Ïdulukuna manakaqllapä kayanqan
“Juklä nación runakunanöqa ama kayaytsu.
Ciëlucho ima señaltapis rikar pasaypa mantsariyaptinpis qamkunaqa ama mantsariyaytsu.
3 Tsay runakunaqa imapäpis mana väliq ïdulukunamanmi yärakuyan.
Tsay ïdulukunata rurayänanpäqa muntipitami qeruta mutuyämun.
Llaqllayta yachaq runawanmi shumaq llaqllatsikuyan.
4 Qoriwan y qellaywan adornarkurmi mana qotukänanpä shumaq clävayan.†
5 Tsay ïdulukunaqa chakracho nunayllunö mana parlaqmi kaykäyan.
Puriyta mana kamäpakuptinmi umrushqa apayan.†
Tsay ïdulukunataqa ama mantsayaytsu.
Manami allitapis ni mana allitapis rurayantsu”.†
6 Tayta Dios, qamnöqa manami pipis kantsu.
Qamqa llapanpä munayyuqmi kaykanki.
7 Maytsay nacionkunapa mandaqnin reymi kaykanki.
Tsaynö kaykaptikiqa ¿pirä mantsapakushunkimantsu?†
May nacioncho yachaq runapitapis mas yachaqmi kaykanki.
Pïmay reypitapis mas munayyuqmi kaykanki.
Tsaynö kaykaptikiqa ¿pirä mantsashunkimantsu?
8 Ïduluta ruraqkunaqa llapanpis yarpayniynaq mana tantiyakuqmi kaykäyan.
Qerupita rurashqa ïduluqa ¿imatarä runakunata yachatsinqa?
9 Tsay ïdulukunataqa llaqllayta yachaqkunallami rurayan.
Llaqllaskirmi Tarsispita apayämunqan qellaywan y Ufazpita apayämunqan qoriwan laqayan.
Nirkurmi azul y granäti tëlata jirarkur jatitsiyan.
10 Rasunpaypa kaq Diosqa Tayta Diosllami kaykan.
Payqa imayyaqpis kawaq Dios karmi imaypis rey kaykan.
Pay ajanaptinqa kay patsapis tsuktsukyanmi.
Pay castigaptinqa manami mayqan nacionpis awantantsu.
11 Tayta Diosmi nimarqan:
“Ïdulukunata adoraqkunata niy:
‘Adorayanqayki ïdulukunaqa manami kay patsatapis ni ciëlutapis rurayashqatsu.
Tsaykunaqa llapanmi kay patsapita illakäyanqa’ ”.
12 Tayta Diosmi munayninwan kay patsata kamashqa.
Yachaq kayninwanmi kay munduta takyätsishqa.
Yarpayyuq kayninwanmi ciëlutapis kamashqa.
13 Pay mandaptinmi ciëlucho kaykaq yakupis qayarämun,
pukutaypis patsapa kuchunpita shärimun,
tamyanqan höra illaqukuypis chipikyämun
y wayrapis churaräkunanpita yarqamun.†
14 Runakunaqa llapanpis upanö karmi imatapis mana tantiyaq kaykäyan.
Ïdulukunata rurayanqanpitami penqakuyanqa.
Tsay ïdulukunaqa manami imatapis rurayantsu.
Runakuna yärakuyaptinpis manami pitapis yanapayanqatsu.
15 Manakaqllapämi kaykäyan.
Tayta Dios castiganan junaqmi tsay ïdulukuna ushakäyanqa.
16 Jacob yärakunqan Tayta Diosqa manami ïdulukunanötsu.
Paymi llapan imaykatapis kamashqa.
Herencian kanantsikpämi Israel runakunata akramashqantsik.
Jutinpis llapanta mandaq Yahwehmi kaykan.
Judá nacionta ushakätsinqan
17 Judá runakuna, imaykaykikunatapis kamarikuyay. Contraykikunami jirurupaykäyäshunki prësu apakuyäshunaykipä. 18 Tayta Diosmi nin: “Kay nacionpita karumanmi qarquyäshayki. Tsaynö castigaptïmi pasaypa ñakayanki”.
19 Marka mayïkunapä llakikuptïmi shonqu nanay tsariman.
Kay nanaytaqa manami awantänatsu.
Tsaynö kaptinpis alfin imanäshätä.
20 Täkunä toldüpis chipyaqmi ushakashqa.
Tsararaq waskankunapis rachirmi ushakashqa.
Tsurïkunatapis llapantami prësu apakuyashqa.
Mananami ni jukllayllapis quëdashqatsu.
Pïnïpis manami kannatsu yapay toldüta ichïtsinanpä ni cortïnankunata churananpäpis.a
21 Tsaynö desgracia päsayämashqa rey y autoridäkuna yarpayniynaq upa kar Tayta Diosta mana ashiyanqanpitami.
Tsaymi llapan runakunapis maytsaypa mashtakäyashqa.†
22 Judá runakuna, ¡llapaykikuna wiyayay!
¡Nortiläpitami mana alli willakuy chämushqa!
Markantsikkunata illakätsiyänanpäshi atska tröpa soldädukuna shamuykäyan.
Paykuna ushakätsimashqa chacalkunallanami markantsikkunachöpis täyanqa.
Tayta Diosta Jeremías mañakunqan
23 Tayta Dios, qamllami musyanki waray warantin imanö kayänäpä kanqantapis.
Tsayqa manami kikïkunapitatsu kaykan, sinöqa qampitami.†
24 Corrigirpis mana rabyanayllapa corrigiyämay.
Rabyanashqa corrigiyämarqa ushakaskatsiyämankichi.†
25 Rabyanashqa ushakätsiyämänaykipa trokin juk nación runakunata ushakaykatsillay.
Kuyanqayki Israel runakuna kaykäyaptïmi tsay runakunaqa ushakätsiyämashqa.
Llapan kay nacionnikitami chipyaq ushakätsiyashqa.
Tsay runakunaqa manami jutikitapis joqariyantsu ni reqiyäshunkitsu.†