Babilonia runakunata castigananpä ninqan
50
Kaychömi qellqaraykan caldeo runakuna täyanqan Babilonia nacionpä† profëta Jeremíaswan Tayta Dios willakatsinqan.2 “Entëru nacionkunacho willakuyay.
Ninqäkunata maytsaychöpis musyatsiyay.
Pïmaypis musyananpä bandërata jawiyay.a
Juktapis mana qonqaypa willakuyay:
‘¡Babilonia nacionta vinciyashqanami!
¡Bel diosninpis penqakushqami kaykan!
¡Merodac diosninpis pasaypa mantsakashqami kaykan!
¡Ïdulunkunapis penqakur mantsakashqami kaykäyan!’b †
3 “Babilonia nacionta atacayänanpämi norti kaqläpita juk nación runakuna shamuykäyan.
Paykuna chämurmi llapanta tsunyätsiypa ushayanqa.
Runakunapis ni uywakunapis manami kayanqanatsu.
Tsaycho taqkunaqa llapanmi qeshpir aywakuyanqa”.
4 Tayta Diosmi nin:
“Tsay witsanmi Israel runakunawan Judá runakuna Tayta Diosnin kanqäta tantiyakuyanqa.
Tsaymi markankunaman waqaraykar kutimur perdonta mañakayämanqa.
5 Siónmanc aywaq nänipami tapukuraykar kutiyämunqa.
Kutiyämurmi niyanqa:
‘Tayta Diosta cäsukunantsikpä llapantsik templuman aywar paywan pactuta rurashun.
Tsay pactuta imaypis cumplishun’.
6 “Kuyanqä runakunaqa oqrakashqa üshakunanömi kayashqa.†
Autoridäninkuna llutanta rurar kawayaptinmi jirkacho oqrakashqa üshanö puriyashqa.
Jirkakunapa purirmi qenchantapis qonqaykuyashqa.
7 Tsaynö puriykaqta tarirmi pipis mikukurkushqa.
Contrankunami niyashqa:
‘Paykunaqa unay castankuna yärakuyanqan Tayta Diosta manami cäsukuyantsu.
Llapan munayanqanta kamaripaptinpis manami cäsukuyantsu.
Tsaymi paykunata atacarpis jutsatatsu ruraykantsik, sinöqa Diosnin munanqannömi atacaykantsik’.
8 “¡Kuyanqä runakuna, Babiloniapita qeshpir aywakuyay!†
¡Üshakunapa ñöpanta chïvu aywaqnö qamkunapis runakunapa ñöpanta aywayay!
9 Noqami kamakätsishä Babiloniata atacayänanpä.
Norti kaqläpitami munayyuq nacionkuna willanakuskir atacaq aywayanqa.
Atacaqninkunami flëchawan wanutsir Babilonia runakunata vinciyanqa.
10 Babilonia runakunapa imaykantapis apakuyanqami.
Apaytapis mana atipayanqanyaqmi qoriyanqa.
Noqa Tayta Diosmi tsaynö nï.
11 “Babilonia runakuna, kuyanqä runakunata ushakätsir pasaypami kushikuyarqayki.
Alli qewacho pacha junta ternëranörämi kushishqa saltaykachäyarqayki.
Cawallu wishushunqannörämi asikachäyarqayki.
12 Tsaynö kashqa karpis yuriyanqayki nación ushakaptin pasaypami penqakuyanki.
Nacionnikiqa wakin nacionpita mas peormi rikakunqa.
Tsunyaq jirkanömi lliwlliwyaykaq rikakunqa.
13 Pasaypa ajanar ushakätsiptïmi nacionnikicho pipis tanqanatsu.
Tsayta rikarmi runakuna pasaypa mantsakashqa rikakuyanqa.
14 “Babilonia runakunaqa jutsata rurarmi ajanätsiyämashqa.
¡Paykunata atacayänaykipä jiruruypa tsaparäyay!
¡Mana kuyapaypa flëchaykikunawan flëchayay!
15 ¡Entërupa jirurupaykur atacar qayaräyay!
¡Babilonia vincishqanami!
¡Rikachakuna törrinkunapis ishkishqanami!
¡Murällankunapis juchushqanami!
