3 “ ‘Tsaynö castigashqä pasaypa ajanätsiyämar juk dioskunata adorar^† inciensiuwan qoshnitsiyanqanpitami. Unay castaykikunapis mana adoraykäyaptinmi qamkunaqa tsay dioskunata adorayashqayki. 4 Melanaypä mana allikunata rurar ajanätsiyämanqaykita willayäshunaykipämi sirvimaqnï profëtakunata unaypita patsa kutin kutin qamkunaman kachamurqä.

5 “ ‘Tsaynö kaptinpis manami wiyakayämashqaykitsu ni jutsa ruraytapis jaqiriyashqaykitsu. Tsaypa trokinqa jinallami juk dioskunata inciensiuwan qoshniykätsiyanki. 6 Tsaymi pasaypa rabyanar Jerusalén cällikunacho y llapan Judá markakunachöpis runakunata castigashqä. Tsaymi pasaypa tsunyaq raqällana kaykäyan.

7 “ ‘Israel runakunata kuyaq y llapanta mandaq Tayta Dios karmi nï: Judá runakuna, ¿imanirtä achäquita ashipäyämanki? Tsaynölla ajanätsiyämaptikiqa llapaykikunatami ushakätsiyäshayki: ollqutapis, warmitapis, wamrakunatapis, chuchuykaq wamrakunatapis. 8 ¿Imanirtä ajanätsimar Egiptuchöpis juk dioskunata inciensiuwan qoshniykätsiyanki? Tsaynö rurar kikikikunami wanuyta ashiykäyanki. Tsaymi maytsay nacioncho taqkuna rikayänanpä pasaypa maldicionashqa kayanki.

9 “ ‘Unay castaykikuna, Judácho reykuna y tsay reykunapa warminkunapis qamkunanöllami jutsata rurayashqa. Paykunata castiganqäta ¿qonqaskiyashqaykinaku? Judá nacioncho y Jerusalén cällikunacho warmikikunapis kikikikunapis jutsata rurayanqaykipita castigayanqäta ¿qonqaskiyashqaykinaku? 10 Jutsa ruraykunata kananyaqpis manami kachariyankitsu ni mantsapakuyankitsu. Leynïkunatapis ni estatütükunatapis manami cäsukuyankitsu. Tsay leykunata entregarqä unay castaykikuna cäsukuyänanpä y qamkunapis cäsukuyänaykipämi.

11 “ ‘Tsaymi Israel runakunata kuyaq y llapanta mandaq Tayta Dios kar nï: Tsaynö kayanqaykipitami chipyaq ushakätsiyäshayki. 12 Judápita mana wiyakuypa shamuqkuna, llapaykikunami kay Egiptucho ushakäyanki. Wakinnikimi guërracho wanuyanki y wakinnikinami mallaqaywan wanuyanki. Wamrakunapita qallaykurmi awkinkunayaq wanuyanki. Penqakuypä kayaptikimi runakuna chikiyäshurniki maldicionayäshunki. Qamkunata castiganqäta musyarmi mantsakashqa rikakuyanqa.

13 “ ‘Imanömi Jerusaléncho taqkunata castigarqä, tsaynöllami Egiptucho taykaqkunatapis castigayäshayki. Tsaymi wakinniki guërracho wanuyanki, wakinniki mallaqaywan wanuyanki y wakinnikina pesti qeshyawan wanuyanki. 14 Judápita Egiptuman aywakuqkuna manami mayqaykipis kawaykar quëdayankitsu. Judácho täyänaykipä kutiyta munarpis juk ishkay qeshpiqkunallami kutirpis kutiyanki’ ”.

