Gedalías kaqman Jeremías aywakunqan
40
Kaychömi qellqaraykan Jeremíasta Tayta Dios ninqan. Babiloniaman prësu apayänanpämi Jerusalén runakunatawan Judá runakunata cadënawan watarkur Ramá markaman soldädukuna qoriyarqan. Jeremíastapis tsaycho wataraykaqta tariykurmi wardiakunapa capitannin Nabuzaradán 2 nirqan: “Kay markata desgracia päsananpä Tayta Diosniki ninqannöllami 3 cumpliykan. Marka mayikikunata tsaynö castigaykan pay ninqanta mana cäsukur jutsata rurayanqanpitami.4 “Cadënawan makipita wataraykaqta paskaskiptï manami prësunatsu kanki. Babiloniaman aywayta munaptikiqa aku aywakushun. Tsaycho alli kawanaykipä noqami rikashayki. Aywayta mana munarqa kaycho quëdakuy. Kay nacioncho maychöpis gustashunqaykicho täkuy.
5 “Kay nacionllacho quëdakuyta munarqa Ahicampa tsurin y Safánpa willkan Gedalías kaqman aywakuy Judá mayikikunawan tsaycho juntu tänaykipä. Gedalíastaqa Judá runakunapa gobernadornin kananpämi Babiloniapa mandaqnin rey churashqa. Kaycho quëdanaykipä o noqawan aywanantsikpäpis qampitami kaykan”.
Tsaynö nirmi mikuyta y qellayta qaraykur Jeremíasta kachaykurqan. 6 Tsaypitanami Ahicampa tsurin Gedalías kaqman Jeremías aywakurqan. Paypa makinchömi Judácho quëdaq runakunawan tarqan.
Gedalías gobernador kanqan
7 Judá runakunapa wakin soldädunkuna y capitanninkuna Jerusalénpita karucho täyaptinmi Babilonia soldädukuna prësu tsariyarqantsu. Paykunami musyayarqan Ahicampa tsurin Gedalíasta gobernador kananpä Babiloniapa mandaqnin rey churanqanta. Tsaynöllami musyayarqan Babiloniaman prësu mana aywaq ollqupis, warmipis y wamrakunapis Gedalíaspa makinchöna kayanqanta. Prësu mana aywaq runakunaqa muchuq runakunami kayarqan.
8 Tsayta musyaskirmi tsay capitankuna mandanqan runakunata pushakurkur aywayarqan Gedalías kaqman. Gedalíasqa Mizpachömi kaykarqan. Tsay aywaq runakuna kayarqan Netaníaspa tsurin Ismael, Careapa tsurinkuna Johanánwan Jonatán, Tanhumetpa tsurin Seraías, Netofacho taq Efaipa tsurinkuna, Maacatcho taq runapa tsurin Jezanías y paykuna kachayanqan llapan runakuna.
9 Chaykuyaptinnami Ahicampa tsurin y Safánpa willkan Gedalías tsay capitankunata y paykunawan aywaqkunata nirqan: “Diospa jutinchömi qamkunata nï Babiloniaa runakunapa makincho kayta mana mantsariyänaykipä. Babilonia nacionpa mandaqnin rey nimanqantsikta rurar allimi kawashun. 10 Noqaqa kay Mizpachömi täshä Babilonia autoridäkuna shayämuptin qamkunapa janaykikuna parlanäpä. Qamkunaqa maychöpis täyanqaykicho üvata, hïgusta, dätiltab y olïvupita rurashqa aceitita wayikikunaman atskata qoriyay”.
11 Tsaynöllami Moabcho, Amóncho, Edomcho y juklä nacionkunacho kaykaq Judá runakunapis musyayarqan Babiloniapa mandaqnin rey juk ishkay Judá mayinkunata kachaykunqanta y Gedalíasta paykunapa gobernadornin kananpä churanqanta. 12 Tsayta musyaskirmi qeshpir aywakuyanqan nacionkunapita Judácho kaykaq markankunaman kutiyämurqan. Kutimurmi Gedalíaswan parlayänanpä Mizpaman aywayarqan. Nirkurnami markankunaman kutiykur üvata, hïgusta y dätilta atskata qoriyarqan.
Gedalíasta wanutsiyta munanqanta Johanán musyanqan
13 Tsay junaqkunallanami Careapa tsurin Johanán y mana rindikuq soldädukunapa capitanninkunapis Mizpaman aywayarqan Gedalíaswan parlayänanpä. 14 Chaykurmi niyarqan: “Amón nación runakunapa mandaqnin rey Baalismi Netaníaspa tsurin Ismaelta wanutsishunaykipä kachamushqa”.
Tsaynö niyaptin Gedalías manami criyirqantsu.
15 Tsaymi Careapa tsurin Johanán Gedalíasta pakayllapa Mizpacho nirqan: “Manarä wanutsishunqaykiyaq pakayllapa aywar Netaníaspa tsurin Ismaelta wanuratsimushä. Tsayta manami ni pipis musyanqatsu. Wanutsishuptikiqa makikicho kaykaq llapan Judá mayintsikkunapis mantsakarmi maytsaypapis aywakur chipyaq ushakäyanqa”.
16 Niptinmi Gedalías nirqan: “Ismaelpä ninqayki manami rasunpaypatsu. Payta ama wanutsiytsu”.