Imanömi qamkunata rurayäshurqayki, tsaynö kikinkunatapis rurayay.
Noqa castigaptïmi Babilonia runakunata tsaynö atacayanki.
16 “¡Babiloniacho murukuqkunatapis llapanta wanutsiyay!
¡Mikuy qoriqkunatapis llapanta ushakätsiyay!
Babiloniaman prësu apayanqan runakunapis nacionninkunaman kutikuyätsun.
Babiloniacho mantsariypä guërrata rikar markankunaman qeshpir aywakuyätsun.†
17 “Israel runakunaqa jirkacho oqrakashqa üshanömi kaykäyan. Ñöpataqa Asiria nacionpa mandaqnin reymi mallaqashqa leonnö paykunata wanutsishqa. Nirkurmi Babilonia nacionpa mandaqnin rey Nabucodonosor tullunkunatapis pakir ushashqa”.
18 Israel runakunata kuyaq y llapanta mandaq Tayta Diosmi nin: “Asiria nacionpa mandaqnin reyta castiganqänömi Babilonia nacionpa mandaqnin reyta y nacionninta castigashä. 19 Israel runakunata nacionninmanmi kutitsimushä. Üshata mitsiqnömi Carmeluchöpis, Basánchöpis, Efraín jallqakunachöpis, Galaadchöpis paykunata rikashä. 20 Tsay tiempu chämuptinmi Israel runakunata y Judá runakunata llapan jutsanpita perdonashä. Kawaykar quëdaqkunataqa llapantami perdonashä. Noqa Tayta Diosmi tsaynö nï”.
21 Tayta Diosmi nin:
“Babilonia nacionpa contrankuna, ¡Merataim particho taqkunata atacayay!
¡Pecod particho taqkunatapis ushakätsiyay!
¡Tsay partikunacho taqkunata chipyaq wanutsiyay!
¡Ninqätaqa llapanta rurayay!
22 Llapan Babilonia nacionchömi mantsariypä guërra wiyakanqa.
Mantsariypämi imaykapis ushakanqa.
23 “Martilluwan imaykatapis pakir ushanqannömi maytsay nacionkunata Babilonia runakuna ushayashqa.†
Kananqa kikin Babilonia nacionpis ushakanqami.
Babilonia ushakanqanta rikar maytsay nación runakunami pasaypa mantsakäyanqa.
24 “Babilonia runakuna, qamkunata castiganäpämi trampata churapashqä.
Mana tantiyakuypami tsay trampaman ishkiyashqayki.
Rabyanätsiyämanqaykipitami watakashqatanö contraykikuna tsariyäshurqayki.
25 “Guërra armäkuna churaräkunantami kicharishqä.
Wanutsikuq armäkunatami tsaypita jipimushqä.
Babiloniad naciontaqa yarpanqänöllami castigashä.
Llapanta mandaq Tayta Dios karmi tsaynö rurashä.
26 “¡Karupita shamuq soldädukuna, Babilonia runakunata atacayay!
¡Tröjankunatapis ushakätsiyay!
¡Nacionninkuna raqällana kananpä ushakätsiyay!
¡Imapis markankunacho ama quëdatsuntsu!
27 ¡Soldädunkunatapis llapanta wanutsiyay!
Paykunata castiganä junaq chämushqanami.
28 “¡Shumaq wiyayay!
Babiloniapita Siónman qeshpimuqkunami willakuykäyan Babilonia runakunata ushakätsinqäta.
Babilonia runakunata ushakätsishqä templüta ushakätsiyanqanpitami.
29 “¡Babiloniata atacayänaykipä flëchawan flëchaqkunata qoriyay!
¡Pipis mana qeshpinanpä llapan marka kuchunpa tsapaskiyay!
¡Rurayanqanman tupu paykunatapis kutitsiyay!†
¡Imanömi jukta rurarqan, tsaynö paykunatapis rurayay!
Paykunaqa conträmi shäriyashqa.
Noqaqa Israel runakunapa santu Tayta Diosninmi kä.
30 Castigaptïmi llapan chölunkuna cällikunacho wanushqa mashtaräyanqa.
Tsay junaqmi llapan Babilonia soldädukunapis wanuyanqa.
Noqa Tayta Diosmi tsaynö nï.
