3 Yaykunqanpita puwaq watana rey kaykarmi wamrallarä karpis Josíasqa unay castan David yärakunqan Tayta Diosta ashiyta qallaykurqan. Chunka ishkay watana rey kaykarmi Jerusalénta y Judá nacioncho kaykaq wakin markakunatapis purificar qallaykurqan. Purificarmi markakunacho kaq altarkunata, Asera diösapä jawiyanqan raku qerukunata, llaqllaypa rurayanqan ïdulukunata y fundiypa rurayanqan ïdulukunatapis ushakätsirqan. 4 Kikin rikaraykarmi Baalpä^† ruratsiyanqan altarkunatapis chipyaq juchutsirqan. Tsaynöllami mandarqan inciensiu qoshnitsikuyänan altarkunata juchutsiyänanpä, Asera diösapä jawiyanqan raku qerukunata pedäzu pedäzu pakiyänanpä y llaqllaypa rurayanqan ïdulukunata y fundiypa rurayanqan ïdulukunata ushakätsiyänanpä. Pakiyanqankunata ñuchuskatsirmi tsay ïdulukunata adoraqkuna pamparaykäyanqan jananman jicharqan. 5 Altarkunata manarä ushakätsirmi ïdulukunata adoraq sacerdötikunapa tullunkunatapis pamparäyanqan kaqpita jipiskamur tsay altarkuna janancho rupatsirqan.^† Tsaynöpami Judá nacionta y Jerusalénta purificarqan.

6 Tsaynöllami Josías purificarqan Manasés particho kaq markakunata, Efraín particho kaq markakunata, Simeón particho kaq markakunata y Neftalí particho kaq markakunatapis. Tsay markakunata purificarmi ñöpankunacho kaykaq markakunatapis purificarqan. 7 Tsaynöpami Israel nacioncho kaykaq llapan altarkunata, Asera diösapä jawiyanqan raku qerukunata y wakin ïdulukunatapis pakir usharqan. Inciensiuwan qoshnitsiyänanpä kaq altarkunatapis llapantami juchutsir usharqan. Llapanta purificaskirnami Jerusalénman kutikurqan.

8 Judá nacionta y templuta purificar ushaskirmi rey Josías runakunata kacharqan Tayta Diospa templunta allitsatsiyänanpä. Tsaynö kacharqan chunka puwaq watana rey kaykarmi. Kachanqan runakunami kayarqan Azalíapa tsurin Safán, markapa gobernadornin Maasías y Joacazpa tsurin Joa. 9 Paykuna aywarmi mandaq sacerdöti Hilcíasta entregayarqan Tayta Diospa templuncho qoriyanqan qellayta. Tsay qellaytaqa punku täpaq levitakunami qoriyarqan templuman shamuq runakunapita. Tsay runakunami täyarqan Manasés particho, Efraín particho, Judá particho, Benjamín particho y Jerusaléncho.

10 Tsay qellaytami encargädu runakunata entregayarqan Tayta Diospa templunta allitsatsiyänanpä. Paykunanami templu allitsaqkunata pägayarqan. 11 Tsaynöllami qellayta kamaripäyarqan carpintërukunata y albañilkunata. Tsay qellaywanmi carpintërukuna qeruta rantiyarqan vïgakunapä y tijiralkunapä. Albañilkunanami llaqllashqa rumikunata rantiyarqan. Tsaykunatami rantiyarqan Judá nacionpa mandaqnin reykuna templuta mana cäsuyaptin malogranqanta allitsatsiyänanpä. 12 Tsay encargädu runakunaqa chaskiyanqan qellayta mana suwakuyllapami aruqkunata pägayarqan.

Encargädu runakunapa mandaqninkunami kayarqan Jahat, Abdías, Zacarías y Mesulam. Tsay mandaqkuna llapanpis levitakunami kayarqan. Jahatwan Abdíasqa Merari castami kayarqan. Zacaríaswan Mesulamnami kayarqan Coat casta. Llapanpis tsay levitakunaqa instrumentu tukaqmi kayarqan. 13 Wakinmi encargädu kayarqan ashtaqkunata y tsaycho aruq runakunata rikayänanpä. Wakinmi kayarqan secretariu, wakinmi kayarqan capataz y wakinnami templu punku täpaq.

14 Qoriyanqan qellayta Tayta Diospa templunpita jipiykanqanchömi sacerdöti Hilcías tarirqan Moisés chaskinqan mandamientukuna qellqaranqan libruta. 15 Tariskirmi secretariu Safánta nirqan: “Tayta Diospa templunchömi leyninkuna qellqaraykaq libruta tarishqä”.

