Recab casta runakuna cäsukuq kayanqan
35
Josíaspa tsurin Joacim† Judá nacionpa mandaqnin rey kaykanqan witsanmi Tayta Dios nimarqan: 2 “Recab casta runakunata templucho kaykaq juk cuartuman pushaykur vïnuta qaranki”.3 Tsaynö nimaptinmi Recab casta runakunaman aywar tarirqä tocäyü Jeremíaspa tsurin Jaazaníasta, wawqinkunata, tsurinkunata y Recab casta llapan runakunatapis. Jaazaníasqa Habasiníaspa willkanmi karqan. 4 Paykunatami pusharqä Igdalíaspa tsurin profëta Hanánpa discïpulunkuna qorikäyanqan cuartuman. Tsay cuartuqa altuschömi karqan. Mandaqkunapa cuartun ñöpancho y Salumpa tsurin Maasíaspa cuartun jananchömi karqan. Maasíasqa templupa punkun täpaq runami kaykan.
5 Chaykatsirnami järrakunacho y cöpakunachöpis junta vïnuta apamur Recab casta runakunata churaparqä “kay vïnuta upurkuyällay” nir.
6 Tsaynö sirviskiptïmi niyämarqan: “Noqakuna manami vïnuta upuyätsu. Recabpa tsurin unay castäkuna Jonadabmia yätsiyämarqan paypita aywaraqkuna imaypis vïnuta mana upuyänäpä. 7 Tsaynöllami yätsiyämarqan wayïkuna mana rurakuyänäpä, mana murukuyänäpä y üvata mana plantayänäpä. Tsaynöllami yätsiyämarqan puritsina toldukunallacho täyänäpä. Yätsiyämanqanta cäsukurqa atska wata kay patsacho kawayänäpämi niyämashqa.
8 “Tsaymi unay castäkuna Jonadab llapan ninqanta cäsukur kikïkuna, warmïkuna y tsurïkunapis vïnuta upuyätsu. 9 Tsaynöllami wayïkunatapis rurayätsu, chakrayuq kaytapis munayätsu, üvatapis plantayätsu ni chakrakunachöpis murukuyätsu. 10 Toldukunallachömi täkuyä. Unay castäkuna Jonadab ninqannöllami llapanta rurayä.
11 “Tsaynö kaptinpis Babiloniapa mandaqnin rey Nabucodonosor kay nacionta atacaptinmi Jerusalénman shayämushqä. Babiloniab y Siria nación soldädukunapita qeshpimurmi Jerusaléncho kanan taykäyä”.
12 Recab casta runakuna tsaynö niyaptinmi Jeremíasta Tayta Dios nirqan: 13 “Judácho y Jerusaléncho kaykaq runakunata willay: ‘Israel runakunata kuyaq y llapanta mandaq Tayta Diosmi nin: Tantiyakuyänaykipä kanan ninqäta shumaq wiyakuyay. 14 Vïnuta mana upuyänanpä tsurinkunata Jonadab yätsinqanta cäsukurmi kananyaqpis paypita aywaraqkuna upuyantsu. Qamkunaqa unaypita patsa kutin kutin willakuykaptïpis manami cäsukayämankitsu.
15 “ ‘Willayäshunaykipämi sirvimaqnï profëtakunata unaypita patsa kutin kutin kachamushqä. Ninqäta willayäshurnikimi niyäshurqayki mana allikunata mana rurayänaykipä y juk dioskunata mana adorayänaykipä. Tsaynöllami niyäshurqayki jutsa ruraykunata jaqirir unay castaykikunata y qamkunata rikatsinqä nacioncho kawayänaykipä kanqanta. Profëtakunawan tsaynö willaykätsiptïpis manami cäsukayämashqaykitsu. 16 Recabpa tsurin Jonadabpita aywaraqkunaqa unay castan yätsinqankunata cäsukuyanmi. Kuyanqä runakunami itsanqa ni imanöllapis ninqäkunata cäsukayämantsu.
17 “ ‘Israel runakunata kuyaq y llapanta mandaq Tayta Dios karmi nï: Judá runakunata y Jerusaléncho taq runakunata parlapaptïpis manami cäsukayämantsu. Ni tantiyatsiptïpis manami wiyakayämantsu. Mana wiyayämaptinmi castiganäpä ninqänölla pasaypa ñakaykunawan castigashä’ ”.