51
Tayta Diosmi nin:“Babilonia runakunata ushakätsiyänanpämi imaykatapis ushakätsiq shukukuy wayratanö contrankunata kachamushä.
2 Tsay junaqmi Babilonia runakunata maytsaypitapis atacayanqa.
Trïgu päjata jurquitawan jitariqnömi runakunata nacionninpita qarquyanqa.
Tsaymi tsay nacioncho ni juk runallapis täyanqanatsu.
3 “Atacaq soldädukuna, Babilonia soldädukunata mana kuyapaypa chipyaq ushakätsiyay.
Flëchankunata kamarikuyänanta ama kachapäyaytsu.
Pelyayänanpä chalëcunkunata jatikuyänantapis ama dëjayaytsu.
4 Wanutsiyaptikimi Babiloniaa nación markakunapa cällinkunacho ayakuna mashtaräyanqa.
5 Llapanta mandaq Tayta Dios karmi Israel runakunata y Judá runakunata mana qonqaypa yanapashä.
Kuyaqnin santu Tayta Dios kaykaptïpis ajanätsimarmi nacionnincho pasaypa jutsata rurayarqan.
Tsaynö kashqa kaptinpis paykunapa jananmi shärishä.
6 “¡Kuyanqä runakuna, Babilonia nacionpita aywakuyay!
¡Imanöpapis qeshpir aywakuyay!
¡Jutsata rurayanqanpita castïgu shamuptin mana wanuyänaykipä qeshpir aywakuyay!
Paykunata pasaypa castiganä junaq chämushqanami.
Tsaymi jutsata rurayanqanman tupu castigashä.†
7 “Babilonia runakunaqa qoripita rurashqa cöpanömi makïcho kayashqa.
Ajanaynïqa tsay cöpacho machätsikuq vïnunömi kashqa.
Tsaymi Babilonia runakuna atacayaptin maytsay nacionkuna machashqa runakunanö löcuyäyashqa.†
8 “¡Babilonia ushakashqanami!
¡Illaqpitami ushakashqa!†
¡Babilonia nacionpä llapaykikuna waqayay!
¡Däñakunqanta jampiyänanpä ima jampillatapis ashiyay!
Jampiyaptiki capazchi alliyanqapis.
9 “Babiloniacho taykaq Judá runakunami niyanqa:
‘Babilonia nacionta imanö jampirpis manami alliyätsiyta kamäpakuyashqätsu.
Jutsankunapis ciëluyaqmi chashqa.†
Tsaynö kaykaptinqa kachariykur nacionnintsikkunaman llapantsik kutikushun.
10 Tayta Dios allimi yanapamashqantsik.
Tayta Diosnintsik imanö yanapamanqantsikta willakunantsikpä Siónman llapantsik aywashun’.
11 “Media nacionpa mandaqnin reykuna, ¡soldäduykikuna flëchankunata afilakuyätsun!
¡Guërracho tsapakuyänan escüdunkunatapis kamarikuyätsun!
¡Babilonia nacionta ushakätsiyänanpä aywayätsun!
Babilonia runakuna templüta ushakätsinqanpitami paykunatapis chipyaq ushakätsishä.
12 ¡Babilonia markapa murällanta juchuskatsir atacaq yaykuyänanpä bandërata jawiyay!
¡Soldäduykikuna atskaq kayätsun trukanakuyänanpä!
¡Rikachakuqkunatapis maytsayman churayay!
¡Pakakuykur atacayänaykipä shumaq kamarikuyay!
Babilonia runakunata imanö ushakätsinäpä yarpanqänöllami ushakätsishä.
13 “Babilonia runakuna, jatusaq mayukuna kuchunkunacho täyaptikipis† y imayka riquëzayuq kayaptikipis ushakäyänaykipä höra chämushqanami.
Kanan kayanqaykinö manami imaypis kayankinatsu”.
14 Llapanta mandaq Tayta Diosmi kikinpa jutincho jurar nin:
“Noqami contraykikunata atska chukllushkunatanörä kachamushä.
Tsaymi vinciyäshurniki kushikuypita qayaräyanqa”.
Tayta Diosta alabar cantanqan
15 Tayta Diosmi munayninwan kay patsata kamashqa.
Yachaq kayninwanmi kay munduta takyätsishqa.
Yarpayyuq kayninwanmi ciëlutapis kamashqa.
