Jipash:
3
Paqaspapis cämächömi ashishqä shonqü kuyanqan chöluta.Yataykacharpis manami tarishqätsu.
2 Pasaypa yarpachakurmi shärikurqä.
Entëru markapa aywarmi cällikunapa y pläzakunapapis kuyanqä chöluta ashishqä.
Mayjina ashirpis manami tarishqätsu.
3 Tsaynö puriykaqtami marka täpaq wardiakuna tariyämashqa.
Paykunawan tinkurmi tapukur nirqä:
“¿Manaku rikayällashqayki kuyanqä chöluta?”
4 Paykunapita päsaskillarmi kuyanakunqäwan tinkushqä.
Makallakurkurmi mana kachaypa mamäpa wayinman chätsishqä.
Yurinqä cuartumanmi yaykatsishqä.
Chölu:
5 Jerusalén jipashkuna, lluytsukunapa jutincho y tarushkunapa jutincho awniykayällämay kuyanqä jipash punukuykaqta mana rikchatsiyänaykipä.
Punuyta jimanqanyaq punukutsun.
Kimsa kaq cantu
Yanasankuna:
6 Tsunyaq jirkapita ¿imatä shamuykan?
¿Imatä qoshtatarrä aywaykämun?
Mïrra perfüminö, inciensiunö y tukuyläya kuyayllapä perfümikunanö ¿imatä mushkuykämun?
7 ¡Tsayqa kaykan Salomónpa andasninmi!a
Soqta chunka (60) soldädukunapa chawpillantami shamuykan.
Tsay soldädukunaqa Israelcho allinnin kaq soldädukunami.
8 Llapanpis espäda manijaq y pelyay yachaq soldädukunallami.
Paqaspa imapis kaptin jinan höra pelyayänanpämi tseqllancho espädata puritsiyan.
9 Andasnintaqa Líbanupita apatsimunqan allinnin qerukunapitami rey Salomón ruratsishqa.
10 Andasninpa jorcunninkunaqa qellaypitami.
Tsay jorcunkunapa jawiräkunanpis qoripitami.
Reypa jamakunanpis granäti tëlapitami.
Rurinpaqa Jerusalén warmikuna kushishqa bordayanqanmi kaykan.
11 Sión warmikuna, ¡corönan jatishqa rey Salomón shamuykaqta rikayänaykipä shayämuy!
Tsay corönataqa majatsakanqan junaqmi maman jatitsishqa.
Tsay junaqmi Salomónpa shonqun pasaypa kushikushqa.