Gedalíasta wanutsiyanqan
41
Tsaypita qanchis killa päsaskiptinnami Ismael jutiyuq runa chunka runakunata pushashqa Mizpa markaman charqan. Ismaelqa karqan Elisamapa willkan y Netaníaspa tsurinmi. Tsaynöpis karqan Judá nacionpa mandaqnin reykuna casta y rey Sedequíaspa yanapaqnin autoridämi. Chaykurmi Gedalíaswan mikur upur jamaräyarqan. 2 Mikuykäyanqanchömi pushanqan chunka runakunawan illaqpita Gedalíasta espädanwan wanuskatsiyarqan. Gedalíasta Judá nacionpa gobernadornin kananpämi Babilonia nacionpa mandaqnin rey churashqa karqan. Tsaynö kaykaptinpis mana mantsariypami wanutsiyarqan. 3 Tsaynöllami Mizpacho Gedalíaswan kaykaq Judá runakunata y Babiloniaa soldädukunatapis wanutsiyarqan.4 Gedalíasta wanutsiyanqanta manarä musyarmi waraynin junaq 5 Siquempita, Silupita y Samariapita puwaq chunka (80) runakuna chäyämurqan. Jerusalén markata ushakätsiyanqanpita pasaypa llakikurmi paykuna kaykäyarqan shaprankunata rutukushqa, latsapankuna rachishqa y qarankunapis roqur ushashqa. Paykunami apayämurqan tsaki mikuy ofrendakunata y inciensiuta Tayta Diospa templunman churayänanpä.
6 Tsay runakuna Mizpaman manarä chäyaptinmi Netaníaspa tsurin Ismael waqaraykar taripaq aywarqan. Tinkuskirmi nirqan: “Markaman aku yaykushun Gedalíaswan tinkuyänaykipä”.
7 Markaman yaykuskiyaptinnami Ismaelqa wanutsikuq mayinkunawan tsay runakunata wanuratsiyarqan. Wanuskatsirmi pözuman ayankunata jitarpuyarqan. 8 Manarä wanutsiyaptinmi tsay puwaq chunka runakunapita chunka runakuna Ismaelta rugakur niyarqan: “Taytay, ama wanutsiyämaytsu. Mana wanutsiyämaptikiqa jirkacho pakaraykätsiyanqä trïguta, cebädata, aceitita y abëjapa mishkintami qarayäshayki” nir.
Tsaynö niyaptinmi wakin kaqta wanutsirpis rugakuq kaqkunata wanutsiyarqannatsu.
9 Ayakunata Ismael jitarpunqan pözuqa rey Asa† unay ruratsinqan pözumi karqan. Tsay pözuta uchkutsirqan Israel nacionpa mandaqnin rey Baasawan pelyanqan witsanmi. Tsay pözuman juntaqpämi ayakunata Ismael jitarpurqan.
10 Nirkurnami Ismael prësu tsarirqan reypa warmi tsurinkunatawan Mizpacho quëdaq wakin runakunata. Tsay runakunataqa wardiakunapa capitannin Nabuzaradánmi Gedalíaspa makincho jaqiykurqan. Paykunata prësu apakurkurmi Amón nacionman Ismael aywakurqan.
Prësu apanqan runakunata Ismaelpa makinpita qechuyanqan
11 Careapa tsurin Johanán y paywan kaykaq capitankunami musyaskiyarqan runakunata Ismael wanutsinqanta. 12 Tsaymi llapan runakunata qoriskir aywayarqan Ismaelwan pelyayänanpä. Qatiparmi taripäyarqan Gabaóncho kaykaq jatun tanki ñöpancho.† 13 Ismael prësu apaykanqan runakuna Johanánta y paywan aywaykaq capitanninkunata rikaskirmi pasaypa kushikurnin 14 paykunaman jinan höra takukäyarqan. 15 Ismaelnami puwaq yanapaqninkunallawan qeshpir Amón nacionman aywakuyarqan.
16 Prësu apaykanqan runakunami kayarqan soldädukuna, warmikuna, wamrakuna y autoridäkuna. Paykunatami Johanánqa yanapaqnin capitankunawan Ismaelta Gabaóncho qechumur 17 Belénpa ñöpancho kaykaq Gerut-quimamman pusharqan. Tsaychömi patsakuyarqan tsayllapitana Egiptuman aywakuyta yarpar. 18 Tsaynö aywakuyta yarpäyarqan Babiloniapa mandaqnin rey churanqan gobernador Gedalíasta Ismael wanutsinqanpita pasaypa mantsarirmi.