Jipash:
2
Saróncho rösa waytami noqaqa kaykä.Pampacho wiñaq liriu waytami kaykä.
Chölu:
2 Kuyayllä, kashakuna chawpincho kaykaq liriu waytami kanki.
Qamqa llapan jipashkunapitapis mas kuyayllapämi kanki.
Jipash:
3 Kuyaynï, munti rurincho manzäna wayuraykaqnömi llapan chölukunapitapis mas kuyayllapä kanki.
Ñöpaykiman jamaykurqa manami yarquytapis munätsu.
Kuyakuynikipis mishkinömi.
4 Banquëti wayikimanmi pushamashqayki.a
Tsaychömi kuyamarnin makallarämashqayki.
5 Qamta kuyaptï shonqüpis manami shonqunatsu.
Päsasnikitawan manzänaykita juklla qaraykallämay.b
6 Ima allirä kanman itsuq kaq rikraykita jawnatsimaptiki.
Ima allirä kanman derëcha kaq rikraykiwan makallarkamaptiki.
Chölu:
7 Jerusalén jipashkuna, lluytsukunapa jutincho y tarushkunapa jutincho awniykayällämay kuyanqä jipash punukuykaqta mana rikchatsiyänaykipä.
Punuyta jimanqanyaq punukutsun.
Ishkay kaq cantu
Jipash:
8 ¡Kuyanqä chölupa voznintami wiyaykä!
¡Payqa shamuykannami!
¡Jirkakunapa y jirkankunapami saltakacharrä shamuykan!
9 Kuyanqä chöluqa lluytsunörämi.
Payqa kuyayllapä tarushnörämi.
¡Wayï waqtanchönami kaykan!
¡Ventänapanami qawaraykämun!
¡Rejïllanpanami rikaykäman!
Chölu:
10 Kuyaynï, juklla shäriy.
Kuyanqä jipash, ras aywakushun.
11 Tamya tiempupis päsashqanami.
Usya tiempuchönami kaykantsik.
12 Entëru jirkachömi waytakunapis pashtaraykäyan.
Cantanantsik tiempupis chämushqanami.
Kullkushkuna cantayanqanpis maytsaychönami wiyakaykan.
13 Hïgus jachakunapis wayuraykäyannami.
Üva jachakunapapis mushkuynin musyakaykämunnami.
Kuyayllapä jipash, ras shärirkur aywakushun.
14 Kuyanqä paluma, qaqakunacho y tsunyaqkunacho amana pakaraynatsu.
Parlanqaykita wiyaytami munä; qaqllaykita rikaytami munä.
Qam parlanqaykiqa maypis wiyay munaymi.
Qaqllaykipis pasaypa kuyayllapämi.
Chöluwan jipash:
15 Üvantsikkunapis tuktuykäyannami.
Tsaykunataqa paqtä taksha atuqkuna ushayanman.c
¡Tsay atuqkunata wanutsishun!
Jipash:
16 Kuyamaqnïqa noqallatami kuyaman.
Noqapis payllatami kuyä.
Payqa liriu waytakuna kaqchömi mitsikun.d †
17 Kuyaynï, manarä patsa waraptin y llantuypis manarä päsaptin lluytsunörä y tarushnörä Beter jirkakunamane kutikamuy.