Moabita runakunata castigananpä ninqan
48
Kaychömi qellqaraykan Moab nación runakunapä Tayta Dios ninqan.† Israel runakunata kuyaq y llapanta mandaq Tayta Diosmi nin:“¡Nebo marka llakipaypämi kanqa!
Tsay markata pasaypami ushakätsiyanqa.
Quiriataim markatapis vinciptin penqakuychömi kanqa.
Alli sigurashqa kaptinpis chipyaqmi juchutsir ushayanqa.
2 Moab nación puëdiq kanqanta mananami pipis parlanqanatsu.
Contran runakunami willanakuyanqa Hesbón markacho imatapis mana jaqiypa ushakätsiyänanpä.
Madmena markatapis guërrawanmi chipyaq ushakätsiyanqa.
3 Tsaymi runakuna qayarar niyanqa: ‘¡Llapan markatami ushakätsiyashqa!’
Tsaynö qayaräyämunqanmi Horonaim markapita patsa wiyakämunqa.
4 “Moab nacionta pasaypami ushakätsiyanqa.
Wamrakuna nanatsikur qayaräyanqanpis wiyakanqami.
5 Luhit cuestapapis waqaraykarmi witsäyanqa.
Horonaim bajädachöpis pasaypa llakikur waqayanqanmi wiyakanqa.
6 Wanuyta mana munaq kaqqa, ¡imanöpapis qeshpir aywakuyay!
¡Tsunyaqman aywaykur pakakuyay!
7 Qamkunaqa soldäduykikunaman y imaykayuq kayanqaykimanmi yärakuykäyanki.
Tsaynö kayaptikipis contraykikuna shamurmi vinciyäshunki.
Quemos diosnikikunatapis apakuyanqami.
Sacerdötikunata y autoridäkunatapis prësumi apakuyanqa.
8 Contraykikuna shamurmi llapan markaykikunata ushakätsiyanqa.
Manami ni juk markallapis qeshpinqatsu.
Yunkacho y jallqacho kaykaq markakunatapis llapantami ushakätsiyanqa.
Noqa Tayta Diosmi tsaynö nï.
9 “Moab nación mana ushakänanpä ¡imanöllarä älallanpis yurirkunman pajar aywakunanpä!
Llapan markankunata ushakätsiyaptin mananami pipis tsaycho tanqanatsu.
10 ¡Munanqäta rurayänanpä mandaykaptï janan shonqulla ruraqkunataqa maldicionashämi!a
¡Espädawan wanutsiyänanpä nikaptïpis mana wanutsiqkunataqa maldicionashämi!
11 “Moabita runakunaqa imaypis añawmi täyashqa.
Manami imaypis nacionninpita jukläman prësu aywayashqatsu.
Paykunaqa kaykäyan kanqallancho imaypis wiñaräkuq vïnunömi.
Tsay vïnupa sabornin y mushkuynin imaypis kanqannöllami kaykäyan.
Tsaynöllami moabita runakunapis kanqallan imaypis kaykäyan.
12 Tsay vïnuta juk uylluman talliyänanpämi runakunata kachashä.
Nirkurnami tsay jäkatsiyanqan uylluta pakir ushayanqa.b
13 Salvayta mana kamäpakuptinmi moabita runakunaqa Quemos diosninpita penqakuyanqa.
Israel runakuna Bet-elcho ïduluman yärakuyanqanpita penqakuyanqannömi paykunapis penqakuyanqa.c
14 “Moabita runakuna, ama niyaytsu puëdiq runa kar guërracho pelyayänaykipä listu kayanqaykita.
15 Nacionniki ushakashqami kanqa.
Markaykikunapis raqällanami rikakunqa.
Allinnin chölukunatapis chipyaqmi wanutsiyanqa.
Rey karmi tsaynö nï.
Noqapa jutïqa llapanta mandaq Yahwehmi.
16 “Moabita runakunaman desgracia chänanpä wallkallanami pishiykan.
Paykuna ushakäyänanpä kaq tiempu chaykämunnami.
17 Ñöpan nacionkunacho taq runakuna, Moab nacionpä llakikuyay.
Munayyuq kanqanta musyaqkuna, tsay nacionpä niyay:
‘¡Allaw, pipis mana vincinqan Moab nacionmi pasaypa ushakashqa!’
18 “Dibón marka runakuna, Moab nacionnikita ushakätsiyänanpä runakuna shamuykäyannami.
Amparakuyänayki markakunatapis chipyaqmi illakätsiyanqa.
Tsaynö kaykaptinqa runa tukuyänaykipa trokin humillakuyay.
19 “Aroer markacho taqkuna, nänikunapa rikachakuyay.
Qeshpiykaqkunata tapukuyay ima päsanqantapis.
20 Tapukuyaptikimi niyäshunki:
‘¡Moab nacionnintsiktami ushakätsiyashqa!
¡Qayarayparä waqayay!
¡Arnón mayu witsanpapis aywaykur willakuyay nacionnintsikta ushakätsiyanqanta!’
21 “Pampacho kaykaq markakunachömi desgracia kanqa.
Tsay markakunami kaykan Holón, Jahaza, Mefaat,
22 Dibón, Nebo, Bet-diblataim,
23 Quiriataim, Bet-gamul, Bet-meón,
24 Queriot, Bosra y Moabcho llapan markakuna.
Karucho o cercachöpis desgraciallami kanqa”.
25 Tayta Diosmi nin:
“Moab nacionqa manami munayyuqnatsu kanqa.
Puëdiq kanqanpis ushakanqanami.