16 Pay mandaptinmi ciëlucho kaykaq yakupis qayarämun,
pukutaypis patsapa kuchunpita shärimun,
tamyanqan höra illaqukuypis chipikyämun
y wayrapis churaräkunanpita yarqamun.†
17 Runakunaqa llapanpis upanö karmi imatapis mana tantiyaq kaykäyan.
Ïdulukunata rurayanqanpitami penqakuyanqa.
Tsay ïdulukunaqa manami imatapis rurayantsu.
Runakuna yärakuyaptinpis manami pitapis yanapayanqatsu.
18 Tsay ïdulukunaqa asipaypämi kayan.
Tayta Dios castiganan junaqmi tsay ïdulukuna ushakäyanqa.
19 Jacob yärakunqan Tayta Diosqa manami ïdulukunanötsu.
Paymi llapan imaykatapis kamashqa.
Herencian kanantsikpämi akramashqantsik.
Jutinpis llapanta mandaq Yahwehmi kaykan.
Tayta Diospa martillunnö Babilonia runakuna kayanqan
20 Mastami Tayta Dios nin:
“Babilonia runakuna, qamkunaqa martillünö† y guërracho pelyapä armänömi kaykäyanki.
Qamkunawanmi nacionkunata y reykuna mandanqankunata ushakätsï.
21 Qamkunawanmi cawallukunatapis muntaraqnintinta y guërra carrëtakunata manijaqnintinta ushakätsï.
22 Qamkunawanmi ushakätsï runakunata, warmikunata, awkinkunata, wamrakunata, chölukunata y jipashkunatapis.
23 Qamkunawanmi ushakätsï üshayuqkunata üshantinta, yuntakunata barbichaqnintinta y autoridäkunatapis yanapaqnintinta.
Babilonia runakunata castigananpä ninqan
24 “Babilonia runakunaqa Sión runakunata pasaypami ñakatsiyashqa. Tsaynö ñakatsiyanqantaqa kikikikunami rikayashqayki. Tsaymi Babilonia runakunata pasaypa castigashä. Noqa Tayta Diosmi tsaynö nï.
25 “Noqa Tayta Diosmi nï:
Babilonia nación, qamqa ushakätsikuq jirkanömi kaykanki.
Llapan nacionkunatami ushakätsinki.
Tsaymi qampa contrayki kaykä.
Jatun jirkata juchutsir ushakätsiqnömi qamtapis castigar ushakätsishayki.
Ushakätsiptïmi ninawan rupashqa jirkanö kanki.
26 Imayyaqpis tsunyaqllami kanki.
Qamcho kaykaq rumikunata wayipa cimientupä ni pirqanpäpis manami pipis apanqatsu.
Noqa Tayta Diosmi tsaynö nï”.
27 ¡Babiloniaman pelyaq aywayänanpä maytsaychöpis bandërata jawiyätsun!
¡Llapan nacioncho cornëtata tukayätsun!
¡Pelyayänanpä llapan runakuna kamarikuyätsun!
¡Ararat, Mini y Askenaz nacionkunapis pelyaq aywayätsun!
¡Pelyacho mandananpä capitanta churayätsun!
¡Muntashqa aywaqkunapis atska chukllushkunanörä aywayätsun!
28 ¡Llapan nacionkunapis kamarikuyätsun atacaq yaykuyänanpä!
¡Tsaynöpis Media nación reykuna, capitankuna, autoridäkuna y tsaycho kaykaq llapan runakuna kamarikuyätsun!
29 Babilonia runakunataqa yarpanqannöllami Tayta Dios castiganqa.
Tsaymi kay patsapis pasaypa mantsarir tsuktsukyanqa.
Babilonia nacionta chipyaq ushakätsiptinmi pipis tsaycho tanqanatsu.
30 Babilonia soldädukuna mananami pelyayta munayanqanatsu.
Murallashqa markankunallachömi pakaräkuyanqa.
Kallpankunapis pasaypami ushakanqa.
Imayka warminömi pasaypa mantsariyanqa.
Marka murällapa punkunkunata pakiskirmi contrankuna yaykuyanqa.
Yaykuskirmi wayikunatapis rupatsir ushayanqa.