Tsaynö nirmi entregarqan. 16 Safánqa libruta apakurkurmi rey kaqman aywarqan. Chaykurmi imanö aruykäyanqanta willar nirqan: “Tayta rey, aruyänanpä mandanqaykinöllami llapanpis aruykäyan. 17 Tayta Diospa templunman apayanqan qellaytami encargädu runakunata kamaripäyashqa templuta allitsatsiyänanpä”.

18 Nirkurmi nirqan: “Templucho libruta tariskirmi sacerdöti Hilcías entregamashqa”.

Tsaynö willarmi Safánqa reyta liyiparqan. 19 Tsay librucho qellqaraykaq leykunata liyipaptinmi reyqa pasaypa llakikurnin latsapanta rachiriykurqan. 20 Tsaypitanami Hilcíasta, Safánpa tsurin Ahicamta, Micaíapa tsurin Abdónta, secretariu Safánta y yätsiqnin Asaíasta qayaykur nirqan: 21 “Kay librucho Tayta Dios ninqanta manami noqantsikpis ni unay castantsikkunapis cäsukushqatsu ni cumplishqatsu. Tsaynö mana cumplinqantsikpita capazchi Tayta Dios pasaypa ajanar castigamäshun. Tayta Diosta tapukayämuy noqapä, Israel nacioncho quëdaq runakunapä y kay nacionnintsikcho kaq runakunapäpis”.

22 Tsaypitanami rey kachanqan runakunawan Hilcías aywayarqan Salumpa warmin profetïsa Huldaman tapukuq. Huldapa runan Salumqa Ticvapa tsurin y Harhaspa willkanmi karqan. Tsaynöpis Salumqa templucho latsapakunata cuidaqmi karqan. Huldaqa runanwan Jerusalén ñöpan mushuq barriuchömi tarqan.

23 Tapukuptinmi Hulda nirqan: “Israel runakunata kuyaq Tayta Diosmi nin: ‘Kachamushuqniki runaman kutiykur ninqäkunata willar niyay: 24 Liyipäshunqayki librucho castiganäpä ninqänöllami kay markacho taqkunata castigar kay markatapis ushakätsishä. 25 Paykunaqa mana cäsukamar juk dioskunapämi sacrificiukunata rupaykätsiyan. Tsaynö kayanqanpitami pasaypa ajanar mana kuyapaypa castigashä’ ”.

26 Tsaypita mastami Hulda nirqan: “Tayta Diosta tapukunanpä kachamushuqniki reyman kutiykur willayanki: ‘Tsay librucho qellqaraykaqta cäsukunqaykipitami Israel runakunata kuyaq Tayta Dios nin: 27 “Kay marka y kay markacho taqkuna ushakätsishqa kayänanpä kanqanta musyar llakikunqaykita y mantsarinqaykita rikashqämi. Tsaynöpis rikashqämi latsapaykita rachir waqanqaykita. 28 Tsaymi kawanqaykiyaqqa kaycho taq runakunata castigashätsu. Wanuskiptikinami unay castaykikuna pamparäyanqanman pampayäshunki” ’ ”.

Profetïsa Hulda tsaynö ninqantami kachanqan runakuna kutiykur reyta willayarqan. 29 Tsaynö willayaptinmi rey Josíasqa Jerusaléncho y Judácho taq mayor runakunata qayatsirqan. 30 Tsaymi Jerusaléncho y Judá nacioncho taq runakuna, sacerdötikuna, levitakuna y wakin runakunapis wamrapita qallaykur hasta awkinyaq Tayta Diospa templunman qorikäyarqan. Reypis chaykurmi tsaycho tarinqan Pactu Libruta jinchi liyiparqan.

31 Liyipaskirnami rey ichiräkunan paradornin ñöpanman ichiykur Tayta Diospa ñöpancho rey Josías pactuta rurar awnirqan librucho qellqaraykaq pactuta cumplir mandamientunkunata, yätsinqankunata y leyninkunata llapan shonqunwan imaypis cumplinanpä. 32 Tsaynöllami Jerusaléncho taq runakunata y tsaycho kaq Benjamín trïbu runakunata nirqan unay castankuna yärakuyanqan Tayta Dioswan pactu rurayanqanta cumpliyänanpä. Tsaynö niptinmi llapanpis awniyarqan cumpliyänanpä.

33 Tsaymi Israel runakuna täyanqan llapan partikunacho ïdulukunata Josías ushakätsirqan. Nirkurmi Israel nacioncho taq runakunata mandarqan Tayta Diosta cäsukur kawayänanpä. Josías kawanqanyaqqa unay castankuna yärakuyanqan Tayta Diosllatami sirviyarqan.