26 Moabita runakunaqa conträmi rikakuyashqa.
Kananqa machashqa runakunanö tsanka tsanka purir ishkiyätsun.
Lanzapakuyanqan janancho qoshpayätsun.
Paykunata pïmaypis asipäyätsun.
27 “Moabita runakuna, Israel runakunata manakaqmanmi churayarqayki.
Suwakuykaqta tariqnöpis pasaypami manakaqman churayarqayki.
28 Kananqa markaykikunapita qeshpir machaykunachöna täyay.
Qaqacho qeshunta ruraq palumanö qamkunapis tsaycho täyay.
29 Qamkunaqa runa tukur pïmaytapis mana respitaqmi kaykäyanki.
Tsaynöllami musyaq y yachaq tukuq kaykäyanki.
Tsaynö kayanqaykita pïmaypis musyayanmi”.
30 Tayta Diosmi nin:
“Noqa musyämi runa tukuyanqaykita.
Runa tukurpis manami washäkuyta kamäpakuyankitsu.
Vinciyänaykipä alabakuyaptikipis vinciyäshunkimi.
31 Tsaymi Moab nacionnikipä pasaypa waqashä.
Kir-hares markachod taq runakunapäpis llakikushämi.
32 “Sibma marka, üva chakraykikuna atskami kaykäyan.
Lamarpa wak tsimpanyaq y Jazer markayaqmi kaykäyan.
Tsaynö kaptinpis cosechanaykipä üvakuna manami kanqanatsu.
Tsaymi qampä y üva chakraykikunapäpis waqashä.
Jazer markapä waqanqäpita masrämi waqashä.
33 “Moab nacioncho chakrankuna alli chakra kaptinpis runakuna kushikuyanqan y asikuyanqan mananami wiyakanqanatsu.
Cosëcha manana kaptin wiñaräkunancho vïnupis manami kanqanatsu.
Vïnuta rurayänanpä üva jaruqkunapis manami kanqanatsu.
Kushikurnin cantutapis manami cantayanqanatsu.
34 Hesbón markacho waqayanqanqa Eleale markayaq y Jahaza markayaqmi wiyakanqa.
Nimrimcho yaku tsakiptinmi Zoar markachöpis qayararrä waqayanqa.
Tsay waqayanqanqa Horonaim markayaq y Eglat-selesiyá markayaqmi wiyakanqa”.
35 Tayta Diosmi nin: “Diosninkunata adorar uywakunata altarkunacho rupatsiyanqanpita y inciensiuwan qoshnitsiyanqanpitami moabita runakunata ushakätsishä. 36 Tsaynö kaptinmi pampakuycho këna waqaqnörä llapan shonqüwan moabita runakunapä waqashä. Riquëzankuna ushakaptinmi Kir-hares markacho taq runakunapäpis waqashä. 37 Llapan runakunami llakikurnin aqtsankunata qara putuypa rutukuyanqa. Shaprankunatapis chipyaqmi rutukuyanqa. Makinkunatapis llapanmi roqukuyanqa. Tsaynöllami qachqa latsapatapis jatikuyanqa”.
38 Tayta Diosmi nin: “Moabita runakunaqa wayin janankunachoe y cällikunachöpis waqayanqami. Tsaynö waqayanqa jaqrash uyllutanö ushakätsiptïmi.
39 “¡Moab nacionpä waqayay! ¡Chipyaqmi ushakätsiyanqa! ¡Penqakurmi umpuräkuyanqa! Moabita runakuna ushakäyanqanta musyaskirmi ñöpan nacionkunacho taq runakunapis kushipar manakaqman churayanqa”.
40 Tayta Diosmi nin:
“Älanta qorirkur anka illaqpita chipshata tsarinqannömi moabita runakunata contrankuna illaqpita ushakätsiyanqa.
41 Moabita runakunapa markankunata y amparakuyänan wayinkunatapis ushakätsiyanqami.
Tsay junaqmi moabita soldädukuna pasaypa mantsariyanqa.
Qeshyaq warmita nanay tsariptin mantsariqnömi mantsariyanqa.
42 Moabita runakunaqa conträmi shäriyashqa.
Tsaymi ushakätsiptï nacionnatsu kayanqa”.
43 Tayta Diosmi nin:
“Moabita runakunataqa mantsariyllami shuyaraykan.
Tsaynöpis patsapa shiminnö y trampanömi desgracia shuyaraykan.
44 Mantsariypita qeshpiq kaqqa uchkumanmi jeqanqa.
Uchkupita yarquq kaqnami trampaman ishkinqa.†
Tsaynömi moabita runakunata castigashä.
Noqa Tayta Diosmi tsaynö nï.
45 “Hesbón markaman qeshpir aywaqkunaqa kallpaynaqmi amparakuyänanpä chäyanqa.
Tsaynö kaptinpis rey Sehónpa markan Hesbóntaqa ninami rupar ushanqa.
Llapan Moab jirkakunata ruparmi tsay mana alli runakuna täyanqan wakin markakunatapis rupar ushanqa.
46 “¡Allaw, imanörä kayanki, moabita runakuna!
¡Quemos diosta adoraq runakuna ushakäyanqami!f
¡Tsurikikunatapis ollquta warmita prësu tsarirmi apakuyanqa!
47 Tsaynö kaptinpis watakuna päsaskiptinqa moabita runakunata nacionninmanmi kutitsimushä.
Noqa Tayta Diosmi tsaynö nï”.
Moab nación runakunata Tayta Dios castigananpä ninqan kaychömi ushan.