31 Babilonia nacionpa mandaqnin reyta willayänanpämi qatinakurrä aywayanqa.
Chaykurmi willayanqa contrankuna vincir markanman yaykuykäyanqanta,
32 mayu tsimpakuyänan vädukunachöpis juntaraykäyanqanta,
amparakuyänan wayikunata rupaykätsiyanqanta
y llapan soldädunkunapis pasaypa mantsarishqa kaykäyanqanta.
33 Israel runakunata kuyaq y llapanta mandaq Tayta Diosmi nin:
“Babilonia nacionqa ëracho trillatsiyänanpä qoturaykaq trïgunömi kaykan.
Babilonia runakunapä castïgu chämunanpänami kaykan”.
34 Jerusalén runakunami niyanqa:
“Babilonia nacionpa mandaqnin rey Nabucodonosormi yaqa allqunö ichik ichik rachiykar ushakätsiyämashqa.
Imayka jäkuq plätutanömi jaqiyämashqa.
Lamarcho mantsariypä pescädunömi ultakarkayämashqa.
Munanqan kaqta pacha junta mikukurkurmi lanzapakayämashqa.
35 Noqakunata atacayämanqannölla kikin Babilonia runakunatapis atacayätsun.
Castäkunata wanutsiyanqannölla kikinkunatapis wanutsiyätsun”.
36 Tsaymi Jerusalén runakunata Tayta Dios nin:
“Noqa juzgarmi contraykikunata pasaypa castigashä.
Paykunata castigarmi mayunkunatawan pashtaq yakunkunatapis chipyaq tsakitsishä.
37 Castigaptïmi Babilonia marka pasaypa juchutsishqa rikakunqa.
Munti uywakunallanami tsaycho täyanqa.
Tsayta rikarmi runakuna mantsakashqa umanta awikuyanqa.
Manami pï runapis tsaycho tanqanatsu.
38 “Babilonia runakunaqa leonkuna qayaraqnörämi qayaräyan.
Mallwa leonkunanörämi waqayanpis.
39 Mallaqaykäyanqan hörami juk banquëtita paykunapä churapäshä.
Tsay banquëticho mikur upyarmi machashqa punukuyanqa.
Tsaypitaqa manami imaypis rikchayämunqanatsu.b
Noqa Tayta Diosmi tsaynö nï.
40 Camalman pishtayänanpä uywakunata apayanqannömi Babilonia runakunatapis wanutsinäpä apashä.
Üshakunata, carnërukunata y chïvukunata apayanqannömi apashä.
41 “¡Pïmaypis alabanqan Babilonia runakuna vincishqami kanqa!
Tsaynö kaykaqta rikarmi llapan nación runakuna pasaypa mantsakashqa kayanqa.
42 Lamar yaku bötiypa bötir yarqamur maytsayman juntanqannömi Babiloniaman contrankuna juntäyanqa.
43 Babilonia markakunapis pasaypami ushakäyanqa.
Tsunyaq jirkamanmi tikranqa.
Pipis mana tänan y pipis mana purinanmi rikakuyanqa.
44 “Babilonia runakunapa diosnin Beltapis castigashämi.
Llapan mikunqankunatapisc lanzatsimushämi.
Tsaymi mayqan nación runakunapis tsay diosta adoraq aywayanqanatsu.
Babiloniapa murällankunapis chipyaqmi juchur ushakanqa.
45 “Kuyanqä runakuna, Babiloniapita qeshpir aywakuyay.
Kawayta munarqa imanöpapis qeshpir aywakuyay.
Pasaypa rabyanarmi nina rupaqnörä Babiloniata ushakätsishä.†
46 “Autoridäkuna wanutsinakuyanqantami pïmaypis parlayanqa.
Cada watami tsay parlakuna juknö juknö kanqa.
Tsaynö parlayaptinpis ama mantsariyaytsu ni llakikuyaypistsu.
47 “Babiloniacho ïdulukunata ushakätsinäpä kaq junaq chämunqanami.
Tsay ïdulukunata ushakätsiptï llapan nacionmi penqakuycho rikakunqa.
Runakunapa ayankunapis markankunachömi jitaräyanqa.
48 Norti kaqläpita shamurmi Babilonia nacionta ushakätsiyanqa.
Tsaymi ciëlupis, kay patsapis y kay patsacho llapan imayka kaqkunapis kushikuypita cantayanqa.†
Noqa Tayta Diosmi tsaynö nï.
