Pascua fiestata Josías ruranqan
35
Tsaypitanami rey Josías nirqan Tayta Diosta adorar Pascua fiestata† Jerusaléncho rurayänanpä. Tsaymi mushuq wata qallaykunan killa chunka chusku junaqcho Pascua fiestata rurar carnishkunata pishtayarqan.2 Pascua fiestata manarä rurarmi sacerdötikunata rey Josías churarqan Tayta Diospa templuncho aruyänanpä. Nirkurmi paykunata parlaparqan mana qelanaypa tsaycho sirviyänanpä.
3 Israel runakunata yachatsiq kayaptin y Tayta Diospä santu kayaptinmi levitakunatapis Josías nirqan: “Amana sagrädu babulta umrushqa puritsiyaynatsu. Tsaypa trokinqa Davidpa tsurin rey Salomón shäritsinqan templuman churayay. Kananpitaqa Tayta Diosnintsikta y kuyanqan Israel runakunata templucho sirviyay.
4 “Tsaynö kaykaptinqa Israel nacionnintsikpa mandaqnin rey David y tsurin Salomón qellqayanqancho ninqannö castanpa castanpa churanakuyay templucho trukanakuypa aruyänaykipä.† 5 Castaykita turnu töcaptin shuyäyänaykipä llapayki templuman aywayay. Tsaynöpami Israel mayikikuna castanpa castanpa shayämuptin töcayäshunqayki kaq castakunata atiendiyanki. 6 Tsaynö kaykaptinqa juklla purificakuskir Pascua fiestapä apayämunqan carnishkunata pishtayay. Tayta Dios mandanqanta Moisés qellqanqannö Pascua fiestata runakuna cumpliyänanpä llapanta kamaripäyay”.
7 Pascua fiestapämi rey Josías kikinpa uywankunapita kamariparqan kimsa chunka waranqa (30,000) üshakunata y cabrakunata. Tsaynöllami kamariparqan kimsa waranqa (3,000) torïtukunatapis.
8 Tsaynöllami reyta mandashiqninkunapis y Tayta Diospa templuncho aruqkunapa mandaqninkunapis kikinkunapa voluntäninkunapita uywakunata Pascua fiestapä kamaripäyarqan. Tayta Diospa templuncho aruqkunapa mandaqninkunami kayarqan Hilcías, Zacarías y Jehiel. Paykunami kamaripäyarqan ishkay waranqa soqta pachak (2,600) üshakunata y cabrakunata y kimsa pachak (300) torïtukunata. Tsay kamaripäyanqan uywakunami wakin karqan sacerdötikunapä y levitakunapä y wakinna común runakunapä.
9 Conanías y aruq mayinkuna Semaías y Natanaelpis kamaripäyarqanmi uywakunata. Tsaynöllami uywakunata kamaripäyarqan levitakunapa mandaqninkuna Hasabías, Jeiel y Josabadpis. Paykuna kamaripäyanqan uywakunami karqan pitsqa waranqa (5,000) üshakuna cabrakuna y pitsqa pachak (500) torïtukuna.
10 Llapanpis kamarishqa kaptinmi aruyänanpä sitiunkunaman sacerdötikuna churanakuyarqan. Levitakunapis rey ninqannö cada castapa turnun chämuptinmi aruyänanpä churanakuyarqan. 11 Pascua fiestapä uywakunata pishtarmi sacerdötikunata levitakuna yawarta makyarqan. Paykunanami chaskiyanqan yawarwan altarta tsaqtsupäyarqan. 12 Tsaypitanami pishtayanqan uywakunapa wirankunatapis levitakuna jipirkur runakunata castanpa castanpa entregayarqan. Chaskirkurnami Moisés qellqanqancho ninqannölla Tayta Diospä rupatsiyarqan. Törukunata pishtarpis tsaynöllami rurayarqan.