15 Jeremías tsaynö ninqantami atska runakuna wiyayarqan. Tsaychömi Patros particho taq runakunapis kaykäyarqan. Warminkuna juk dioskunata adorar inciensiuwan qoshnitsiyanqanta musyaqkuna y tsaycho kaykaq llapan warmikunapis Jeremíastami niyarqan: 16 “Tayta Diospa jutincho willayämanqaykita manami cäsukuyäshätsu. 17 Tsaypa trokinqa imanöpis rurayänäpä yarpaykäyanqänömi rurayäshä. Ciëlupa Maman diösapä^† mana kachaypami inciensiuwan qoshnitsirnin vïnuta wiñapäyäshä. Payta adoraykäyanqänöllami unay castäkunapis, mandamaq reykunapis y autoridänïkunapis Judá markakunacho y Jerusalén cällikunachöpis adorayarqan. Tsaynö rurayaptin mikuynïkunapis manami pishiqtsu. Ima desgraciapis mana päsayämaptinmi kushishqa kawakuyarqä. 18 Ciëlupa Mamanpä inciensiu qoshnitsiyta y vïnu wiñapayta kachaskiyanqä junaqpitami itsanqa pasaypa muchuycho kawayashqä. Runakunapis wakinqa guërracho wanuyashqa y wakinnami mallaqaywan wanuyashqa”.

19 Mastami warmikuna niyarqan: “Ciëlupa Maman diösa niraq wawata ruraykur inciensiuwan qoshnitsiyanqäta y vïnuta wiñapar adorakuyanqätami qowäkunapis musyayan”.

20 Tsaynö niyaptinmi runakunata y warmikunata Jeremías nirqan: 21 “Tsaykunata rurayanqaykita ¿Tayta Dios mana musyanqantaku o qonqaykunqantaku qamkuna yarpäyanki? Payqa musyanmi unay castaykikuna, reykuna, autoridäkuna, Judácho taq runakuna y kikikikunapis juk dioskunata adorayanqaykita. Tsaynöpis musyanmi llapan Judá markakunacho y Jerusalén cällikunacho inciensiuwan qoshnitsiyanqaykita.

22 “Tsaynö llutanta rurar ajanätsiyanqaykipitami Tayta Dios castigayäshushqayki. Tsaymi kananqa llapan nacionnintsikcho markakunapis raqällana kaykan. Mantsariypä maldición päsashqami kaykäyan. 23 Tsaynö castigashqa kaykantsik Tayta Diosta ajanätsir juk dioskunapä inciensiuwan qoshnitsiyanqaykipitami. Pay ninqanta mana cäsukurmi leyninkunata, estatütunkunata y mandanqankunatapis cumpliykäyankitsu”.

24 Tsaynöllami tsaycho qorikashqa runakunata y warmikunata mastapis Jeremías nirqan: “Kay Egiptucho taykaq Judá runakuna, Tayta Dios ninqanta wiyakuyay. 25 Israel runakunata kuyaq y llapanta mandaq Tayta Diosmi nin: ‘Warmikikunawanmi awniyarqayki Ciëlupa Mamanpä vïnuta wiñapäyänaykipä y inciensiuwan imaypis qoshnitsiyänaykipä. Tsaynöllami niyarqayki tsay awniyanqaykita imanöpapis cumpliyänaykipä. Tsay niyanqaykinölla llapantapis rurayta munaykarqa tsaynö rurayay ari.

26 “ ‘Egiptucho taykaq Judá runakuna, noqa Tayta Dios ninqäta shumaq wiyakayämay. Kananpitaqa llapan Egiptucho manami mayqaykipis jutïta joqariyankinatsu “Tayta Diospa jutinchömi jurä” nir. Kikïpa jutïcho jurarmi tsaynö nï. 27 Qamkunata yanapanäpa trokin castiganäpä listumi kaykäshä. Egiptucho taykaq Judá runakuna, wakinnikimi guërracho wanuyanki y wakinnikinami mallaqaywan wanuyanki. Qamkunataqa llapaykitami ushakätsiyäshayki.

28 “ ‘Egiptucho guërrapita qeshpir juk ishkayllami Judá nacionman kutiyanqa. Ninqänö päsaptinmi tantiyakuyanki noqa ninqä rasunpaypa kanqanta y qamkuna niyanqayki mana alli kanqanta. 29 Ninqänöllami kay nacioncho castigayäshayki. Tsayta musyayänaykipämi 30 Egipto nacionpa mandaqnin rey Hofrata contrankunapa makinman churashä. Tsayta rurashä Judá nacionpa mandaqnin rey Sedequíasta Nabucodonosorpa makinman entreganqänömi.^† Noqa Tayta Diosmi tsaynö nï’ ”.