Babiloniacho kaykaq Judá runakunaman Jeremías cartakunqan
29
Juk junaqmi profëta Jeremías Jerusalénpita cartakurqan Babiloniacho taykaq Judá runakunaman. Paykunami kayarqan rey Nabucodonosor Jerusalénpita Babiloniaman prësu apanqan mayor runakuna, sacerdötikuna, profëtakuna y wakin runakunapis.†2 Cartakunqan witsanqa Babiloniachönami kaykäyarqan rey Jeconías, maman, Jeconíaspa yanapaqninkuna, Jerusalénpa y Judápa mandaqninkuna, artesänukuna y herrërukunapis. 3 Tsay cartatami Jeremías apatsirqan Safánpa tsurin Elasawan y Hilcíaspa tsurin Gemaríaswan. Tsay runakuna Babiloniacho rey Nabucodonosorwan willanakuyänanpämi Judápa mandaqnin rey Sedequías kacharqan. Tsay cartachömi nirqan:
4 Jerusalénpita Babiloniaman prësu aywaqkunatami Israel runakunata kuyaq y llapanta mandaq Tayta Dios nin:
5 “Täyänaykipä wayikikuna rurayay. Chakrakunachöpis murukuyay wayuyninta mikur kawayänaykipä. 6 Warmipis ollqupis tsurikikuna kayänanpä majatsakäyay. Tsurikikunapis chöluyäyar jipashyar majatsakäyätsun wamrankuna atska kayänanpä. Tsaynöpami täyanqaykicho wallkayäyänaykipa trokin atskaman mirayanki. 7 Tsay markacho alli kawayänanpä pïmaytapis yanapayay. Tsaycho taqkunapä mañakayämay. Täyanqayki markacho alli kawakuy kaptinqa qamkunapis allimi kawayanki.
8 “Israel runakunata kuyaq y llapanta mandaq Tayta Dios karmi nï: Täyanqaykicho llulla profëtakuna rikakuqkuna imatapis llutankunata niyäshunqaykita ama criyiyaytsu. ‘Suëñuynïchömi Tayta Dios revelamashqa’ niyäshurnikipis llullapaykäyäshunkimi. 9 Noqapa jutïta joqarir niyäshunqaykipis manami rasunpaypatsu kaykan. Paykunataqa manami kachamushqätsu. Noqa Tayta Diosmi tsaynö nï”.
10 Tayta Diosmi nin: “Babiloniaman apayäshunqaykipita qanchis chunka (70) wata cumpliptinrämi† awninqänölla qoriyämushayki. 11 Musyämi imanö kayänaykipä kanqantapis. Manami mana alli kawayänaykitatsu munä, tsaypa trokinqa alli kawayänaykitami. Tsaynö kaykaptinqa llakikuyänaykipa trokin kushikuyay. Noqa Tayta Diosmi tsaynö nï.
12 “Rugakur mañakayämaptikiqa wiyayäshaykimi. 13 Llapan shonquykikunawan ashiyämarqa tariyämankimi.† 14 Maytsay nacionman qarqunqäpitapis kutitsiyämushaykimi. Maypitami qarqurqä tsaymanmi llapaykikunata kutitsiyämushayki. Noqa Tayta Diosmi tsaynö nï”.
15 Qamkuna nikäyanki Babiloniacho profëtakunata Tayta Dios churapäyäshunqaykitami. 16 Tsaynö niyaptikipis tsay profëtakunaqa llutantami willaykäyäshunki. Paykunaqa nikäyan Davidpa trönuncho kaykaq rey y Babiloniaman prësu mana aywaq marka mayintsikkuna Jerusaléncho añaw kawayänanpä kanqantami.
