3 Liyipaskirnami templupa paradornin ñöpanman ichiykur Tayta Diospa ñöpancho rey Josías pactuta rurar awnirqan librucho qellqaraykaq pactuta cumplir mandamientunkunata, yätsinqankunata y leyninkunata llapan shonqunwan imaypis cumplinanpä. Tsaynöllami tsaycho kaykaq llapan runakunapis awniyarqan pactuta cumpliyänanpä.

4 Tayta Diospa templunchömi Baal diosta, Asera diösata, rupayta, killata y qoyllurkunata adorayänanpä manëjukuna karqan. Tsay manëjukunata templupita jipiskir llapanta kayayänanpämi reyqa mandaq sacerdöti Hilcíasta, wakin sacerdötikunata y punku täpaqkunata mandarqan. Tsaymi Jerusalénpita Cedrón raqraman apaykur kayayarqan. Uchpantanami Bet-elman apatsirqan.

5 Tsaynöllami Josías manarä rey kaptin Judá nacioncho wakin reykuna sacerdötikunata churayarqan markakunacho kaykaq altarkunacho inciensiuwan qoshnitsiyänanpä. Tsay sacerdötikunami Judá markakunacho y Jerusalén ñöpankunachöpis qoshnitsiyaq Baalpä, rupaypä, killapä y qoyllurkunapä. Tsaynö rurayaptinmi sacerdöti kayanqanpita rey Josías qarqurqan.

6 Tsaynöllami rey Josíasqa Asera diösapä jawiyanqan raku qeruta Tayta Diospa templunpita jipiskatsir Cedrón raqraman apaykur uchpayanqanyaq rupatsirqan. Tsay uchpatanami panteonman qotuyarqan.^†

7 Tsay witsanmi wakin runakuna y warmikuna diosninkunata adorar altarkuna kanqancho jukwan jukwan kakuyaq. Tsay runakunapa y warmikunapa cuartunkuna Tayta Diospa templunchömi karqan. Tsay cuartukunachömi Asera diösapä latsapakunata warmikuna awayaq. Tsaymi llapan tsay cuartukunata rey Josías juchutsirqan.

8 Tsaypitanami rey Josíasqa Judá nación markakunapita llapan sacerdötikunata qayatsimurqan Jerusalénchöna täyänanpä. Jerusaléncho manarä tarmi tsay sacerdötikunaqa markakunacho kaykaq altarkunacho inciensiuwan qoshnitsiyaq. Tsaymi rey Josías Gebapita qallaykur hasta Beersebapa lindërunyaq llapan tsay altarkunata impüruyätsirqan.^† Tsaynöllami juchutsirqan Jerusalén markapa gobernadornin Josué ruratsinqan punkucho kaykaq altarkunatapis. Tsay altarkunaqa markaman yaykuna itsuq kaqlächömi kayarqan. 9 Markakunacho kaykaq altarkunacho qoshnitsiq sacerdötikunataqa rey Josías manami kachaparqantsu Tayta Diospa altarninman aywayänanta. Tsaynö kaptinpis sacerdötipura levadüraynaq tantata mikuyänanpämi itsanqa kachaparqan.

10 Ben-hinomcho^† kaykaq altartapis impüruyätsirqan Moloc diospä wamrankunata tsaycho pipis mana rupatsinanpämi.^†

11 Judá nacionpa unay mandaqnin reykuna rupaypä bendisayanqan cawallukunatapis llapantami wanutsirqan. Tsaynöllami rupaypä bendisayanqan carrëtakunatapis llapanta kayar usharqan. Tsaykunaqa karqan Tayta Diospa templunman yaykunan punku ñöpancho y reypa yanapaqnin Natán-melecpa wayin ñöpanchömi.