49 Israel runakunata y juklä nación runakunatapis wanutsiyanqanpitami Babilonia runakuna tsaynö ushakäyanqa.†
50 “Wanuypita qeshpiq Judá runakuna, mana ichiypa qeshpir Babiloniapita aywakuyay.
Nacionnikipita karucho karpis noqa Tayta Diosnikikunata yarparäyämay.
Jerusalén markata ama qonqäyankitsu.
51 Qamkunaqa llakikuykäyanki Babilonia runakuna santu templüman yaykur manakaqman churayanqanpitami.
Imaykata ashlliyäshuptikimi pasaypa penqakur umaykikunatapis tsapakurkuyanki.
52 Tsaymi noqa Tayta Dios nï:
Babiloniacho ïdulukunata ushakätsinäpä manami imapis pishinnatsu.
Llapan markakunachömi runakuna nanaywan qayaräyanqa.
53 Babilonia runakunaqa ciëluyaqmi marka murällata shäritsiyashqa.
Tsaynö kaptinpis contrankunata kachaptï ushakätsiyänanpä yaykuyanqami.
Noqa Tayta Diosmi tsaynö nï.
54 “Babilonia ushakanqanpita llakikur qayaräyanqanmi maytsaychöpis wiyakämunqa.
55 Babilonia runakunata noqa Tayta Diosmi ushakätsishä.
Wayrawan atska yaku qayaraqnörämi contrankuna pasaypa qayarar ushakätsiyanqa.
Cällikunacho ima büllapis mananami kanqanatsu.
56 “Noqa Tayta Diosmi mana allikunata rurayanqanman tupu llapanta castigashä.
Tsaymi Babilonia runakunatapis castiganäpä contrankunata kachamushä.
Babiloniata atacarmi pelyayta yachaq soldädunkunatapis prësu tsariyanqa.
Flëchankunatapis pakirmi ushayanqa.
57 Babilonia runakunatami castigashä mandaqninkunata, yachaq runakunata, capitanninkunata, autoridäninkunata y soldädunkunatapis.
Pasaypa machashqanö punurmi imaypis rikchayämunqanatsu”.
Tsaynömi nin mandamaqnintsik rey.
Jutinpis llapanta mandaq Yahwehmi kaykan.
58 Llapanta mandaq Tayta Diosmi nin:
“Babilonia markapa murällan anchu kaptinpis chipyaqmi juchutsiyanqa.
Jatusaq punkunkunatapis rupatsirmi ushayanqa.
Tsay markata shumaqyätsir maytsay nación runakunata arutsiyanqanpis wallällami kanqa.
Pasaypa pishipar aruyanqantapis ninami rupar ushanqa”.
Jeremías qellqanqanta Babiloniaman apanqan
59 Juk runami karqan Seraías jutiyuq. Payqa Neríaspa tsurin y Maasíaspa willkanmi karqan. Seraíasqa rey Sedequíaspa yanapaqninmi karqan. Tsaymi rey Sedequías Seraíasta pushakurkur Babiloniaman aywarqan. Tsaynö aywarqan Judá nacioncho chusku watana rey kaykarmi.
Seraíastami profëta Jeremías juk rölluta apatsirqan. 60 Tsay apatsinqan röllumanmi Jeremías qellqarqan Babilonia nacionta ima desgracia päsananpä kanqantapis. Babiloniata ima päsananpä kaqta Jeremías llapan ninqankunapis tsay rölluchömi qellqaraykarqan.
61 Apatsirmi Seraíasta Jeremías nirqan: “Babiloniaman chaykur kay röllupita mana qonqaypa jinchi liyipanki. 62 Liyipaskir Tayta Diosta mañakur ninki: ‘Tayta Dios, qammi nishqayki kay nacionta ushakätsinaykipä. Tsaymi runapis ni ima uywapis kaycho kanqanatsu. Pasaypa tsunyaqmi imayyaqpis kanqa’.
63 “Liyiyta ushaskirna kay rölluman rumita watarkur Éufrates mayuman jitarinki. 64 Jitarir ninki: ‘Kay jitarinqä röllu tallpukaqnömi Babiloniapis illakanqa. Tayta Dios castigaptinqa manami yapay imaypis kanqanman kutinqanatsu’ ”.†
Kayyaqllami qellqaraykan Jeremías willakunqankuna.