Chakrata Jeremías rantinqan
32
Kaychömi qellqaraykan Jeremíasta Tayta Dios ninqan. Tsay witsanqa Sedequías chunka watanami Judá nacionpa mandaqnin rey kaykarqan.† Nabucodonosornami chunka puwaq watana Babiloniapa mandaqnin rey kaykarqan.2 Tsay junaqkunami Babilonia nacionpa mandaqnin reypa soldädunkuna Jerusalénta jiruruypa tsaparaykäyarqan. Jeremíasnami reypa palaciunpa patiuncho prësu wichqaraykarqan. 3 Tsaycho prësu wichqaränanpä tsariskatsirmi rey Sedequías ajash nirqan: “¿Imanirtä Tayta Diospa jutincho willakur nikanki Jerusalénta Babiloniapa mandaqnin rey vincinanpä kanqanta? 4 Tsaynöpis ¿imanirtä nikanki Babilonia soldädukuna prësu tsariyämar mandaqnin reyman entregayämaptin urku urku tinkuyänäpä kanqanta? 5 Tsaynöllami nikanki Babiloniaman prësu apayämaptin Tayta Dios munanqanyaq tsaycho tsararäyämänanpä kanqanta. ¿Imanirtä Tayta Diospa jutincho nikanki Babiloniaa soldädukunata ichiparpis mana vincinantsikpä kanqanta?”
6 Tsay witsanmi Tayta Dios nimarqan: 7 “Tiyuyki Salumpa tsurin Hanameelmi shamur nishunki: ‘Anatotcho kaykaq chakräta rantikuykushayki. Legïtimu castä kaptikimi qamta tsay chakra conviënishunki’ ”.
8 Tayta Dios nimanqannöllami prïmü Hanameel palaciupa sawannincho prësu kaykanqäman watukamaq shamur nimarqan: “Anatotcho kaykaq chakräta rantikuykushayki. Legïtimu castä kaykarqa juklla rantiy ari”.
Tsaynö nimaptinmi tantiyarqä rantinäpä Tayta Dios kamakaykätsinqanta. 9 Tsaymi prïmü Hanameelpa chakranta rantir chunka qanchis qellayta pägarqä. 10 Manarä pägarmi papelta ruraskatsir tsayman firmar sellarqä. Tsaynöllami testïgukunatapis firmatsirqä. Nirkurnami aykatapis päganäpä parlayanqänölla pägarqä.
11 Ruratsinqä papelta pipis llutalla mana kichananpämi cërawan sigurapämarqan. Copia kaq papelmi itsanqa siguranni karqan. Ishkan papelkunatami 12 Neríaspa tsurin y Maasíaspa willkan Baructa entregarqä. Tsaynö entregarqä prïmü Hanameelpa ñöpancho, firmaq testïgukunapa ñöpancho y patiucho kaykaq Judá runakunapa ñöpanchömi.
13 Paykuna wiyaykäyaptinmi Baructa nirqä: 14 “Israel runakunata kuyaq y llapanta mandaq Tayta Diosmi nin: ‘Chakrata rantir ruratsinqan papel copiantin atska wata churararpis mana ismunanpä mitu mankaman churay. 15 Kay nacionchöqa yapaymi chakrata, wayita y üva chakratapis rantiyanki y rantikuyankipis. Israel runakunata kuyaq y llapanta mandaq Tayta Dios karmi tsaynö nï’ ”.
Tayta Diosta Jeremías mañakunqan
16 Neríaspa tsurin Baructa tsay papelkunata entregaykurmi Tayta Diosta mañakur nirqä:
17 “Tayta Dios, qamqa munayyuq karmi ciëlutapis kay patsatapis kamarqayki. Qampäqa manami imapis ajatsu. 18 Cäsukushuqnikikunataqa maytsikaq kayaptinpis kuyankimi. Jutsa rurayta mana jaqiriqkunatami itsanqa kikinta y tsurinkunatapis castiganki. Munayyuq Tayta Diosmi kanki. Jutikiqa llapanta mandaq Yahwehmi. 19 Qam yarpanqaykikunaqa mana kamäpakuypämi. Llapan ruranqaykikunapis pasaypa allimi. Rikaykankimi runakuna imata rurayanqantapis. Tsaymi imatapis rurayanqanman tupu yanapanki o castigankipis.
20 “Egiptupita Israel runakunata jipimurmi qamqa mantsakaypä kaqkunata rurashqayki. Tsaynöllami kananpis kay nacioncho y maytsay nacionkunachöpis mantsakaypä kaqkunata ruraykanki. Tsaymi munayyuq kanqaykita pïmaypis parlayan. 21 Pasaypa munayyuq karmi mantsakaypä kaqkunata rurarnin Egiptupita kuyanqayki unay castäkunata jipimurqayki. Imaypis mana rikayanqanta ruraptikimi llapan runakuna pasaypa mantsariyarqan. 22 Nirkurnami awninqaykinölla kay nacionta entregaykurqayki. Kaychöqa lichipis abëjapa mishkinpis yakunörämi atska kaykan.
23 “Tsaynö kaptinpis kay nacioncho täkurnami cäsukuyäshurqaykitsu. Leynikikunatapis manami cumpliyarqannatsu. Ninqaykita manami imatapis rurayarqannatsu. Tsaynö kayaptinmi paykunata kanan castigaykanki.† 24 Tsaymi Babilonia soldädukuna kay markaman yaykayämunanpä murälla waqtankunapa allpata qotuyashqa. Markata jiruruparäyämuptinmi runakuna yarquyta mana kamäpakur wakinkuna mallaqaywan wanuyanqa y wakinkunana pesti qeshyawan wanuyanqa. Babilonia soldädukuna markaman yaykayämuptinnami wakin runakuna guërracho wanuyanqa. Tsaynö vinciyämarmi munaynincho katsiyämanqa. Kay markata ima päsananpä kanqantapis ninqaykinöllami kanan päsaykan.
