Israel runakunata nacionninman kutitsimunanpä ninqan
31
Tayta Diosmi nin: “Tsay witsanmi llapan Israel casta runakunapa Diosnin kashä. Paykunanami kuyanqä runakuna kayanqa”.2 Tayta Diosmi nin:
“Wanuypita qeshpiq unay Israel runakuna tsunyaq jirkapa päsayaptin kuyaparmi yanaparqä.
3 Awninqä partiman aywaykäyaptinmi yuripaykur nirqä:
‘Qamkunataqa imayyaqpis kuyayäshaykimi.
Kuyaparmi imaypis qamkunawan kaykäshä’.
4 “Kuyanqä Israel runakuna, yapaymi yanapayäshayki nacionnikicho añaw kawayänaykipä.
Tsaymi panderëtakunata tukar danzaraykar cällikunapa yapay kushishqa tumayanki.
5 Samaria markacho kaq jirkankunachömi üvakunata yapay plantayanki.
Wayuynintapis kushishqami pallayanki.†
6 Tsay witsanmi Efraín jallqakunacho rikachakuqkuna qayakur niyanqa:
‘Tayta Diosnintsikta adoranantsikpä Siónman aku aywashun’ ”.
7 Tayta Diosmi nin:
“Jacobpita aywaraq runakunata qorimunqäpita kushishqa cantayay.
Nacionniki wakin nacionkunapita mas respitashqa kanqanpita kushishqa alabayay.
Jinchi niyay: ‘¡Kawaykar quëdaq Israel runakunataqa Tayta Diosmi salvashqa!’
8 Israel runakunatami norti kaqlä karu nacionpita kutitsimushä.
Kay patsapa kuchunpitami qorimushä.
Paykunawanmi kutiyämunqa qaprakuna, weqrukuna, qeshyaq warmikuna y llullu wamrayuq warmikunapis.
¡Pasaypa atskami kutiyämunqa!
9 Noqami kaykä Israel runakunapa taytan.
Efraín runakunaqaa mayor tsurïmi kaykäyan.
Waqar aywakushqa karpis kuyapaptïmi kushishqa kutiyämunqa.
Mana yakunäyänanpämi chuya yaku kanqallanpa pushamushä.
Mana ishkiyänanpämi alli nänillapa pushamushä”.
10 Maytsay nacioncho taq runakuna, Tayta Diospa willakuyninta wiyayay.
Karucho taqkunatapis ninqanta willar niyay:
“Israel runakunata maytsayman qarqunqäpitami qorimushä.
Üshankunata duëñun qoriqnömi llapanta qoriskamur rikashä.
11 Jacobpita aywaraqkunatamib chikiqninkunapita salvashä.
Paykunataqa munayyuq nacionpa makinpitami jipimushä.†
12 Kutiykamurmi Sión jirkanman witsarkur kushishqa cantayanqa.
Bendicionnïwanmi mikuypis, vïnupis, aceitipis, üshapis, wäkapis atska kanqa.
Täyanqan parti qarpana huertanö kaptinmi imapis pishinqanatsu.
13 Kushikurninmi jipashkunapis, chölukunapis, awkinkunapis tushuyanqa.
Mana llakikur kushishqa kawayänanpämi shakyätsishä.
14 Alli allillata mikuyänanpämi sacerdötikunatapis kamaripäshä.
Kuyanqä runakunataqa imayka ministinqantami kamaripäshä.
Noqa Tayta Diosmi tsaynö nï”.
Llakikunqanpita Raquel kushikunanpä ninqan
15 Tayta Diosmi nin:
“Ramá markacho llakikur waqanqanmi wiyakaykämun.
Llakikur pasaypa qayaranqanmi wiyakaykämun.
Tsayqa Raquel waqanqanmi.
Payqa wawankunapämi pasaypa waqaykan.†
Wamrankuna wanushqa kaptinmi shoqayaptinpis mana wiyaypa waqaykan”.c †
16 Tayta Diosmi nin:
“Raquel, ama waqaynatsu.
Weqikita ama jichaynatsu.
Contrayki nacionpitami wawaykikuna kutiyämunqa.
Kanan llakikurpis kutimuptinqa kushikunkimi.
Noqa Tayta Diosmi tsaynö nï.
17 Tsaymi shamuq watakunacho wawaykikuna nacionninman kutiyämuptin kushikunki.
Noqa Tayta Diosmi tsaynö nï.
18 “Wiyashqämi Efraín runakunad llakikurnin niyämaqta:
‘Chucaru töruta wiruqnömi pasaypa castigayämashqayki.
Tsaynö castigayämarpis noqakunapaqa qammi Tayta Diosnïkuna kaykanki.
Tsaymi yapay qorikayämaptiki cäsukuyäshayki.
19 Mana cäsukuq kayanqäpitami penqakuyä.
Jutsata rurayanqäpitami perdonta mañakuyä.
Chölullarä kar jutsata rurayanqäpitami penqakur umpuräkuyä’.
20 “Efraín runakunaqa kuyanqä wamräkunami kaykäyan.
Paykunata rikarmi pasaypa kushikü.
Ajapaskirpis paykunataqa llakipämi.
Paykunapä yarparaptïmi shonqüpis nanayparä llakikun.
