Nacionkuna imanö kayänanpä kanqantapis ninqan
46
Kaychömi qellqaraykan nacionkuna imanö kayänanpä kanqantapis profëta Jeremíasta Tayta Dios willanqan.Egipto runakunata Carquemischo castiganqanta ninqan
2 Josíaspa tsurin Joacim chusku watana Judá nacionpa mandaqnin rey kaykaptinmi Egipto runakuna Carquemis markacho Babilonia runakunawan pelyayarqan. Tsaychömi Egipto runakunata vincir wanutsiyarqan.† Carquemisqa Éufrates mayu ñöpanchömi kaykan. Egipto runakunapa mandaqnin reyqa Faraón Necaomi karqan. Nabucodonosornami Babilonia nacionpa mandaqnin rey karqan.
3 “¡Egipto runakuna, tsapakuyänaykipä escüduykikunata kamarikuskir pelyaman aywayay!
4 ¡Cawallu muntaqkuna, cawalluykikunata sillakur juklla muntakuyay!
¡Cascuykikunata jatikurkur fïlaman yaykuyay!
¡Espädaykikunata shumaq afilakuyay!
¡Flëchakunapita tsapäyäshunaykipä chalëcuykikunatapis jatikuyay!
5 “Egipto soldädukuna ¿imanirtä pasaypa mantsariykäyan?
¿Imanirtä qeshpir kutikuykäyan?
Alli pelyaqkunapis mashtakarmi mana tikramuypa maytsaypa qeshpir aywakuykäyan.
Maytsaychömi pasaypa mantsariykäyan.†
6 Alli cörriqninkunapis manami cörriyta kamäpakuyannatsu.
Alli chölun kaqkunapis manami qeshpiyta kamäpakuyannatsu.
Norti kaqlä Éufrates mayu kuchuncho tinkakarmi llapan ishkiyashqa.
7 “Nilo mayu jakar bunyaypa bunyar aywaqnömi juk nación runakuna shamuykäyan.
Mayu jakar mashtakaqnömi tsay nación runakuna juntaykäyämun.
8 Tsay nacionqa Egiptumi kaykan.
Mayu jakar bunyaypa bunyar aywaqnörä karmi nikäyan:
‘Atskaq aywarmi entëruman juntashun.
Noqantsikqa maytsay markakunata y tsaycho taq llapan runakunatapis ushakätsishunmi’.
9 “¡Cawallun muntashqa kaqkuna, guërraman yaykuyay!
¡Carrëtawan aywaqkuna, ras cörriyay!
¡Alli chölu kaqkuna, fïlayllanpa marchaqnörä aywayay!
¡Etiopía y Libia soldädukuna, escüduykikunata kamarikuyay!
¡Lud soldädukunaa, flëchaykikunata kamarikuyay!
10 Llapanta mandaq Tayta Dios karmi nï:
Kananqa conträkunata castiganä junaqmi chämushqa.
Kanan junaqmi espädäpis pacha junta mikunqa.
Runakunapa yawarninwanmi machanqa.b
Tsaytsika runakunata wanutsiyanqanmi noqapä sacrificiu kanqa.
Tsaynö kanqa norti kaqlä nacioncho kaykaq Éufrates mayu kuchunchömi.
11 “Kuyapaypä Egipto runakuna, Galaadman jampi ashiq aywayay.
Imayka jampikunawan jampikuyanqaykipis manakaqllapämi kanqa.
Jampikuyaptikipis mananami ima jampipis alliyätsiyäshunkitsu.
12 Pelyaqnikikunapis qeshpiykäyanqallanchömi kikinkunapura tanqanakur ishkiyashqa.
Maytsay nación runakunami musyayan contraykikuna vinciyäshunqaykita.
Nanaywan qayaräyanqaykipis llapan nacionmanmi wiyakaykan”.
Egipto runakunata nacionninkunacho castigananpä ninqan
13 Babilonia nacionpa mandaqnin rey Nabucodonosor Egipto nacionta atacayänanpä kanqanta profëta Jeremíasta Tayta Dios willanqan kaychömi qellqaraykan:†
14 “Egipto runakuna, ¡shumaq kamarikuyay!
