki manami pampayäshunkitsu, tsaypa trokinqa junaqpami achaycho y paqaspanami alaycho ayayki jitaranqa. 31 Qamtapis, tsurikikunatapis, llapan yanapashuqnikikunatapis jutsata rurayanqaykipitami castigayäshayki. Castiganäpä willakatsinqäta wiyayta mana munayaptikipis willakatsinqänöllami Jerusaléncho taqkunata y llapan Judácho taqkunatapis castigashä’ ”.†
32 Tayta Dios tsaynö niptinmi Neríaspa tsurin secretariu Baructa juk röllutana Jeremías kamariparqan yapay qellqananpä. Judá nacionpa mandaqnin rey Joacim rupatsinqan röllucho qellqaranqantanöllami llapanta yapay qellqarqan. Tsay qellqanqanmanpis mas atskatarämi Jeremías yapatsirqan.