Amón nación runakunata castigananpä ninqan
49
Kaychömi qellqaraykan amonita runakunapä Tayta Dios ninqan.“Gad trïbupa markankunachömi amonita runakuna† taykäyan.
Milcom diosta adoraqkunamia Gad trïbu runakuna täyanqanta duëñu tukuyashqa.
¿Maytä Israelpita aywaraq Gad runakuna?
¿Manaku pillapis kan imaykankunawan quëdayänanpä?
2 “Rabácho taykaq amonita runakuna guërracho qayaräyanqan wiyakämunqanami.
Markankunata nina rupaptin wayinkunapis raqällanami rikakunqa.
Tsayrämi amonita runakuna tsararäyanqanpita Israel runakuna markankunata qorikuyanqa.
Noqa Tayta Diosmi tsaynö nï.
3 “¡Hesbón runakuna, Hai marka ushakanqanpita waqayay!
¡Milcom diostami adoraqnin sacerdötikunatawan prësu apakuyanqa!
¡Milcompa jutincho mandaq autoridäkunatapis prësumi apakuyanqa!
Rabácho taykaq warmikuna, ¡qachqa latsapata jatikurkur waqayay!
¡Löcuyaykaqnörä markaykicho waqar cörrikachäyay!
4 “Mana cäsukuq amonita runakuna, ¿imanirtä imaykayuqpis kayanqaykita alabakuyanki?
Qamkunaqa imaykayuqpis kayanqaykimanmi yärakuykäyanki.
Tsaymi yarpäyanki pipis mana atacayäshunaykipä kanqanta.
5 Tsaynö yarpäyaptikipis maytsaypita contraykikuna shamurmi atacayäshunki.
Pasaypa mantsarirmi jukniki juknikipis wakpa kaypa qeshpir aywakuyanki.
Kutitsiyämushunaykipäpis manami pipis kanqatsu.
Llapanta mandaq Tayta Dios karmi tsaynö nï.
6 “Tsaynö kanqanpita watakuna päsaskiptinqa amonita runakunata maytsaypitapis nacionninmanmi kutitsimushä. Noqa Tayta Diosmi tsaynö nï”.
Edom nación runakunata castigananpä ninqan
7 Kaychömi qellqaraykan edomita runakunapä† llapanta mandaq Tayta Dios ninqan.
“Temán markacho yachaqkuna ¿mananaku kayanna?
Yätsikuqkunapis ¿mananaku kayanna?
Yachaqkunapis ¿llapan yachayanqanta qonqaskiyashqanaku?
8 “¡Dedán marka runakuna, qeshpir aywakuyay!
¡Uchkukunamanpis pakakuyay!
Esaúpita aywaraq runakuna täyanqan naciontamib ushakätsishä.
Paykunata castiganäpä junaq chämushqanami.
9 “Üva pallaqkuna ¿manaku juk ishkay sarta üvakunata yurancho jaqiykuyanmanrä?
Paqaspa suwa yaykurpis ¿manaku tarinqan kaqllata apakun?
10 Noqami itsanqa Esaú runakunapa imaykantapis chipyaq qechushä.
Mayman pakakuyaptinpis tarishämi.
Tsurinkunata, castankunata y vecïnunkunatapis chipyaq ushakätsiptïmi pipis kanqanatsu.
11 Edomcho quëdaq waktsakunata noqanami wätashä.
Viüdakunatapis noqanami yanapashä”.
12 Tayta Diosmi nin: “Jutsaynaq runakunapis ñakayänanpä kaykaptinqa qamkunaqa jutsaykikunapita masrämi ñakayanki. Cöpacho wiñaraykaq castïgutaqa imanöpapis upuyänaykimi. 13 Noqa Tayta Dios kikïpa jutïcho jurarmi nï: Bosra markatapis atacayanqami. Pasaypa maldicionashqa karmi tsunyaq raqällana rikakunqa. Tsayta musyarmi wakin runakuna pasaypa mantsariyanqa y wakinnami asipäyanqa. Tsaynöllami Edomcho kaq wakin markakunapis chipyaq juchutsishqa imayyaqpis kanqa”.
14 Edom nacionta castigananpä kanqanta Tayta Diosmi tantiyatsimashqa.
Nacionkunaman kachamunqan willakuqmi nikan:
“¡Pelyayänaykipä shumaq kamarikuyay!
¡Edomita runakunata atacayänaykipä aywayay!”
15 Tayta Diosmi edomita runakunata nin:
“Wakin nacionkunapitapis mas wallkalla kayänaykipämi castigayäshayki.
Pïmaypis manakaqman churayäshunaykipämi kamakätsishä.
16 Qaqa uchkukunachömi taykäyanki.
Altunnin jirkakunacho anka taqnömi taykäyanki.
Tsaynö taykäyaptikipis jitarpayämushaykimi.
Runa tukuyanqaykipis manakaqllapämi kanqa.
Noqa Tayta Diosmi tsaynö nï.
17 “Edom nación ushakanqanqa pasaypa mantsariypämi kanqa.
Tsaynö castiganqäta rikaykurmi llapanpis tsaypa päsaqkuna äyakashqa rikaräyanqa.
18 Sodoma, Gomorra y ñöpankunacho kaykaq markakuna ushakäyanqannömi† ushakanqa.
Tsaynö ushakätsiptïmi Edom nacioncho pipis tanqanatsu.
Noqa Tayta Diosmi tsaynö nï.
19 “Jordán mayu kuchun muntipita yarqamuq leonnömi kashä.
Alli qewacho mikuykaq uywata tsariq leonnömi noqapis illaqpita castigashä.
