Mana cäsukur Egiptuman aywayanqan
43
Tayta Dios tsaynö ninqanta Jeremías willayta ushaskiptinmi 2 Osaíaspa tsurin Azarías, Careapa tsurin Johanán y paykunawan kaykaq runakunapis runa tukurnin niyarqan: “¡Qamqa llullakuykankimi! ¡Tayta Diosnintsik manami nishushqaykitsu Egiptuman mana aywayänäpä! 3 Tsaytaqa Neríaspa tsurin Barucmi yachaykätsishunki Babiloniaa runakunapa makincho kanantsikta munar. Barucqa munaykan Babilonia runakuna wanutsiyämänanta o prësu apayämänantami”.4 Tsaynö nirmi Careapa tsurin Johanán, capitankuna y paywan kaykaq llapan runakuna Judácho quëdayänanpä Tayta Dios ninqanta wiyakuyarqantsu. 5 Wiyakuyänanpa trokinmi Johanán y capitankuna Judácho taykaq runakunata pushakurkur Egiptuman aywakuyarqan. Tsay pushayanqan runakunaqa maytsay nacionman qeshpiyanqanpita tsayrä Judáman kutimuq runakunami kayarqan.† 6 Paykunawanmi aywayarqan Gedalíaspa makincho Nabuzaradán jaqiykunqan runakuna, warmikuna, wamrakuna y Judá nacionpa mandaqnin reypa jipash tsurinkunapis. Tsaynöllami profëta Jeremías y Neríaspa tsurin Barucpis paykunawan aywayarqan. 7 Tayta Dios ninqanta mana cäsukurmi Egiptuman aywar Tafnes markayaq chäyarqan.†
Egiptuta Nabucodonosor atacananpä Jeremías ninqan
8 Tafnescho kaykaptinnami Jeremíasta Tayta Dios nirqan: 9 “Tafnes markacho Faraónpa palaciun punkuman aywaykur ladrilluwan rurashqa pïsuta uchkuskir jatusaq rumikunata pampay. Tsay jananman jipinqayki ladrillukunata kutitsiy. Tsaynö ruray Judá runakunapa rikanancho. 10 Nirkur runakunata ninki: ‘Israel runakunata kuyaq y llapanta mandaq Tayta Diosmi nin: Babilonia nacionpa mandaqnin sirvimaq rey Nabucodonosortami kachamushä kay pampatsinqä rumikuna janancho toldunta ichïtsir trönunta churananpä. 11 Chaykamurmi Egipto runakunata soldädunkunawan atacar vincinqa. Wanuqpä kaqkunaqa wanuyanqami. Prësu aywaqpä kaqkunaqa prësumi aywayanqa. Guërracho espädawan wanuqpä kaqkunaqa guërrachömi wanuyanqa.†
12 “ ‘Egipto runakuna adorayanqan dioskunapa templunkunatapis rupatsiyanqami. Egipto runakuna rurayanqan dioskunatapis wakintami rupatsiyanqa y wakintanami apakuyanqa. Mitsikuq runa latsapanpita ujata jipiqnömi Egipto nacionpa riquëzankunata ashi ashiykur apakuyanqa. Tsaynö ruraskir aywakuptin tsaycho taq runakuna mantsariywan manami imatapis niyanqatsu. 13 Bet-semeschob kaykaq adorayanqan wanka ruminkunatapis pakirmi ushayanqa. Egipto runakuna adorayanqan dioskunapa templunkunatapis llapantami rupatsir ushayanqa’ ”.