Yüguta watakurkur Jeremías willakunqan
27
Josíaspa tsurin Sedequías† Judá nacionpa mandaqnin rey kayta qallaykunqan witsanmi Jeremíasta Tayta Dios nirqan: 2 “Yüguta ruraskir matankaykiman waskawan watakuy. 3 Musyanqaykinöpis rey Sedequíaswan willanakuyänanpämi Edompita, Moabpita, Amónpita, Tirupita y Sidónpita Jerusalénman autoridäkuna shayämushqa.a Yüguta watakurkur tsay qorikaq runakunata ninqäta willay. 4 Tsay runakunata ninki nacionninkunaman kutiykur mandaqnin reykunata willar niyänanpä:“ ‘Israel runakunata kuyaq y llapanta mandaq Tayta Diosmi nin: 5 Munaynïwanmi kay patsata, runakunata y imayka uywakunatapis kamashqä. Pitapis destinanqä runapa makinmanmi tsaykunata churä. 6 Kananqa noqami nacionnikikunata Babiloniapa mandaqnin rey Nabucodonosorpa makinman churashqä. Nacionnikicho kaykaq jirka uywakunatapis paypa makinmanmi churashqä. 7 Tsaynöllami llapan nación runakuna Nabucodonosorpa munaynincho, tsurinpa munaynincho y willkanpa munaynincho kayanqa. Tsaypitanami atska nacionkuna y munayyuq reykuna Babilonia soldädukunata vincirnin munayninman churayanqa.
8 “ ‘Mayqan nación runakunapis Babiloniapa mandaqnin rey Nabucodonosorpa munaynincho kawayta mana munaptinqa noqami castigashä. Tsaynö castigaptïmi wakin runakuna guërracho wanuyanqa, wakin mallaqaywan wanuyanqa y wakinkunana pesti qeshyawan wanuyanqa. Tsaynöpami tsay nación runakuna llapan ushakäyanqa. Noqa Tayta Diosmi tsaynö nï.
9 “ ‘Tsaynö kaykaptinqa Babilonia nacionpa mandaqnin reyta mana sirviyänaykipä pipis willayäshuptiki ama cäsuyaytsu. Willakuqkuna profëta kayanqanta niyaptinpis, adivïnu kayanqanta niyaptinpis, suëñu adivinaq kanqanta niyaptinpis o brüju kayaptinpis ama cäsuyaytsu. 10 Tsaynö niyäshurnikiqa llullapaykäyäshunkimi. Paykunata cäsuyaptikiqa markaykikunapitami maytsaypa qarquyäshayki. Tsaychömi wanur ushakäyanki.
11 “ ‘Mayqan nación runakunapis Babiloniapa mandaqnin reyta cäsukur payta sirviq kaqqa nacionllanchömi chakrankunacho murukur kawayanqa. Noqa Tayta Diosmi tsaynö nï’ ”.
12 Judá nacionpa mandaqnin rey Sedequíastapis nirqämi: “Babilonia nacionpa mandaqnin reypa munaynincho kawayay. Pay mandanqanta y autoridäninkuna mandayanqanta imatapis rurayay. Tsaynö cäsukurqa añawmi kawayanki. 13 Payta mana wiyakurmi itsanqa wanuyanki. Tayta Dios ninqannöllami wakinniki guërracho wanuyanki, wakinniki mallaqaywan wanuyanki y wakinniki pesti qeshyawan wanuyanki. 14 Tsaynö kananpä kaykaptinqa mayqan profëtapis Babiloniapa mandaqnin reyta mana sirviyänaykipä nishuptiki ama cäsuyaytsu. Paykunaqa llullapäyäshunkimi. 15 Tsaymi Tayta Dios nin: ‘Tsay profëtakunata manami kachamushqätsu. Paykunaqa llullakurninmi jutïta joqarir parlaykäyan. Tsay profëtakuna niyanqanta wiyakuyaptikiqa nacionnikikunapitami qarquyäshayki. Tsaynöpami maytsaychöpis wanuyanki qamkunapis y llutanta yätsishuqniki profëtakunapis’ ”.
16 Tsaynöllami sacerdötikunata y llapan runakunatapis willar nirqä: “Tayta Diosmi nin: ‘Templupita Babiloniaman apayanqan manëjukunata kutitsiyämunanpäna kanqanta niyäshuptikipis ama criyiyaytsu.b Tsaynö parlayanqanqa manami rasunpaypatsu. 17 Tsaynö niyäshunqaykita cäsukuyänaykipa trokinqa Babilonia nación reypa makincho kawayay. Paypa makincho kayaptikiqa manami wanutsiyäshunkitsu. ¿Imanirtä markaykikuna ushakäyanman? 18 Tsay runakuna rasunpaypa profëta karqa templupita apakuyanqan manëjukunata kutitsiyämunanpäna kanqanta manami niyäshunkimantsu. Tsaypa trokinqa templucho, palaciucho y Jerusaléncho quëdaq kaq manëjukunata Babiloniaman mana apayänanpämi rugakayämanman’.
19-21 “Israel runakunata kuyaq y llapanta mandaq Tayta Diosmi mastapis nin: ‘Babiloniapa mandaqnin rey Nabucodonosormi ñöpata shamur Judá nacionpa mandaqnin rey Jeconíastac † prësu apakurqan. Tsaynöllami prësu apakurqan Judácho y Jerusaléncho kaq respitädu runakunatapis. Itsanqa manami aparqantsu templucho kaykaq ishkay jatunkaray columnakunata, jatunkaray lavatoriuta, carrëtakunata†, Jerusaléncho quëdaq manëjukunata y reypa palaciuncho quëdaq manëjukunatapis. 22 Tsaynö kaptinpis kananqa kutimur tsaykunata llapantami Babiloniaman apakuyanqa. Tsaychömi tsararäyanqa imaypis kayman kutitsimunqäyaq. Noqa Tayta Diosmi tsaynö nï’ ”.