Paykunataqa imaypis kuyapäshämi.
Noqa Tayta Diosmi tsaynö nï.
21 “Kuyanqä Israel runakuna, may nänipa aywayanqaykitapis shumaq yarpäyay.
Tsay nänillapana markaykikunaman kutikayämuy.
22 ¡Imayyaqrä mana cäsukuq jipashnö purikuyanki!
Nacionnikiman kutikayämunaykipämi kay patsacho mantsakaypä kaqkunata rurashä.
Tsayqa mantsakaypä kanqa runata ashinanpä jipash yaykunqan mantsakaypä kanqannömi”.
23 Israel runakunata kuyaq y llapanta mandaq Tayta Diosmi nin: “Nacionninman Judá runakunata kutitsimuptïmi markankunachöna täyanqa. Yanapanqäpita kushikurmi niyanqa: ‘¡Templu kanqan sagrädu jirkanman Tayta Dios bendicionninta churaykullätsun! ¡Tsaychömi Tayta Dios munanqannölla pïmaypis kawan!’
24 “Judá runakuna nacionnincho yapay täyaptinmi markacho taqkunapis, chakracho aruqkunapis y üsha mitsiqkunapis tsaycho täyanqa. 25 Qelanaykaqkunatapis kallpanmi qarashä. Llakishqa kaykaqkunatapis shakyätsishämi”.
26 Tayta Dios tsaynö nikämaptinmi rikcharkamurqä. Tsayta suëñuskirmi pasaypa kushikurqä.
27 Tayta Diosmi nin: “Tiempu chämunqami Judácho y Israelcho runakunapis y uywakunapis atskaman mirayänanpä. 28 Ñöpataqa qewata llukiriqnö, wayita juchutsiqnö y qanrata jitariqnömi paykunata castigashqä. Kananqa wayita shäritsiqnö y plantata plantaqnömi paykunata shumaq yanapashä. Noqa Tayta Diosmi tsaynö nï.
29 “Tsay witsanqa manami niyanqanatsu: ‘Taytankuna pochquq üvata mikuyaptinmi tsurinkunapa kirunkuna jimpan’ nir.† 30 Tsaypa trokinqa pochquq üvata mikuqpa kirun jimpanqannömi jutsa ruraqkuna kikinkuna wanuyanqa”.†
Mushuq pactuta rurananpä ninqan
31 Tayta Diosmi nin:
“Junaqkuna chaykämunnami Israel runakunawan y Judá runakunawan mushuq pactuta ruranäpä.†
32 Tsay pactuqa manami unay castankunata Egiptupita jipimur ruranqä pactunötsu kanqa.
Warminta runa kuyanqannö kuyaykaptïmi unay castankunaqa tsay pactuta cumpliyashqatsu.
Noqa Tayta Diosmi tsaynö nï.
33 “Tsay junaqkuna päsaskiptinmi Israel runakunawan pactuta rurashä.
Tsaynö rurarmi leynïkunata yarpayninkunaman churashä.
Shonqunkunamanpis leynïkunatami qellqashä.
Paykunapa Diosninmi kashä.
Paykunanami kuyanqä runakuna kayanqa.†
Noqa Tayta Diosmi tsaynö nï.
34 “Tsay witsanqa imaynaqpis y imaykayuqpis llapanmi reqiyämanqa.
Tsaymi runa mayintapis ni wawqintapis pipis yätsinqatsu reqimänanpä.
Paykunapa llapan jutsankunatami perdonashä.
Ima jutsata rurayanqantapis manami yarparäshänatsu.†
Noqa Tayta Diosmi tsaynö nï”.
35 Tayta Diosmi kamarqan rupayta junaqpa atsikyänanpä.
Tsaynöllami killata y qoyllurkunata kamarqan paqaspa atsikyänanpä.
Paymi kamakätsin lamarpis pulchaqyar qayaränanpä.
Paypa jutinqa llapanta mandaq Yahwehmi.
36 Tsaymi Tayta Dios nin:
“Tsay llapan kamanqäkuna mana ushakaq kayanqannömi Israel runakunapis ushakäyanqatsu.†
37 Ciëluta manami pipis tupuyta kamäpakuntsu.
Patsapa cimientuntapis manami pipis rikashqatsu.
Tsaynöllami mana allita rurayashqa kaptinpis Israel runakunata ni imaypis jaqirishätsu.
Noqa Tayta Diosmi tsaynö nï”.
38 Tayta Diosmi nin: “Tiempu chämunqami Jerusalén markata Hananeel törripita qallaykur Esquïna Punku niyanqanyaq noqapa jutïcho allitsayänanpä. 39 Tsay punkupita cordelwan tupurkurmi Gareb jirkanyaq pirqayanqa. Nirkurmi tumarämunqa Goa partiman. 40 Aya pampanan y uchpa jitakuna raqrapis Jerusalén markä rurinchönami rikakunqa. Tsaynöllami Cedrón raqrapa ñöpan chakrakuna hasta Cawallukuna jutiyuq punku tsimpanyaq santu Jerusalén marka kanqa. Jerusaléntaqa manami imaypis juchutsiyanqanatsu ni ushakätsiyanqanatsu”.