13 Tsaymi mandamientucho ninqannölla Pascua fiestata rurar mikuyänanpä levitakuna aytsata kankayarqan.† Sagrädu kaq aytsatami mankawan, caserölawan y sartinwan ankaskir llapan runakunata juklla qarayarqan. 14 Rupatsina sacrificiukunata y uywakunapa wiranta altarcho patsa tsakanqanyaq sacerdötikuna rupatsiyaptinmi tiempu karqantsu kusinakuyänanpä. Tsaymi Aarónpita aywaraq sacerdötikunapä y kikinkunapä levitakuna kusinakuyarqan.
15 David, Asaf, Hemán y Jedutún niyanqannömi Asafpita aywaraq cantaqkunapis cantayarqan. (Jedutúnqa Tayta Dios revelanqankunatami reyta tantiyatsiqmi karqan.)† Tsaynöllami punku täpaqkunapis mana kachaypa punkunta täpayarqan. Tsaynö cantar y punkuta täpar tiempun mana kaptinmi levita mayinkuna paykunapäpis mikuyänanpä kaq derëchunta apayarqan.
16 Rey Josías ninqannöllami tsay junaq Pascua fiestata rurar Tayta Diospa altarnincho rupatsina sacrificiukunata rupatsiyarqan. 17 Pascua fiestata ruraskirmi tsaycho kaykaq llapan Israel runakuna Levadüraynaq Tanta Mikuna fiestatapis qanchis junaq rurayarqan.†
18 Josíasqa Pascua fiestata rurarqan sacerdötikunawan, levitakunawan, Jerusaléncho taq runakunawan y entëru Judápita y Israelpita shamuq runakunawanmi. Profëta Samuel kawanqan witsanpita patsa Israel runakuna manami imaypis tsaynöqa Pascua fiestata rurayarqantsu. Tsaynöpis rey Josías Pascua fiestata ruranqannöqa Israel nacioncho manami mayqan reypis rurayarqantsu. 19 Tsay Pascua fiestata rurayarqan Josías chunka puwaq wata rey kaykaptinmi.
Josías wanunqan
20 Tayta Diospa templunta Josías allitsatsiyta ushanqanchönami Egipto nacionpa mandaqnin rey Necao Carquemischo guërrata rurananpä Éufrates mayuman soldädunkunawan aywarqan. Tsayman aywar Israel nacionpa päsaptinmi Josías payta atacananpä soldädunkunawan aywarqan. 21 Tsaymi Necao kachakunata kacharqan niyänanpä: “Judá nacionpa mandaqnin rey, ama wajupämaytsu. Manami qamwan pelyaqtsu shamushqä, sinöqa aywaykä juk nacionwan pelyanäpämi. Tsayman ras aywanäpämi Tayta Dios kachaykäman. Atacamarqa Tayta Diospa contran rikakurmi wanunki”.
22 Necaowan Tayta Dios willakatsishqa kaykaptinpis Josíasqa manami kutikurqantsu, tsaypa trokinqa soldädunkunawanmi Egipto runakunata Meguido pampacho atacarqan. 23 Pelyachömi flëchawan flëchaq soldädukuna Josíasta flëchaykuyarqan. Tsaymi capitanninkunata Josías nirqan: “Flëcharayämashqami. Kay pelyapita juklla jipiykayällämay”.
24 Tsaymi carrëtapita capitankuna jipiskir juk carrëtawan Jerusalénman apayarqan. Tsaycho wanuskiptinmi unay castankuna pamparanqan kaqman pampayarqan. Josíaspämi Jerusaléncho taq runakuna y Judácho taq runakunapis lütur pasaypa waqayarqan. 25 Josías wanuskiptinmi juk cantuta Jeremías† inventarqan pampay höra cantayänanpä. Kananyaqpis warmipis ollqupis tsay cantuta cantarmi Josías wanunqanta yarpäyan. Paykuna cantayanqankuna qellqaraykan pampakuy cantukuna libruchömi.