Kuyanqan runakunata kutitsimunanpä Tayta Dios ninqan
30
Tayta Diosmi Jeremíasta nirqan: 2 “Israel runakunata kuyaq Tayta Dios karmi nï: Llapan ninqäkunata juk rölluman qellqay. 3 Babiloniapita Israel runakunata y Judá runakunata kutitsimunäpä kaq junaq chämunqanami. Kutitsimuptïmi unay castankunata entreganqä nacioncho kushishqa täyanqa. Noqa Tayta Diosmi tsaynö nï”.4 Israel runakunapä y Judá runakunapämi Tayta Dios nin:
5 “¡Pasaypa mantsariywan qayaräyanqanmi wiyakämunqa!
¡Manami pipis añaw kawanqanatsu!
6 ¿Ollqu runa qeshyakunmantsurä?
Tsaynö kaptinpis wachay nanaywan tseqllan tsarishqa warmi unchuykachanqannömi paykunapis nanaywan unchuykachäyanqa.
Llapanpis pasaypa almayashqami kayanqa.
7 Tsay junaqkunanö pasaypa mantsariypäqa manami imaypis kashqarätsu.
Tsay witsanmi Jacobpita aywaraqkuna pasaypa ñakayanqa.
Tsaynö kaptinpis paykunata salvashämi.
8 “Llapanta mandaq Tayta Dios karmi nï:
Tsay junaq chämuptinqa pasaypa ñakar yüguta apaykaqnö y wataraykaqnömi kayanqa.
Tsaynö kayaptinpis yüguta pakiqnömi paykunata salvashä.
Waskata rachiqnömi paykunata libri kachaykushä.
Tsaynö ruraptïmi juklä nación runakunapa munaynincho kayanqanatsu.
9 Paykunata kachaykunanpämi David casta reyta churashä.
Tsaymi payta sirvir noqatapis sirviyämanqa.
10 “Noqa Tayta Diosmi nï:
Jacobpita aywaraq sirvimaq runakuna, ama mantsariyaytsu.
Karu nacionman apayäshunqaykipitami qamkunata y qamkunapita llapan aywaraqkunata jipiyämushayki.†
Pipitapis manana mantsapakuypami nacionnikicho añaw kawayanki.
11 “Noqa qamkunawanmi kaykä imapitapis salvanäpä.
Tsaymi nacionnikipita qamkunata qarqushqa karpis munaynincho tsararäyäshuqniki nacionkunata ushakätsishä.
Tsay nacionkunata ushakätsirpis qamkunataqa manami ushakätsiyäshaykitsu.
Tsaynö kaptinpis jutsata rurayanqaykiman tupumi castigayäshayki.
Mana castigaypaqa manami kachäshaykitsu.
Noqa Tayta Diosmi tsaynö nï”.
12 Mastami Tayta Dios nin:
“Imaypis mana kutikaq qerinö y imaypis mana alliyaq qeshyanömi ñakayanqayki kaykan.
13 Manami pipis kantsu yanapayäshunaykipä ni qerikita jampiyäshunaykipäpis.
Alliyätsiyäshunaykipä ima jampipis manami kantsu.a
14 “Pasaypa jutsata rurayanqaykipitami mana kuyapaypa qamkunata castigashqä.
Juk runa contranta mana kuyapaypa maqaqnömi castigashqä.
Llapan yanapashuqnikikunapis mananami yanapayäshunkinatsu.
Ñakayaptikipis paykunataqa manami imapis qokunnatsu.
15 ¿Imanirtä ñakayanqaykipita pasaypa llakishqa kaykäyanki?
Ñakaykäyanqaykiqa imaypis mana alliyaq qeshyanömi kaykan.
Tsaynö qamkunata castigashqä jutsata rurayanqaykipita y pasaypa mana allikunata ruranqaykipitami.†
16 “Qamkunata castiganqänöllami ñakatsishuqnikikunatapis castigar ushakätsishä.
Paykunapis nacionninpita llapanmi prësu aywayanqa.
Imaykaykita qechuyäshunqaykinöllami kikinkunatapis qechuyanqa.
Suwapäyäshunqaykinöllami suwapäyanqa.
17 “Qamkunata manakaqman churashurnikimi kachariykunqäta niyäshushqayki.
Tsaynö niyäshuptikipis kananpitaqa yanapayäshaykimi.
Mana alliyaq qeriwannö ñakayanqaykipitapis alliyätsishaykimi.
Noqa Tayta Diosmi tsaynö nï”.
18 Tayta Diosmi nin:
“Jacobpita aywaraq runakunatami castanpa castanpa kuyapar nacionninman kutitsimushä.
Kutitsimuptïmi Jerusaléncho juchushqa kaykaq wayikunata yapay shäritsiyanqa.
Rey tänan palaciutapis kanqallanchömi shäritsiyanqa.
19 Tsaymi agradëcikurnin kushishqa alabayämanqa.
Atskaman mirayänanpä y alli kawayänanpä kamakätsiptïmi paykunata pipis penqakuyman churayanqanatsu.
20 Unay kawayanqannö alli kawayänanpä y nacionnincho yapay alabayämänanpämi yanapashä.
Paykunata ñakatsiq kaqtami itsanqa llapanta castigashä”.
21 Tayta Diosmi nin:
“Kuyanqä runakunapa mandaqnin kananpämi marka mayinta churashä.
Ñöpäman shamunanpä kikïmi qayashä.
(Mana qayaptïqa manami pipis puntäman witimunmantsu.)
22 Qamkunami kuyanqä runakuna kayanki.
Noqanami Diosnikikuna kashä”.
23 Mangäda tamyanö y shukukuy wayranömi jutsa ruraq runakunata Tayta Dios pasaypa rabyanar ushakätsinqa.
24 Llapan yarpanqankunata manarä rurayta ushaptinqa ajanaynin manami qallqunqatsu.
Tiempu päsaskiptinmi tsaytaqa tantiyakuyanki.†