Filisteo runakunata ushakätsinanpä ninqan
47
Kaychömi qellqaraykan filisteo runakunapä profëta Jeremíaswan Tayta Dios willakatsinqan. Tsay witsan Gaza markataa manarämi Faraón atacarqanrätsu.†2 “Noqa Tayta Diosmi nï:
Mayu jakar pampapa liwakanqannömi norti kaqläpita soldädukuna shayämunqa.
Shamurmi llapan Filistea nacioncho kaq markakunaman juntäyanqa.
Tsayta rikarmi tsaycho taq runakuna pasaypa mantsarir maytsaycho waqayanqa.
3 Cawallunkuna patatarrä aywayanqan, carrëtakuna taqräräyanqan y ruëdankuna jirurur qashashanqanpis mantsariypämi wiyakanqa.
Tsayta wiyarmi runakuna kallpaynaq rikakur tsurinkunatapis jaqiskir qeshpiyanqa.
4 “Tsaynö kanqa filisteo runakunata ushakätsinäpä kaq junaq chämuptinmi.
Tiro runakunatawan Sidón runakunata yanapaq nacionkunatab chipyaqmi ushakätsishä.
Wakin yanapaqnin nacionkunata ushakätsinqänömi paykunata ushakätsishä.
Caftor islapita shamuq filisteo runakunatac noqami ushakätsishä.
5 Gaza markacho taq runakuna pasaypa llakikurmi aqtsankunatapis rutukuyanqa.
Ascalón markacho taq runakunapis upayashqanömi kayanqa.
Tsaycho taqkuna wanuqkunapä llakikurmi qarankunatapis roqukuyanqa.
6 “Filisteo runakunami llakikur niyanqa:
‘¡Tayta Diospa espädan!
¡Imayyaqrä wanutsiyämanki!
¡Imayrä jamanki!
¡Churaräkunaykiman kutikuyna!’
7 “Tsaynö niyaptinpis ¿imanöparä espädä jamanman?
Noqa Tayta Diosmi espädäta kachamushqä Ascalón markata y lamar kuchuncho markakunatapis ushakätsinanpä.
Tsaycho runakunata ushakätsinanpämi destinarqä”.