Yanasankuna:
6
Pïmaypitapis mas kuyayllapä jipash, ¿maypatä kuyanqayki chölu aywashqa?¿Maypatä aywanan kashqa?
Willayämay ashiq aywayänapä.
Jipash:
2 Kuyaynïqa huertanmanmi urashqa.
Mushkuykaq wayta huertanmanmi yaykushqa.
Huertakuna kaqcho mikunanpämi aywashqa.
Tsaychömi liriu waytakunata pallanqa.a
3 Kuyamaqnïqa noqallatami kuyaman.
Noqapis payllatami kuyä.
Payqa liriu waytakuna kaqchömi mitsikun.
Pitsqa kaq cantu
Chölu:†
4 Kuyaynï, qamqa Tirsa markanöpis y Jerusalén markanöpis kuyayllapämi kaykanki.
Atska soldädukuna pelyaman aywayanqan almiraypä kanqannömi kuyayllapä kanqaykipis almiraypä kaykan.
5 Amana rikapämaynatsu.
Rikapämarninqa löcutätsimankimi.
Aqtsaykipis atska kapishkuna Galaad jirkakunapa pañar puriqnörämi.
6 Kiruykikunapis majädacho tsayrä bäñatsishqa yuraq üshakunanömi kaykan.
Majanpa majanpami kuyayllapä.
Manami ni jukllayllapis pishintsu.†
7 Shukutaranqayki rurincho qaqllaykipis granädanörämi ishkanlä kuyayllapä pukaraykan.
8 Reypa soqta chunka (60) warminkuna kayaptinpis
puwaq chunka (80) concubïnankuna kayaptinpis
y yupaytapis mana atipaypä jipashninkuna kayaptinpis
9 kuyanqä palumallämi llapanpitapis mas kuyayllapä kaykan.
Paytami mamanpis pasaypa kuyan.
Jipashkunapis kuyayllapä kanqanta rikarmi alabayan.
Reypa warminkunapis y concubïnankunapis alli warmi kanqantami parlayan.
Yanasankuna:
10 Manami pipis kantsu kuyanqayki jipashnöqa.
Waraq lucëru atsikyaqnö y killa kuyayllapä kanqannömi kaykan.
Rupay chipipiykaqnömi kuyayllapä kaykan.
Atska soldädukuna pelyaman aywayanqan almiraypä kayanqannömi kuyayllapä kanqanpis almiraypä kaykan.
Chölu:
11 Nuwal jachakuna kaykäyanqan jardinmanmi yaykushqä.b
Tsayman yaykushqä mayu kuchun patsa verdiraykaqta rikanäpä,
üva sheqlliraykaqta rikanäpä
y granäda tukturaykaqta rikanäpämi.
12 Jardincho pasaypa kushikurmi illaqpita rikakushqä reypa carrëtancho kaykaqnörä.
Yanasankuna:
13 (7.1) ¡Kutikamuy, Sulamita, kutikamuy!
¡Qamta rikaytami munayä!
¡Kutikamuy! ¡Kutikamuy!
Jipash:
¿Imanö kaykaqtatä rikayämayta munaykäyanki?
Yanasankuna:
¡Campamentucho tushuykaqtanömi rikayta munayä!