4 Tsaynö niyaptinmi Jeremías nirqan: “Rugakayämanqaykinömi Tayta Diosnintsikta mañakushä. Nirkurnami pay nimanqanta llapanta willayäshayki”.

5 Niptinmi Jeremíasta niyarqan: “Tayta Dios nishunqaykitaqa munar mana munarpis cäsukuyäshämi. Mana cäsukuyaptïqa Tayta Dios castigayämätsun. 6 Gustükunapä kaptin mana kaptinpis Tayta Diosnintsik ninqanta willayämaptikiqa wiyakuyäshämi. Tsaypämi qamta mañakuykäyä. Tayta Diosnintsik niyämanqanta wiyakurqa allimi kawayäshä”.

7 Tsaypita chunka junaqtami imata ninanpäpis Jeremíasta Tayta Dios tantiyatsirqan. 8 Tsaymi Careapa tsurin Johanánta, yanapaqnin capitankunata y wamrakunapita qallaykur awkinkunayaq llapan runakunata qorirqan. 9 Paykunatami Jeremías nirqan: “Israel runakunata kuyaq Tayta Diosta mañakunäpä rugakayämanqaykinöllami payta mañakushqä. Paymi nin: 10 ‘Qamkunata castiganqäpita pasaypami pësakü. Tsaymi kay nacionllacho quëdakuyaptiki yanapayäshayki. Ñöpataqa wayita juchutsiqnö y qewata llukiriqnömi qamkunata castigashqä. Kananqa wayita shäritsiqnö y plantata plantaqnömi yanapayäshayki.

11 “ ‘Babilonia nacionpa mandaqnin reyta mantsashqa karpis amana mantsayaynatsu. Tsay reypa munayninpita qamkunata jipimunäpämi kaykä. Noqa Tayta Diosmi tsaynö nï. 12 Qamkunata kuyarmi Babilonia nacionpa mandaqnin reypa shonqunmanpis kuyapäkuyta churashä markaykikunacho kachaykuyäshunaykipä.

13 “ ‘Paqtä mana cäsukamar niyankiman: “Kay nacioncho amana täshunnatsu. 14 Tsaypa trokinqa Egiptuman aywakushun. Tsaychöqa manami guërratapis rikashuntsu ni guërrapä cornëta waqamuqtapis wiyashuntsu. Mallaqaypitapis tsaychöqa manami wanushuntsu. Tsaychöqa añawmi täkushun”.

15 “ ‘Kay nacioncho quëdaq Judá runakuna, kanan nikanqäta shumaq wiyakuyay. Israel runakunata kuyaq y llapanta mandaq Tayta Dios karmi nï: Egiptuman aywayaptikiqa 16 espädawan wanuyta mantsayaptikipis wanutsiyäshunkimi. Mallaqaywan wanuyta mantsarpis mallaqaywanmi ushakäyanki. 17 Egiptucho tarqa wakinnikimi guërracho wanuyanki, wakinniki mallaqaywan wanuyanki y wakinnikina pesti qeshyawan wanuyanki. Qamkunata castigaptï manami mayqaykipis kawaykar quëdayankitsu.

18 “ ‘Israel runakunata kuyaq y llapanta mandaq Tayta Dios karmi nï: Jerusaléncho taqkunata pasaypa rabyanar castiganqänömi qamkunatapis Egiptupa aywayaptikiqa castigayäshayki. Pasaypa maldicionashqa kayaptikimi pïmaypis pasaypa mantsariyanqa. Manakaqman churayäshurnikimi jamuräyäshunki. Mananami kay nacionnikikunaman imaypis kutiyämunkinatsu’ ”.

19 Tayta Dios tsaynö ninqanta willarmi Jeremías nirqan: “Judácho quëdaq runakuna, Egiptuman aywayänaykita Tayta Dios manami munantsu. Tsayman aywayaptikiqa castigayäshunaykipä kanqantami willashqä. Tsayta shumaq tantiyakuyay. 20 Qamkunaqa janan shonqullami Tayta Diosnintsikta rugakunäpä mañakayämashqayki. Mañakamarmi niyämashqayki: ‘Tayta Diosnintsikta noqakunapä rugakuykullay. Pay ninqantaqa cäsukuyäshämi’. 21 Pay ninqanta willaptïpis manami wiyakuyta munayankitsu. 22 Tsaynö kaykaptinqa shumaq tantiyakuyay. Egiptuman aywarpis wanuyankimi. Wakinniki guërracho wanuyanki, wakinnikimi mallaqaywan wanuyanki y wakinnikinami pesti qeshyawan wanuyanki”.