Chölu:
7
(2) Reypa tsurinnörä jipash, sandaliaykita jatikuskiptiki chakikipis kuyayllapämi.Adornu rurayta yachaqkuna rurayanqan adornunömi tseqllaykipis kuyayllapä.
2 (3) Pupuykipis alli vïnu juntaraykaq cöpanömi.
Pachaykipis liriu waytawan entëru kuchunpa tsapashqa trïgu qoturaykaqnömi.
3 (4) Chuchuykipis kuyayllapä millish lluytsu mallwakunanömi.†
4 (5) Kunkaykipis marfilpita rurashqa törrinömi kuyayllapä.
Ñawikipis Hesbón markacho kaykaq Bat-rabim punku ñöpancho ishkay yaku estanquinömi.
Senqaykipis Damascuman rikaraykaq Líbanucho kaykaq törrinömi kuyayllapä.
5 (6) Umaykipis Carmelo jirkanömi kuyayllapä.
Aqtsaykipis fïnu jïlunö karmi reytapis löcutätsin.
6 (7) Kuyay jipashnï, qamqa kanki pasaypa kuyayllapämi.
Mana kachaypa kuyakuyllapämi kaykanki.
7 (8) Palma jacha ichiraykaqnömi kuyayllapä jatunkaray kaykanki.
Chuchuykipis kaykan palma jachapa wayuynin warkuraykaqnömi.
8 (9) Wayuyninta pallakurkunäpä palma jachamanmi witsayta munä.
Tsaychömi tarishä sartanpa üvanö chuchuyki kaykaqta,
jamayniki poqushqa manzänanö mushkuykaqta
9 (10) y shimiki allinnin vïnunö pasaypa mishkiykaqta.
Mutsamaptikimi vïnuta upuptï kirüpa y qallüpa mishkir päsarpuqnö gustun kaykan.
Jipash:
10 (11) Noqaqa kuyaynïllapämi kaykä.
Paypis ñöpallächo kaytami munan.
11 (12) Kuyaynï, markapita juklla yarqushun.
Kuyayllapä mushkuq waytakunapa chawpincho warämushun.
12 (13) Patsa waraskiptinnami üva chakrakunaman aywashun.
Tsaychömi rikamushun mä üvakuna maynakush wayuykäyan y granädapis maynakush tukturaykäyan.
Tsaycho munanqaykita yawatsirmi kuyanakushun.
13 (14) Tsaychömi mandrägoraspa mushkuyninpis mushkuykan.
Tsaychöqa tukuyläya frütakunami kaykan.
Kuyaynï, reqinqayki y mana reqinqayki frütakunatapis tsaychömi yawatsishayki.a