Cantar de los Cantares
Llapanpitapis mas kuyayllapäta cantanqan
1
Kaychömi qellqaraykan llapanpitapis mas kuyayllapä cantukuna. Kay cantukunaqa Salomónpami.Punta kaq cantu
Jipash:†
2 ¡Shumaq mutsaykamankiman itsanqa!
Kuyamar mutsamanqaykiqa vïnupitapis masmi mishkin.
3 Perfümikipa mushkuynin maypis mushkuräkuy munaymi.
Jutikipis perfüminörämi kuyayllapä kaykan.
¡Tsaymi jipashkunapis pasaypa kuyayäshunki!
4 ¡Tayta rey, cuartuykiman juklla pushakallämay!a
Tsaychömi pasaypa kushishqa kakushun.
Vïnuta upur kushikunqantsikpitapis pasaypa kuyanakurmi kushikushun.
¡Rasuntachi jipashkuna kuyayäshunki!
5 Jerusalén jipashkuna, yanalla karpis Cedar runakunapa toldunnömi kuyayllapä kaykä.b
Salomón ruratsinqan cortïnakunanömi kuyayllapä kaykä.
6 Achaywan yanayash kanqäta ama rikapäyämaytsu.
Turïkunami chikipäyämarnin üva chakrakunata täpanäpä churayämarqan.
Tsaymi kikïpa üva chakräta cuidashqätsu.c
7 Kuyaynï, willaykallämay.
Üshaykikunata ¿maychötä mitsikunki?
Pullan junaq pasaypa achaptin ¿may llantumantä qatinki?
Willamaptikiqa amïguykikuna mitsikuyanqancho ashirniki manami pantakashqa purishätsu.
Yanasankuna:
8 Llapan jipashkunapitapis mas kuyayllapä jipash, ashinqayki chölu maychöpis kanqanta mana musyarqa tarinqaykiyaq üshakunapa rastrullanpa ayway.
Mitsikuqkunapa tsukllankuna kaqman chaykur cabraykikunata mitsikuy.
Chölu:
9 Kuyayllapä jipash, Faraónpa carrëtanta qarachaq fïna yëwanömi kuyayllapä kaykanki.
10 Arëtikita jatikurkuptikiqa qaqllaykipis kuyayllapämi.
Perlas wallqaykita wallqakuskiptikiqa kunkaykipis kuyayllapämi.
11 Qellaywan adornashqa qori arëtitami rurapäshayki.
Jipash:
12 Perfümïpa mushkuyninqa kuyanqä chölu rey jamaraykanqanyaqmi chan.
13 Taksha pikshawan tsararanqä mïrra perfümi pëchullächo kanqannömi kuyaynïpis pëchullächo warat punun.
14 En-gadi parti üva chakracho kaykaq kuyayllapä alheña waytanömi kuyaynïqa kaykan.
Chölu:
15 Kuyayllapä jipash, pasaypa kuyayllapämi kanki.
Maypis kuyakuykay munaymi kanki.
Ñawikipis ishkay palumanömi kuyayllapä kaykan.
Jipash:
16 Kuyaynï, pasaypa kuyayllapämi kaykanki.
Shumaq karmi munapaypä kaykanki.
Chölu:
Verdiraykaq qewami cämantsikpis kaykan.
17 Wayintsikpis cedru muntimi.
Ciprés muntimi qatarämaqnintsikpis.