25 “Tayta Dios, ¿Babilonia soldädukunapa munaynincho kay marka kananpä kaykaptinku testïgukunapa rikanancho chakrata rantinäpä nimashqayki?”
Jerusalénta Babilonia runakuna munaynincho katsiyänanpä ninqan
26 Tsaynö nir mañakuptïmi Tayta Dios nimarqan: 27 “Noqaqa llapan kawaqkunapa Tayta Diosninmi kaykä. Tsaymi noqapäqa imapis ajatsu.† 28 Babilonia nacionpa mandaqnin rey Nabucodonosorpa y soldädunkunapa munayninmanmi kay markata churashä. Paykunami munaynincho tsararäyanqa.†
29 “Tsaymi Jerusalén markata jiruruparaykämuq Babilonia soldädukuna yaykayämurnin wayikunata rupatsir ushayanqa. Tsaynöllami wayikuna jananchob Baalta adorar inciensiu qoshnitsikuyänankunatapis rupatsir ushayanqa. Tsay wayikunachömi Jerusalén runakuna pasaypa ajanätsimar juk dioskunata adorar vïnutapis jichayarqan. Tsay wayikunaqa llapanpis ruparmi ushakäyanqa.
30 “Noqa Tayta Diosmi nï: Unaypitami Israel runakunawan Judá runakunaqa mana munanqäkunallata rurayashqa. Ïdulukunata ruraykur adorarninmi pasaypa ajanätsiyämashqa. 31 Kay markacho täyanqan junaqpita patsami pasaypa ajanätsiyämashqa. Tsaymi chipyaq ushakätsishä 32 llapanpis jutsata rurar ajanätsiyämanqanpita. Tsaynö ajanätsiyämashqa Israel runakuna, Judá runakuna, Jerusaléncho taqkuna, mandaqnin reykuna, autoridäninkuna, sacerdötinkuna y profëtankunapis. 33 Paykunaqa manami imapäpis cuentayämashqatsu. Unaypita patsa kutin kutin yachaykätsiptïpis y jutsa rurayta jaqiriyänanpä nikaptïpis manami wiyakuyashqatsu.
34 “Adorayämänan templutapis manakaqman churarmi ïdulukunata tsayman churayashqa. 35 Ben-hinom raqracho† altarkunata rurarmi Baal diosta adorayashqa. Moloc diostapis adorarmi† tsay altarkunacho ollquta warmitapis tsurinkunata rupatsiyashqa. Tsayta rurayänanpä manami nirqätsu ni yarpayllapis yarparqätsu. Tsaynö rurarninmi llapan Judá runakunata jutsata ruratsiyashqa.
Nacionninkunaman kutitsimunanpä ninqan
36 “Qamkunami nikäyanki kay markacho wakin runakuna guërracho wanuyänanpä kanqanta, wakinkuna mallaqaywan wanuyänanpä kanqanta y wakinkunana pesti qeshyawan wanuyänanpä kanqanta. Tsaynöllami nikäyanki Babilonia nacionpa mandaqnin rey vinciskir munaynincho katsiyäshunaykipä kanqanta.
“Israel runakunata kuyaq y llapanta mandaq Tayta Dios karmi nï: 37 Niyanqaykinöllami kanqa. Pasaypa ajanarmi maytsay nacionkunaman qarquyäshayki. Tsaynö kaptinpis qamkunapita aywaraqkunatami tsay nacionkunapita kutitsimushä. Kay nacionman kutiskatsimurnami paykunata yanapashä añaw kawayänanpä. 38 Paykunami kuyanqä runakuna kayanqa. Noqanami paykunapa Diosnin kashä. 39 Shonqunkunamanmi alli yarpayta churashä imaypis mantsapakamar munanqänö kawayänanpä. Tsaynöpami kikinkunapis y tsurinkunapis alli kawayanqa.
40 “Paykunawanmi pactuta rurashä imayyaqpis yanapanäpä. Tsaynöpis paykunapa shonqunkunamanmi alli yarpayta churashä imayyaqpis noqallatana sirviyämänanpä.† 41 Alli kawayänanpämi kushishqa yanapashä.† Llapan shonqüwan kuyarnïmi plantata plantaqnö paykunata kay nacioncho tsararäshä. Tsay ninqätaqa cumplishämi. 42 Qamkunata castiganäpä ninqäta y yanapanäpä ninqätapis cumplishämi. Noqa Tayta Diosmi tsaynö nï.
43 “Qamkuna nikäyanki kay nación tsunyaqlla kananpä kanqanta y runapis ni uywapis manana kananpä kanqantami. Tsaynöllami nikäyanki Babilonia soldädukuna munaynincho tsararäyäshunaykipä kanqanta. Niyanqaykinöllami rasunpaypa kanqa. Tsaynö kaptinpis noqami nï kay nacioncho runakuna yapay chakrayuq kayänanpä kanqanta. 44 Juklä nacionkunacho täyanqanpita kay nacionman kutitsimuptïmi chakrata yapay rantiyanqa y rantikuyanqa. Rantikurmi papelta ruratsirnin autoridäwan sellatsiyanqa. Testïgukunawanpis firmatsiyanqa. Tsaynö rurayanqa Benjamín particho, Jerusalén ñöpankunacho, entëru Judá nación markakunacho, jallqakunacho, Sefelacho kaykaq markakunacho y Neguev markakunachöpis. Noqa Tayta Diosmi tsaynö nï”.