Chölu:
5
Kuyay warmillä, jardinnïchönami kaykä.Qoriykämi mïrra perfümitawan kuyayllapä mushkuq waytakunatapis.
Panalnincho kaykaq mishkitapis yawaykänami.
Lichitapis vïnutapis upuykänami.
Yanasankuna:
Amïgukuna, jimayanqaykiyaq mikuyay, upuyay.
Chusku kaq cantu
Jipash:
2 Punurpis maya mayallami punuykarqä.
Tsaynö punuykanqächömi kuyaynï qayakamuqta wiyarqä.
Chölu:
¡Kuyayllapä palumita, punkuykita kichapaykallämay!
¡Umäpis shullyashqami kaykan!
¡Paqas shullya yakumi umäpitapis jutuykan!a
Jipash:
3 Latsapätapis jipikushqänami.
¿Yapaytsurä jatiküman?
Chakïtapis mayllakushqänami.
¿Yapaytsurä iskatäman?
4 Kuyanqä chöluqa makinta jatimurqan punku uchkunpami.b
Makinta jatimuptinmi shonqüpis tiktikyarqanrä.
5 Pasaypa kuyarmi punkuta kichapänäpä juklla shärirqä.c
Makïpitapis dëdükunapitapis mïrra perfümimi punkupa trancanmanpis juturqan.d
6 Punkuta kicharinäpäqa kuyanqä chölu manami kanänatsu.
Aywakushqa kaptinmi pasaypa llakikurqä.
Ashirpis manami tarirqätsu.
Qayakuptïpis manami contestamarqantsu.
7 Tsaynö ashir puriykaptïmi tariyämarqan marka täpaq runakuna.
Paykunami maqayämar yawarllatana rurayämashqa.e
Shukutaranqä jakütapis qechuyämashqami.
8 Jerusalén jipashkuna, qamkunatami rugakü.
Kuyanqä chöluta rikarninqa willaykuyällay paypä llakikur qeshyaykanqäta.
Yanasankuna:
9 Pïmaypitapis mas kuyayllapä jipash, ¿imanirtä tsay chöluta tsayjinanpa kuyaykunki?
Tsaynö yätsiyämänaykipäqa ¿imanö kaptintä tsayjinanpa kuyaykunki?
Jipash:
10 Kuyanqä chöluqa kamaraqllami kaykan.
Chunka waranqa (10,000) runakunapa chawpincho karpis payqa reqipallami.
11 Umanpis qorinömi kuyayllapä.
Qoshpu aqtsanpis cuervunöf yanami.
12 Ñawinkunapis shumaq kuyayllapämi.
Lichiwan bäñakushqa pözu kuchuncho ishkay paluma jamaraykaqnömi ñawinkuna kaykan.
13 Qaqllanpis mushkuq waytakuna jardincho waytaraykaqnömi.
Shiminpis liriu waytapita mïrra perfümi jutuykaqnömi.
14 Makinkunapis jacinto rumikunawan adornashqa qori sortïjanömi.
Cuerpunpis zafiro rumikunawan adornashqa kuyayllapä marfilnömi.
15 Chankankunapis qori jawiräkunan janancho marmolpitag rurashqa jorcun ichiraykaqnömi.
Líbanucho kaykaq mas altunnin cedru muntinörämi kuyayllapä.
16 Parlakuyninpis maypis wiyakuy munaymi.
Paynöqa manami pipis kantsu.
Jerusalén jipashkuna, tsaynömi kuyanqä chöluqa.
Tsaynömi kuyaynïqa.