Tsaymi edomita runakuna mantsarirnin qeshpir aywakuyanqa.
Nirkurnami akranqä runata mandaqnin rey kananpä churashä.
¿Pirä noqanö kanman?
¿Pirä noqawan churanakunman?
¿Pï autoridärä noqata ichipämanman?
20 “Edomita runakunapä willakatsinqäta llapaykikuna wiyayay.
Temán markacho taqkunata castiganäpä ninqäta shumaq wiyayay.
Tsaycho taqkunata wamrantintami prësu apayanqa.
Llapan naciontami chipyaq ushakashqata jaqiriyanqa.
21 Edom marka tsaynö ushakaptin maytsaychömi patsa kuyunqa.
Pasaypa qayaräyanqanpis Puka Lamaryaqmic wiyakanqa.†
22 Edompa contrankunami Bosra markaman yaykuyanqa.
Imayka anka älanta qorirkur chipshaman aywaqnörämi yaykuyanqa.
Edompa soldädunkunapis tsay junaqqa wachay nanaywan warmi tsuktsukyaqnörämi tsuktsukyäyanqa”.
Damasco runakunata castigananpä ninqan
23 Kaychömi qellqaraykan Damasco markad † runakunapä Tayta Dios ninqan.
“Hamat markacho y Arfad markacho taqkuna mana allita wiyarmi pasaypa mantsakashqa kayanqa.
Löcuyashqanö karmi ima ruraytapis kamäpakuyanqanatsu.
24 “Damascucho taqkunapis kallpaynaqnami rikakuyanqa.
Qeshpiyta munarpis pasaypa mantsarir manami kamäpakuyanqatsu.
Pasaypa llakikurmi tsuktsukyäyanqa.
Nanaypis qeshyaq warmita tsariqnörämi paykunata tsarinqa.
25 “Damasco markaqa pïmaypäpis reqishqa markami.
Tsay markaqa noqatapis kushikatsimarqanmi.
Tsaynö kashqa karpis pasaypa tsunyaqmi rikakunqa.
26 Tsay junaqmi chölukuna cällikunacho wanushqa jitaräyanqa.
Llapan soldädukunapis wanurmi ushakäyanqa.
Llapanta mandaq Tayta Dios karmi tsaynö nï.
27 Damasco markapa murällankunatapis rupatsishämi.
Tsaymi rey Ben-adadpa palaciunkunapis rupar ushakanqa”.
Cedar y Hazor runakunata castigananpä ninqan
28 Kaychömi qellqaraykan Cedar runakunapä y Hazor runakunapä Tayta Dios ninqan. Tsay runakunatami Babiloniapa mandaqnin rey Nabucodonosor vincir ushakätsirqan.
“¡Cedar runakunata aywar atacayay!
¡Rupay yarqamunan kaqlächo taqkunata chipyaq ushakätsiyay!e
29 ¡Toldunkunatawan uywankunata apakuyay!
¡Toldunkunapa cortïnankunata y imayka tsararäyanqankunata apakuyay!
¡Camëllunkunatapis qechur apakuyay!
¡Maytsaychöpis mantsariypä kanqanta niyay!
30 “¡Hazorcho taqkuna, qeshpir karupa aywakuyay!
¡Uchkukunamanpis pakakuyay!
Babilonia nacionpa mandaqnin rey Nabucodonosormi atacayäshunaykipä kamarikushqana kaykan.
Noqa Tayta Diosmi tsaynö nï”.
31 Babilonia soldädukunatapis Tayta Diosmi nin:
“Hazor runakunata añaw kawakuykaqta atacayay.
Paykunaqa manami murallashqa markachötsu taykäyan.
Ni washänanpäpis manami pïninpis kantsu.
32 Camëllunkunata y uywankunatapis suwayay.
Llapllanta rutukuq runakunataqaf maytsaymanmi qarqushä.
Maytsaypitami ñakaykunatapis paykunaman chätsimushä.
Noqa Tayta Diosmi tsaynö nï.
33 “Hazor parti tsunyaq tikraptin chacalkunallami tsaycho täyanqa.
Manami pï runapis tanqanatsu ni patsakuyllapis patsakuyanqanatsu”.
Elam nación runakunata castigananpä ninqan
34 Sedequías Judá nacionpa mandaqnin rey kayta qallaykunqan witsanmi Elam nación imanö kananpä kanqantapis profëta Jeremíasta Tayta Dios willar nirqan:
35 “Llapanta mandaq Tayta Dios karmi nï:
Flëchawan pelyayta shumaq yachayaptinpis Elam runakunapa soldädunkunata ushakätsishämi.
36 Imayka shukukuy wayratanömi atacayänanpä maytsaypitapis soldädukunata kachamushä.
Tsay soldädukunataqa Elam runakuna ichipayta manami kamäpakuyanqatsu.
Tsaymi maytsay nacionkunamanpis amparakuq qeshpiyanqa.
37 Atacaqnin soldädukunapa puntanchömi Elam runakuna pasaypa mantsarir tsuktsukyäyanqa.
Ajanar castigaptïmi pasaypa ñakayanqa.
Tsaymi guërracho wanur llapan ushakäyanqa.
Noqa Tayta Diosmi tsaynö nï.
38 “Elampa mandaqnin reyta y autoridäninkunata ushakaskatsirmi tsaycho kikï mandashä.
Noqa Tayta Diosmi tsaynö nï.
39 Watakuna päsaskiptinnami Elam runakunata markankunaman kutitsimushä.
Noqa Tayta Diosmi tsaynö nï”.