Tayta Diospa jutincho Hananías llullakur willakunqan
28
Sedequías† chusku wata y pitsqa killa Judá nacionpa mandaqnin rey kaykaptinmi sacerdötikuna y llapan runakuna wiyaykaptin Azurpa tsurin y Gabaóncho yuriq profëta Hananías templucho nimarqan: 2 “Israel runakunata kuyaq y llapanta mandaq Tayta Diosmi nin: ‘Babiloniapa mandaqnin rey churayäshunqayki yügutami pakirishä.a 3 Tsaymi kananpita ishkay watata Babiloniapa mandaqnin rey Nabucodonosor templupita apakunqan llapan manëjukunata kutitsimushä. 4 Rasunpaypami Babiloniapa mandaqnin rey churapäyäshunqayki yüguta pakirishä. Tsaynö rurarmi Joacimpa tsurin rey Jeconíasta kutitsimushä Judá nacioncho yapay mandananpä. Judápita Babiloniaman prësu aywaq runakunatapis llapantami kutitsimushä. Noqa Tayta Diosmi tsaynö nï’ ”.5 Hananías tsaynö niptinmi templucho kaykaq sacerdötikunapa ñöpancho y llapan runakunapa ñöpancho profëta Jeremías nirqan: 6 “¡Tsaynö katsun! ¡Ima allirä kaykunman ninqaykinölla Tayta Dios kamakätsiptin! ¡Ima kushikuyrä kanman templupita apakuyanqan manëjukunata rasunpaypa kutitsimuptin! ¡Tsaynöpis pasaypa kushikuypämi kanman Babiloniaman prësu aywaq runakunatapis kutitsimuptin!
7 “Qam y llapan runakunapis ninqäta shumaq wiyayämay. 8 Qampis ni noqapis manarä yurishqami unay profëtakuna willakuyarqan atska nacionkunacho y reykuna mandayanqancho guërrakuna, ñakaykuna y fiyu qeshyakuna kananpä kanqanta. 9 Kananqa mayqan profëtapis añaw kawanantsikpä kanqanta willakuptinqa shumaq tantiyakushun willakunqan rasunpaypa kanqanta o mana kanqantapis. Tayta Dios rasunpaypa kachamunqan profëta kanqanta musyantsik willakunqannö cumpliptinrämi”.†
10 Tsaynö niptinmi Hananíasqa jinan höra Jeremíaspa matankancho wataraykaq yüguta qechuskir pakir usharqan. 11 Yüguta pakiskirmi llapan runakunapa ñöpancho nirqan: “Tayta Diosmi nin: ‘Kananpita ishkay watatami Babiloniapa mandaqnin rey Nabucodonosor yüguta llapan nacionkunaman churanqanta pakir ushakätsishä’ ”.b
Tsaynö niptinmi templupita yarqur Jeremías aywakurqan.
12 Jeremías matankancho watashqa puritsinqan yüguta Hananías pakinqanpita manaräpis unaytami Jeremíasta Tayta Dios nirqan: 13 “Hananías kaqman aywaykur ninqäta niy: ‘Tayta Diosmi nin: Qamqa qeru yügutami pakishqayki. Kananqa fiërru yüguwan yügushqanönami runakuna kaykäyan. 14 Fiërru yüguta matankankunaman imayka churaqnömi llapan nación runakunata Babiloniapa mandaqnin rey Nabucodonosorpa munayninman churashä. Jirka uywakunatapis paypa makinmanmi churashä. Israel runakunata kuyaq y llapanta mandaq Tayta Dios karmi tsaynö nï’ ”.
15 Tsaynö ninqanta willarmi mastapis profëta Jeremías nirqan: “Hananías, shumaq wiyamay. Qamtaqa Tayta Dios manami kachamushushqaykitsu. Llullakurmi llapan runakunata llutanta criyiykätsinki. 16 Tsaymi Tayta Dios nin: ‘Llullapanqaykita criyirmi runakuna cäsukayämannatsu. Tsaymi kay watallacho wanutsir kay patsapita illakätsishayki’ ”.
17 Ninqannöllami tsay watalla qanchis killacho profëta Hananías wanurqan.