Chölu:
4
Kuyaynï, pasaypa kuyayllapämi kaykanki.Maypis kuyakuykay munaymi kaykanki.
Ñawikipis shukutaranqayki rurinchömi ishkay palumanö kuyayllapä kaykan.
Aqtsaykipis atska kapishkuna Galaad jirkakunapa pañar puriqnörämi kaykan.
2 Kiruykikunapis majädacho tsayrä bäñatsishqa y rutushqa yuraq üshakunanömi kaykan.
Majanpa majanpami kuyayllapä.
Manami ni jukllayllapis pishintsu.†
3 Shimikipis kuyayllapä puka jïlunörämi.
Parlakuynikipis maypis wiyakuy munaymi.
Shukukunqayki rurincho qaqllaykipis granädanörämi ishkanlä kuyayllapä pukaraykan.
4 Kunkaykipis David ruratsinqan törrinömi kuyayllapä.
Kunkaykicho wallqaykipis tsay törricho warkuraykaq juk waranqa (1,000) escüdunömi.
Alli chölu soldädukunapa escüdun kuyayllapä kanqannömi wallqaykipis kuyayllapä kaykan.
5 Chuchuykipis kuyayllapä millish lluytsu mallwakuna liriu waytakunapa chawpincho mikuykaqnömi.†
6 Noqaqa manarä patsa waraptin y llantuypis manarä päsaptinmi mïrra perfümi kanqan jirkaman y inciensiu kanqan jirkanmana aywashä.
7 ¡Kuyaynï, qamqa kuyayllapämi kanki!
¡Chaki puntaykipita uma jirkaykiyaqmi shumaq kuyayllapä kaykanki!
8 Kuyay warmillä, Líbanupita noqaman shamuykullay.b
Líbano jirkakunacho kanqaykipita shamuykullay.
Amaná niyanqan jirkapita shamuykullay.
Senir niyanqan Hermón rajupita shamuykullay.
Leonkuna täkunan machaypita y tigrikuna täkunan jirkapita shamuykullay.
9 Kuyay warmillä, qampämi shonqü pasaypa turbatan.
Rikarämaptiki shonqüpis pasaypami tiktikyan.
Wallqaykicho kaykaq jïlullawanmi shonqüta suwashqayki.
10 Kuyamanqaykiqa shonqüyaqrämi chaykun.
Kuyamanqaykiqa vïnupitapis masmi mishkin.
Perfümita wiñakunqaykipis llapan perfümikunapita masmi mushkun.
11 Shimikipis abëjapa mishkinnörämi mishkiykun.
Mutsakuynikipis abëjapa mishkinwan lichi mishkiqnörämi mishkiykun.
Latsapaykikunapis Líbanucho kaykaq muntipa mushkuyninnörämi mushkuykun.
12 Kuyay warmillä, jiruruypa qenchashqa jardinmi kaykanki.
Qammi kaykanki tsapashqa yaku pözu.
13 Cuerpuykiqa granäda frütayuq jardinmi.
Tsay jardinchömi kaykan tukuyläya mishkiq frütakuna,
alheña waytakuna
y nardo waytakuna.
14 Tsaychömi kaykan nardo y azafrán,
mushkuq cäña y canëla,
tukuyläya inciensiu jachakuna,
mïrra, áloe y wakin mushkuq jachakunapis.
15 Tsay jardinta qarpanaykipä pashtaq pukyumi kaykanki.
Yaku pashtaykämunqan pukyumi kaykanki.
Líbanupita urämuq yakumi kaykanki.
Jipash:
16 ¡Witsaypa aywaq wayra, shumaq wayramuy!
¡Uraypa aywaq wayra, shumaq wayramuy!
¡Jardinnïman wayramur kuyayllapä mushkuyninta kuyaynïman apay!
¡Kuyaynïqa jardinninman shamuykutsun!
¡Mishkiq frütakunapa wayuyninta tsaycho mikutsun!