17 Llapanta mandaq Tayta Diosmi itsanqa nin: “Judácho taq runakunaqa wakinkunami guërracho wanuyanqa, wakinnami mallaqaywan wanuyanqa y wakinkunanami pesti qeshyawan wanuyanqa. Kawaykar quëdaq kaqkunami itsanqa melanaypä ismushqa hïgusnö kayanqa. 18 Paykunata castigaptïmi tsaynö wanuyanqa. Castiganqäta musyarmi maytsay nacioncho taq runakunapis pasaypa mantsariyanqa. Maymanpis qarqunqäman Judá runakuna chäyaptin pïmaypis penqakuyman churarmi jamuräyanqa y asipäyanqa. 19 Paykunata tsaynö castigashä unaypita patsa sirvimaqnï profëtakunawan kutin kutin willakaykätsiptïpis mana wiyakayämanqanpitami. Noqa Tayta Diosmi tsaynö nï.
20 “Jerusalénpita Babiloniaman qarqunqä kaqkuna, ninqäkunata shumaq wiyakuyay. 21 Israel runakunata kuyaq y llapanta mandaq Tayta Dios karmi nï: Colaíaspa tsurin Acab y Maasíaspa tsurin Sedequíasmi noqapa jutïcho llullakur willakuyan. Tsaymi wanutsishqa kayänanpä Babiloniapa mandaqnin rey Nabucodonosorpa makinman churashä. Tsaytaqa llapan runakunami rikayanqa. 22 Tsaymi Babiloniacho Judá runakuna pitapis maldicionar niyanqa: ‘Sedequíastawan Acabta rupatsinqannö rupatsishqa kanaykipämi Tayta Dios qamtapis kacharishunki’.
23 “Acabta y Sedequíasta tsaynö castigashä kuyanqä runakuna täyanqancho penqakuypä llutankunata rurayanqanpitami. Paykunaqa runayuq warmikunawan kakurmi pasaypa ajanätsiyämashqa. Imatapis mana nikaptïmi jutïcho llullakur willakuyashqa. Tsaynö rurayanqanta kikïmi rikashqä. Noqa Tayta Diosmi tsaynö nï”.
Semaíaspä willakunqan
24 Nehelamcho yuriq Semaíaspämi 25 Israel runakunata kuyaq y llapanta mandaq Tayta Dios nin: “Qamqa kikikipa jutikichömi cartakushqayki Jerusaléncho kaykaq runakunaman, Maasíaspa tsurin Sofonías sacerdötiman y wakin sacerdötikunamanpis. Tsay apatsinqayki cartachömi sacerdöti Sofoníasta nishqayki:
26 “ ‘Sacerdöti Joiadapa trokin templuta täpaqkunapa mandaqnin kanaykipä Tayta Diosmi churashushqayki. Tsaymi munayyuq kaykanki pipis profëta tukur willakuptin jinan höra prësu tsaritsinaykipä y cëpumana jatirkur cadënawan watatsinaykipä. 27 Tsaynö kaykarqa ¿imanirtä Anatotpita Jeremías ñöpaykicho profëta tukuptin payta prësu tsaritsishqaykitsu? 28 Jeremíasqa Jerusalénpita noqakunamanpis cartakamurmi niyämashqa: “Atska watami Babiloniacho prësu kayanki. Tsaynö kaykaptinqa täyänaykipä wayikikunata rurar mikuyänaykipäpis murukuyay” ’ ”.
29 Semaías apatsinqan cartata chaskiskirmi sacerdöti Sofonías Jeremíasta liyiparqan. 30 Liyipaykaptinmi Jeremíasta Tayta Dios nirqan: 31 “Babiloniacho taq Judá runakunaman cartata apatsir niy: ‘Tayta Diosmi nin: Willakunanpä mana nikaptïmi Nehelamcho yuriq Semaías jutïcho willakurqan. Llutanta willakurninmi manakaqllaman yärakaykätsiyäshunki. 32 Nehelamcho yuriq Semaías tsaynö willakushqa kaptin y conträ shäriyänanpä runakunata parlapashqa kaptinmi payta y paypita aywaraqkunata castigashä. Tsaymi llapanpis wanur ni jukllayllapis rikanqatsu kuyanqä runakunata yanapar nacionninman qorimunqäta. Noqa Tayta Diosmi tsaynö nï’ ”.