Rey Sedequías imanö wanunanpä willanqan
34
Jerusalén markata y entëru Judá nacioncho kaykaq markakunata Babilonia nacionpa mandaqnin rey Nabucodonosor soldädunkunawan y munaynincho kaq nacionkunapa soldädunkunawan atacaykaptinmi Jeremíasta Tayta Dios nirqan:† 2 “Israel runakunata kuyaq Tayta Dios karmi nï: Judá nacionpa mandaqnin rey Sedequíasta willar niy: ‘Tayta Diosmi nin: Kay markata Babilonia nacionpa mandaqnin reypa munayninman churaptïmi llapanta rupatsiyanqa. 3 Qamqa manami imanöpapis qeshpinkitsu. Tsaypa trokinqa prësu tsariskir paypa makinman entregayäshuptikimi juzgashunki. Nirkurmi Babiloniaman prësu apayäshunki.4 “ ‘Judá nacionpa mandaqnin rey Sedequías, tsaynö kananpä kaptinpis noqa Tayta Diosmi nikä guërracho mana wanunaykipä kanqanta. 5 Tsaypa trokinqa awkinyar alli wanuypami wanunki. Wanuptikiqa unay castayki reykunata pampayanqannömi qamtapis inciensiuwan qoshnitsir pampayäshunki. Waqarmi “¡ay taytallay tayta!” niyanqa. Tsaynö kananpä kanqanta noqa Tayta Diosmi nï’ ”.
6 Tayta Dios ninqannöllami Judá nacionpa mandaqnin rey Sedequíasta profëta Jeremías Jerusaléncho willarqan. 7 Tsay hörami Babilonia nacionpa mandaqnin rey soldädunkunawan Jerusalénta atacaykäyarqan. Tsaynöllami atacaykäyarqan Laquis markatapis y Azeca markatapis. Judá nacioncho wakin corralashqa markakunataqa maynami vinciyarqan. Jerusalén, Laquis y Azeca markakunatami itsanqa vinciyarqanrätsu.
Hebreo mayinkunata wätay kayanqanpita kachäyanqan
8 Kaychömi qellqaraykan profëta Jeremíasta Tayta Dios willanqan. Tsay witsanmi Jerusaléncho taq runakunawan rey Sedequías willanakuyarqan hebreo mayinkunata ollqutapis warmitapis wätay kayanqanpita kachäyänanpä. 9 Tsaymi niyarqan kachäyaptin wätaynin kananpä pipis manana tsararänanpä. 10 Tsaynö willanakurmi llapan autoridäkuna y llapan runakunapis wätaykunata kachäyarqan. 11 Tsaypita tiempu päsaskiptinnami kachäyanqanpita pësakur wätaykunata ollqutapis warmitapis yapay qoriyarqan.
12 Tsaymi Jeremíasta Tayta Dios nirqan: 13 “Israel runakunata kuyaq Tayta Dios karmi nï: Unay castaykikuna Egiptucho wätay kayanqanpita jipimurmi paykunawan pactuta rurarqä. Pactuta rurarmi nirqä 14 wätay kayänanpä rantiyanqan hebreo mayinkunata soqta wata tsararaskir cada qanchis watacho libri kachäyänanpä.† Tsaynö nikaptïpis unay castaykikuna manami wiyakayämashqatsu.
15 “Qamkunaqa ninqäta wiyakurmi hebreo mayiki kaq wätaynikikunata kachäyashqayki. Tsaynö kachäyänaykipämi adorayämänayki templuman yaykur ñöpächo willanakuyashqayki. 16 Tsaynö willanakuykarpis qamkunaqa yapaymi wätayniki kayänanpä ollquta warmitapis qoriyashqayki. Kachäyänaykipä ñöpächo willanakurpis yapay qorirmi penqakuyman churayämashqayki.
17 “Noqa Tayta Diosmi nï: Qamkunaqa marka mayikikunata libri kachäyänaykipä ninqäta manami wiyakayämashqaykitsu. Tsaymi kananqa qamkunata kachariyäshayki. Kachariptïmi wakinniki guërracho wanuyanki, wakinniki mallaqaywan wanuyanki y wakinnikinami pesti qeshyawan wanuyanki. Tsayta musyarmi maytsay nacioncho taq runakunapis mantsariyanqa. Noqa Tayta Diosmi tsaynö nï.
18 “Marka mayikikunata libri kachäyänaykipämi ñöpächo pactuta rurayashqayki. Tsay pactuta rurarmi torïtuta pullanpa cuartizaykur aytsanta frenti frenti churayashqayki. Nirkurmi tsay churayanqayki aytsakunapa chawpinpa päsayarqayki ‘noqakunatapis ishkayman roquqnö castigayämätsun awniyanqäta mana cumpliyaptï’ nir. Tsaynö niskirpis mana cumpliyanqaykipitami kanan castigayäshayki.
19 “Aytsakunapa chawpinpa päsarnin awnimarpis mana cumpliyanqaykipitami castigayäshayki Judá nacionpa autoridäninkuna kayaptikipis, Jerusalén markapa autoridäninkuna kayaptikipis, reypa yanapaqninkuna kayaptikipis, sacerdötikuna kayaptikipis y pï kayaptikipis.† 20 Castigarmi kamakätsishä contraykikuna wanutsiyäshunaykipä. Wanushqa mashtaräyaptikimi wiskurkunawan jirka uywakuna mikuyäshunki.
21 “Qamkunata castiganqänöllami Judá nacionpa mandaqnin rey Sedequíastawan yanapaqninkunatapis castigashä. Castigarmi kamakätsishä Babilonia nacionpa mandaqnin reypa y soldädunkunapa munaynincho kayänanpä. Tsay rey atacaskishurniki witikushqana kaptinpis† 22 yapay atacayäshunaykipämi kutitsimushä. Vinciyäshurnikimi wayikikunatapis kayar ushayanqa. Llapan Judácho kaq markakunatapis ushakätsiyaptinmi tsunyaq rikakunqa. Noqa Tayta Diosmi tsaynö nï”.