Jipash:
8
¡Ima allirä kanman mamäpa chuchunta chuchur qeshpiq turï kaptiki!Tsaynö kaptinqa cällicho tinkur mutsaptïpis manami pipis jamurämanmantsu.
2 Makipita janchakurkurmi mamäpa wayinman pushäman.
Tsaychömi kuyakuq kayta yachatsimankiman.
Granädapita qaptsish yakunwan tallurkurmi noqapis allinnin kaq vïnuta qaräman.a
3 Ima allirä kanman itsuq kaq rikraykita jawnatsimaptiki.
Ima allirä kanman derëcha kaq rikraykiwan makallarkamaptiki.
Chölu:
4 Jerusalén jipashkuna, awniykayällämay kuyanqä jipash punukuykaqta mana rikchatsiyänaykipä.
Punuyta jimanqanyaq punukutsun.
Soqta kaq cantu
Yanasankuna:†
5 ¡Rikayay!
¡Tsunyaq jirkapita jipash shamuykan kuyayninta makallashqa!
Chölu:
Manzäna munti chakincho punukuykaqtami qamta rikchatsishqä.b
Tsaychömi mamayki qeshyaq rikakushqa.
Tsaychömi mamaykita qeshyakuy nanay tsarishqa.
Jipash:
6 Imaypis yarparämänaykipä shonquykiman churaykallämay.
Mana qonqamänaykipä rikraykimanpis jutïta qellqaykullay.
Kuyanakuytaqa wanuytanö manami pipis tsapantsu.
Wayllunakuypitapis sepultürapitanö manami qeshpintsiktsu.
Kuyanakuyqa Tayta Diospita shamuq nina karmi imaypis upintsu.
7 Kuyanakuytaqa manami ni lamarpis ni mayupis upitsiyta puëdintsu.
Jaqinakunanpä imaykayuq runa llapan riquëzankunata munatsiptinpis manami chaskinqatsu.
Jipashpa turinkuna:
8 Panintsikpaqa chuchunpis manarämi mukllunrätsu.
Pipis payta ashiq shamuptinqa ¿imatatä nishun?
9 Panintsik murällanö kaptinqa qellaypita palaciuta ruratsiqnömi adornashwan.
Adornanni punkunö kaptinqa cedru tablakunawan adornaqnömi adornashwan.
Jipash:
10 Noqaqa murällanörämi kaykä.
Chuchükunapis rikachakuna törrikunanörämi.
Kuyaynïpa lädunchöqa pasaypa kushishqami kaykä.
11 Baal-hamónchömi Salomónpa üva chakran karqan.
Tsay chakrantami arrendakurqan.
Cada wata cosëchata ushaskirmi cada ünunkuna juk waranqa (1,000) qellayta arriendunpita pägayaq.
12 Salomón, tsay runakunapita juk waranqa qellayta chaskiptikipis
y chakra rikaqkunata ishkay pachak (200) qellayta pägaptikipis
noqaqa üva chakräta kikïmi rikakü.c
Chölu:
13 Jardinkunacho jamakuq reina, amïgükuna maya mayallami kaykäyan parlanqaykita wiyayänanpä.
Noqapis wiyanäpä imallatapis parlarkallämuy.
Jipash:
14 Kuyaynï, lluytsunö o tarushnö karpis mushkuykaq jirkakuna jananpa cörrimuy.d