31 “Llapanta mandaq Tayta Dios karmi nï:
Mana cäsukuq runakuna, qamkunapa contraykimi kaykä.
Qamkunata castiganäpä kaq junaq chämushqanami.
32 Qamkunaqa pasaypami ñakayanki.
Ñakayaptikipis manami pipis yanapayäshunkitsu.
Llapan markaykikunata rupatsiptïmi ñöpan chakrakunapis rupar ushakanqa”.
33 Llapanta mandaq Tayta Diosmi nin:
“Israel runakunatawan Judá runakunata Babilonia runakuna pasaypami ñakaykätsiyan.
Paykunata prësu tsariskir manami kachayta munayantsu.
34 Tsaynö kaptinpis noqaqa paykunapa munayyuq salvadorninmi kaykä.
Jutïpis llapanta mandaq Tayta Diosmi kaykan.
Munaynïwan jipimurmi añaw kawayänanpä nacionninman kutitsishä.
Babilonia runakunatami itsanqa pasaypa castigashä”.
35 Tayta Diosmi nin:
“¡Babilonia markakunacho guërralla katsun!
¡Mandaqninkunapä y yachaq runakunapäpis guërralla katsun!
36 ¡Adivïnunkunapis guërrawan löcuyäyätsun!
¡Soldädunkunapis guërrawan mantsarir tsuktsukyäyätsun!
37 ¡Cawallunkunatapis carrëtankunatapis guërracho ushakätsiyätsun!
¡Babiloniata yanapaq juklä soldädukunapis warminö mantsariyätsun!
¡Babilonia runakunapa imaykantapis atacaqkuna apakuyätsun!
38 ¡Babiloniacho mayukunapis tsakiyätsun!
Llapanpis tsaynö päsatsun entëru Babiloniacho ïdulukuna kanqanpita.
Tsay melanaypä ïdulukunaman yärakurmi juiciuynaq kaykäyan.
39 “Babilonia ushakaptinmi munti uywakunalla, chacalkunalla y avestruzkunalla tsaycho täyanqa.†
Tsaycho mananami imaypis wayita ni markatapis shäritsiyanqanatsu.
40 Sodoma, Gomorra y ñöpankunacho kaykaq markakuna ushakäyanqannömi† ushakanqa.
Tsaynö ushakätsiptïmi Babilonia nacioncho pipis tanqanatsu.†
Noqa Tayta Diosmi tsaynö nï.
41 “Norti kaqlä munayyuq nacionpita shayämunanpämi soldädukunapis reykunapis kamarikuykäyan.
Pasaypa karupitami shayämunqa.
42 Paykunaqa flëchankunawan y espädankunawanmi kaykäyan.
Mana alli runa karmi pitapis kuyapäyantsu.
Pelyarpis qayaräyan lamar yaku pulchaqyar qayaraqnörämi.
Cawallun muntashqallami guërrata rurayänanpä kaykäyan.
¡Babilonia runakuna, atacayäshunaykipämi shayämunqa!
43 Tsayta musyaskirmi Babilonia nacionpa mandaqnin rey mantsakashqa rikakunqa.
Qeshyaq warmita nanay tsarinqannömi pasaypa llakikuy tsarinqa.†
44 “Jordán mayu kuchun muntipita yarqamuq leonnömi kashä.
Alli qewacho mikuykaq uywata tsariq leonnömi noqapis illaqpita castigashä.
Tsaymi Babilonia runakuna mantsarirnin qeshpir aywakuyanqa.
Nirkurnami akranqä runata mandaqnin rey kananpä churashä.
¿Pirä noqanö kanman?
¿Pirä noqawan churanakunman?
¿Pï autoridärä noqata ichipämanman?
45 “Babilonia runakunapä willakatsinqäta llapaykikuna wiyayay.
Babiloniacho taqkunata castiganäpä ninqäta shumaq wiyayay.
Tsaycho taqkunata wamrantintami prësu apayanqa.
Llapan naciontami chipyaq ushakashqata jaqiykuyanqa.
46 Babilonia marka tsaynö ushakaptin maytsaychömi patsa kuyunqa.
Pasaypa qayaräyanqanpis maytsay nacionmanmi wiyakanqa”.†