Kuyanqan runakunata Tayta Dios yanapananpä ninqan
33
Palaciupa patiuncho Jeremías jinallarä prësu kaykaptinmi Tayta Dios yapay nirqan: 2 “Patsata kamaq y shumaq kananpä kamakätsiq Tayta Dios karmi nï: 3 Mañakamay. Mañakamaptikiqa wiyashaykimi. Mana tantiyanqayki kaqkunatami tantiyatsishayki.4 “Israel runakunata kuyaq Tayta Dios karmi nï: Jerusalén runakunaqa wayikunata juchutsirmi rumikunata y qerukunata murälla chakinkunaman qotuyashqa. Tsaynöllami reypa wakin wayinkunatapis juchutsir murälla chakinkunaman qotuyashqa. Tsaynö rurayashqa Babilonia soldädukuna marka murällata mana juchutsiyänanpämi. 5 Murällata tsaynö sigurar Babiloniaa soldädukunata ichipäyaptinpis paykunawan pasaypa rabyanashqa karmi washäkuyänanpä yanapashätsu. Tsaymi tsay soldädukuna markaman yaykur runakunata atskata wanutsiyanqa. Wanutsiyaptinmi maynin tsaylächo ayakuna jitaräyanqa. Tsaynö kayanqa jutsata rurayanqanpita castigaptïmi.
6 “Tsaynö ushakätsiyaptinpis watakuna päsaskiptinqa qeshyaykaqta jampir alliyätsiqnömi imaypis añawna kawayänanpä yanapashä. 7 Tsaymi juklä nacionkunacho täyanqanpita Judá runakunata y Israel runakunata nacionninman kutitsimushä. Unay kawayanqannö tsaycho yapay añaw kawayänanpämi yanapashä. 8 Mana cäsukamar conträ rikakuyanqanpita y jutsata rurayanqanpitami perdonashä. Jutsaynaq kayänanpämi llapan jutsa rurayanqanta mayllashä. 9 Jerusalén runakunata yanapanqäta musyarmi llapan nación runakuna espantashqa rikakuyanqa. Añaw kawayänanpä yanapaptïmi entëru patsacho taqkuna kushikur alabayämanqa”.
10 Tayta Diosmi nin: “Qamkunaqa nikäyanki kay particho runapis y uywapis wallkaqllana kaptin tsunyaqnölla kanqantami. Niyanqaykinöllami Judá markakunachöpis y Jerusalén cällikunachöpis runakuna ni uywakunapis kayannatsu. 11 Tsaynö kaptinpis kushikuyanqan y asikuyanqanpis yapaymi wiyakanqa. Majatsakay fiesta kaptinmi kuyanqan jipashta chölu cantapanqa y jipashpis kuyanqan chöluta cantapanqa. Runakunapis yapaymi niyanqa:
“ ‘¡Allillata ruraq kanqanpita llapanta mandaq Tayta Diosta agradëcikushun!
¡Kuyakuq kayninqa imaypis manami ushakantsu!’†
“Agradëcikamar templüman ofrendata yapaymi apayämunqa. Ñöpata kayanqannö yapay kayänanpämi kuyanqä runakunata juklä nacionkunacho täyanqanpita nacionninman qorimushä. Noqa Tayta Diosmi tsaynö nï”.
12 Llapanta mandaq Tayta Diosmi nin: “Llapan kay nación markakunacho runa mana kaptinpis y uywakuna mana kaptinpis yapaymi uywankunata mitsikuyanqa. 13 Jallqakunacho kaykaq markakunachöpis, Sefelacho kaykaq markakunachöpis, Neguevcho kaykaq markakunachöpis, Benjamín partichöpis, Jerusalén ñöpankunachöpis y llapan Judá nacionchöpis yapaymi rikayanki üshankunata yupaykäyaqta. Noqa Tayta Diosmi tsaynö nï”.
David casta reykuna imaypis kayänanpä ninqan
14 Tayta Diosmi nin: “Tiempu chämunqami Israel runakunatawan Judá runakunata awninqänölla yanapanäpä. 15 Tsay witsanmi David castapita Renuevo niyanqan runata churashä rey kananpä. Munanqänö mandarmi kay nacioncho pïmaytapis alli rikanqa. 16 Tsay witsanmi Jerusaléncho y llapan Judácho añaw kawayanqa. Tsaymi Jerusalén markapa jutin kanqa Tayta Diosmi Salvamaqnintsikb”.†
17 Tayta Diosmi nin: “Davidpita aywaraq runami imaypis Israel runakunapa mandaqnin rey kanqa.† 18 Sacerdötikuna y levitakuna imaypis kayanqami altarnïcho rupatsina sacrificiuta, tsaki mikuy ofrendata y wakin sacrificiutapis qoyay qoyay rupatsiyänanpä”.†
19 Mastami Jeremíasta Tayta Dios nirqan: 20 “Noqa Tayta Diosmi nï: Paqaswan y junaqwan pactu ruranqäta cumplirmi rupayta imaypis yarqatsimü y jeqatsï. Tsay pactuta imaypis cumplinqänömi 21 sirvimaqnï Davidwan pactu ruranqätapis† cumplishä. Cumpliptïmi paypita aywaraqkuna imaypis rey kayanqa. Tsaynöllami imaypis cumplishä levitakunawan y sacerdötikunawan pactuta ruranqäta. Paykunawanmi pactuta rurarqä imaypis sirviyämänanpä.† 22 Qoyllurkuna yupaytapis mana atipaypä kanqannö y lamar kuchuncho aqushapis yupayta mana atipaypä kanqannömi sirvimaqnï Davidpita aywaraqkuna y sirvimaqnï levitakunapis kayanqa”.
23 Mastami Jeremíasta Tayta Dios nirqan: 24 “¿Tantiyankiku akranqä Israel y Judá runakunata kacharinqäpita runakuna parlayanqanta? Tsaynö parlarmi manakaqman churar naciontanönatsu rikayan. 25 Paqaswanpis junaqwanpis pactuta ruraq Tayta Dios kar y ciëlupäpis kay patsapäpis leyta churaq Tayta Dios karmi nï: 26 Jacobpita y sirvimaqnï Davidpita aywaraqkunatami imaypis yanapashä. Davidwan pactuta ruranqäta cumpliptïmi paypita aywaraqkuna imaypis rey kayanqa. Tsaymi Abrahampita, Isaacpita y Jacobpita aywaraq runakunapa mandaqnin rey imaypis kayanqa. Paykunata kuyaparmi juklä nacioncho taykäyanqanpita nacionninman kutitsimushä”.