Isaías qellqanqan witsanmi Asiria nación runakuna Judá nacionta munaynincho tsararayta munayarqan. Tsaymi capïtulu 1-pita 39-yaq profëta Isaías qellqarqan jutsa rurayninkunata kacharir Tayta Diosllaman yärakuyänanpä kanqanta.

Isaíastami Tayta Dios revelarqan watakuna päsaptin Babilonia nacionpita soldädukuna shamur Jerusalénta ushakätsiyänanpä y wakin runakunata Babiloniaman apakuyänanpä kanqanta. Tsaymi capïtulu 40-pita 55-yaq Isaías musyatsirqan mana llakikuyänanpä kanqanta y Judá nacionman kutiyänanpä kanqanta. Tsaynöpis musyatsirqan juk salvakuqta Tayta Dios kachamunanpä kanqantami (Isa. 44.1-9; 52.13—53.12).

Capïtulu 56-pita 66-yaqmi Isaías qellqarqan Judáman kutiq runakuna Tayta Dios munanqannö kawayänanpä kanqanta. Tsaynöpis qellqarqan mushuq patsa kananpä kanqantami (Isa. 65.17-25).