Judá nacioncho Josías rey kanqan
22
Josías† puwaq watayuq kaykarmi Judá nacioncho rey kayta qallaykurqan. Payqa kimsa chunka juk (31) watami Jerusalénpita mandarqan. Mamanpa jutinmi Jedida karqan. Payqa Boscat markapita Adaíapa wamranmi karqan. 2 Josíasqa unay castan Davidnömi Tayta Dios munanqannö imaypis kawarqan.Leykuna qellqaranqan libruta tarinqan
3 Chunka puwaq watana rey kaykarmi Azalíapa tsurin Safánta rey Josías templuman kacharqan. Safánqa Josíaspa secretariun y Mesulampa willkanmi karqan. Templuman kacharmi Safánta Josías nirqan: 4 “Templuman chaykur mandaq sacerdöti Hilcíasta niy: ‘Tayta Diospa templuncho punku täpaq runakuna qoriyanqan qellayta qoriskirshi 5 encargädu runakunata entreganki paykuna templuta shumaq allitsatsiyänanpä. 6 Paykuna tsay qellaywan carpintërukunata y albañilkunata pägayätsun. Qeruta y llaqllashqa rumitapis rantiyätsun. 7 Tsay encargädu runakunata ama cuentata mañankitsu imacho qellayta gastayanqantapis. Paykunaqa mana yatapakuq runakunami kayan’ ”.
Rey Josías ninqannöllami Safánqa llapanta nirqan.
8 Juk kutichömi secretariu Safánta mandaq sacerdöti Hilcías nirqan: “Tayta Diospa templunchömi leyninkuna qellqaraykaq libruta tarishqä”.
Tsaynö willar makyaptinmi Safán liyirqan.
9 Liyiskirnami Safánqa rey kaqman aywaykur nirqan: “Nimanqaykinömi qellayta qoriskir encargädu runakunata kamaripäyashqa templuta allitsatsiyänanpä”.
10 Tsaypitanami nirqan: “Mandaq sacerdöti Hilcíasmi templucho tariykur kay libruta apamushqa”.
Tsaynö willarmi tsay libruta liyiparqan.
11 Tsaynö liyipaptinmi reyqa pasaypa mantsakar latsapantapis rachirqan. 12 Nirkurmi sacerdöti Hilcíasta, Safánpa tsurin Ahicamta, Micaíaspa tsurin Acborta, secretariun Safánta y yätsiqnin Asaíasta nirqan: 13 “Kay librucho qellqaranqan leykunata manami noqantsikpis ni unay castantsikkunapis cäsukushqatsu ni cumplishqatsu. Tsaynö mana cumplinqantsikpita capazchi Tayta Dios pasaypa ajanar castigamäshun. Tayta Diosta tapukayämuy noqapä, Israel nacioncho quëdaq runakunapä y kay nacionnintsikcho kaq runakunapäpis”.
14 Tsaynö kachaptinmi Hilcías, Ahicam, Acbor, Safán y Asaías aywayarqan Salumpa warmin profetïsa Huldaman tapukuq. Huldapa runan Salumqa Ticvapa tsurin y Harhaspa willkanmi karqan. Tsaynöpis Salumqa templucho latsapakunata cuidaqmi karqan. Huldaqa runanwan Jerusalén ñöpan mushuq barriuchömi tarqan. 15 Tapukuptinmi Hulda nirqan: “Israel runakunata kuyaq Tayta Diosmi nin: ‘Kachamushuqniki runaman kutiykur ninqäkunata willar niyay: 16 Liyipäshunqayki librucho castiganäpä ninqänöllami kay markacho taqkunata castigar kay markatapis ushakätsishä. 17 Paykunaqa mana cäsukamar juk dioskunapämi sacrificiukunata rupaykätsiyan. Tsaynö kayanqanpitami pasaypa ajanar mana kuyapaypa castigashä’.
18 “Tayta Diosta tapukunanpä kachamushuqniki reyman kutiykur willayanki: ‘Tsay librucho qellqaraykaqta cäsukunqaykipitami Israel runakunata kuyaq Tayta Dios nin: 19 Kay marka y kay markacho taqkuna ushakätsishqa kayänanpä kanqanta musyar llakikunqaykita y mantsarinqaykita rikashqämi. Tsaynöpis rikashqämi latsapaykita rachir waqanqaykita. 20 Tsaymi kawanqaykiyaqqa kaycho taq runakunata castigashätsu. Wanuskiptikinami unay castaykikuna pamparäyanqanman pampayäshunki’ ”.
Profetïsa Hulda tsaynö ninqantami kachanqan runakuna kutiykur reyta willayarqan.