¡Maytsay markaykikunachömi espädawan wanutsiyäshunki!
Tsayta willayay Migdol, Menfis y Tafnes markakunachoc taq runakunata.
15 Törri niraq Apis diosnikikuna ¿imanirtä yanapayäshunkitsu?
¿Imanirtä tsay diosnikikuna ichiraykantsu?
¡Tsaytaqa noqa Tayta Diosmi tanqaskishqä!
16 “Soldäduykikunapis ñitinakurrä ishkirmi niyanqa:
‘¡Llapantsik qeshpir markantsikman kutikushun!
Maychömi yurirqantsik, tsayman aywakushun.
Kay wanutsinakuypita qeshpir aywakushun’.
17 Markanman kutirnami niyanqa:
‘Kachamaqnintsik rey Faraónqa shimillanmi.
Manami ima ruraytapis kamäpakunnatsu’.
18 “Noqapa jutï llapanta mandaq Yahwehmi kaykan.
Llapanpä mandaq rey karmi jutïcho jurar nï:
Ñöpan jirkakunapita Tabor jirka mas jatun kanqannö
y lamar kuchuncho Carmelo jirka llapanpita mas jatun kanqannömi
Egipto runakunapa contrankuna llapanpitapis mas munayyuq kayanqa.
19 Egipto runakuna, prësu apayäshunaykipä kamarikuyay.
Menfis marka tsunyaq jirkami rikakunqa.
Raqällana kaptinmi pipis tanqanatsu.
20 “Kuyayllapä becërrunömi Egipto nación kaykan.
Tsaynö kaykaqta kaninanpämi norti kaqläpita upukurukuna shamuykan.d
21 Egipto runakuna minkakuyanqan soldädukunapis wera becërrunömi kaykäyan.
Paykunapis upukurupita qeshpiqnömi pelyapita qeshpiyanqa.
Egipto runakunata castigar ushakätsinä junaq chaykämunnami.
22 “Jächawan muntita tsaquqnömi contrankuna atacar Egipto runakunata wanutsiyanqa.
Tsaynö atacayaptinmi culebra qeshpiqnörä qeshpiyanqa.
23 Tsay contran runakunaqa shatayashqa muntikunatapis tsaquyanqami.
Yupaytapis mana atipaypä chukllushkunapitapis mas atskami kayanqa.
24 Egipto runakuna norti kaqlä nación runakunapa munayninchönami rikakuyanqa.
Tsaynö karmi pasaypa penqakuyanqa”.
25 Israel runakunata kuyaq y llapanta mandaq Tayta Diosmi nin: “Noqami castigashä Tebas markacho adorayanqan dios Amónta y Egiptucho adorayanqan wakin dioskunatapis. Tsaynöllami castigashä Egipto runakunapa autoridäninkunata, Faraónta y payman yärakuqkunatapis. 26 Tsaymi Babilonia nacionpa mandaqnin rey Nabucodonosorpa y soldädunkunapa munayninman paykunata churashä. Tsaypita atska wata päsaskiptinmi itsanqa unay täyanqannöna Egiptucho yapay añaw täyanqa. Noqa Tayta Diosmi tsaynö nï”.
Kuyanqan runakunata Tayta Dios salvananpä awninqan
27 “Jacobpita aywaraq sirvimaq runakuna, ama mantsariyaytsu.
Karu nacionman apayäshunqaykipitami qamkunata y qamkunapita aywaraqkunata jipiyämushayki.
Pipis manana mantsaritsiyäshuptikimi nacionnikicho añaw kawayanki.
28 Jacobpita aywaraq sirvimaq runakuna, ama mantsariyaytsu.
Noqaqa qamkunawanmi kaykä.
Nacionnikipita qarqushqa karpis qamkunataqa manami ushakätsiyäshaykitsu.
Munaynincho tsararäyäshuqniki nacionkunatami itsanqa ushakätsishä.
Ima kaptinpis jutsata rurayanqaykiman tupumi castigayäshayki.
Mana castigaypaqa manami kachäyäshaykitsu.
Noqa Tayta Diosmi tsaynö nï”.