12 Tsaynöllami Acazpa sälan janancho rurayanqan altarkunatapis llapanta juchutsirqan. Tsay altarkunataqa Judá nacionpa unay mandaqnin reykunami ruratsiyarqan. Tsaynöllami templupa ishkan patiuncho^† Manasés ruratsinqan altarkunatapis llapanta juchutsirqan. Tsay llapan juchutsinqankunatami Cedrón raqraman jitatsirqan.

13 Jerusalén tsimpan Olivos jirkan sur kaqlächo kaykaq altarkunatapis impüruyätsirqanmi. Tsaykunatami rey Salomón unay ruratsirqan Sidón runakuna adorayanqan Astoret diösata adorayänanpä, moabita runakuna adorayanqan Quemos diosta adorayänanpä y amonita runakuna adorayanqan Milcom diosta adorayänanpä.^† 14 Tsaynöllami runakuna adorayanqan wankakunata pakirqan y Asera diösata adorayänanpä jawinqan qerukunatapis mututsirqan. Nirkurmi tsay sitiukunata impüruyätsinanpä runakunapa tullunkunatapis qotutsirqan.

15 Tsaypitanami Bet-elcho kaykaq altarta juchuskatsir uchpayanqanyaq rupatsirqan. Tsay altartami Nabatpa tsurin Jeroboam ruratsirqan qoripita rurashqa torïtuta Israel runakuna adorayänanpä.^† Tsaynöllami rey Josías rupatsirqan Asera diösata adorayänanpä jawiyanqan raku qerukunatapis.

16 Josíasqa Bet-elpita Jerusalénman kutirmi jirkancho rikarqan runakuna pamparäyanqan sepultürakunata. Tsayta rikaykurmi sepultürakunapita tullukunata jipiskatsir Bet-elcho kaykaq altar janancho rupatsirqan sacrificiuta pipis tsaycho manana rupatsinanpä. Tsaynöpami Tayta Diospa profëtan unay willakunqanta cumpliyarqan.^†

17 Tsaypitanami juk nïchuta rikaskir tsay markacho taq runakunata tapukur nirqan: “¿Pipa nïchuntä taqaycho kaykan?”

Tsaymi niyarqan: “Judápita shamuq profëtami tsaycho pamparaykan. Tsay profëtami unay willakurqan altar janancho tullukunata rupatsinaykipä kanqanta”.

18 Tsaynö niptinmi rey Josías nirqan: “Paypa tullunkunataqa pipis ama yatatsuntsu”.

Tsaymi tsay tullukunata pipis yatarqantsu. Tsaynöllami Samaria profëtapa^a tullunkunatapis yatarqantsu.

19 Bet-elcho kaykaq altarta juchutsinqannömi Samariacho kaykaq wakin markakunachöpis altarkunata wayintinta rey Josías juchutsirqan. Tsay altarkunata Israel nacionpa mandaqnin reykuna shäritsirmi Tayta Diosta pasaypa ajanätsishqa kayarqan. 20 Manarä juchutsirmi tsaycho sirviq sacerdötikunatapis altar janancho wanutsirqan. Tsaynöllami runakunapa tullunkunata tsay altarkuna janancho rupatsir impüruyätsirqan. Tsaypitanami Jerusalén markaman rey Josías kutirqan.

21 Tsaypitanami rey Josías llapan runakunata nirqan: “Pactu Librucho ninqannölla Tayta Diosnintsikta adorar llapantsik Pascua fiestata rurashun”.^†

22 Tsaymi Pascua fiestata rurayarqan. Juezkuna mandayanqan witsanpis ni Israel nacionta y Judá nacionta reykuna mandayanqan witsanpis rey Josías ruratsinqan Pascua fiestatanöqa manami rurayarqantsu. 23 Rey Josías chunka puwaq watana rey kaykarmi Tayta Diospä tsay Pascua fiestata Jerusaléncho rurarqan.

24 Brüjukunatapis y suerti qatiqkunatapis llapantami rey Josías qarqur usharqan. Tsaynöllami runakunapa wayinkunacho y maycho kaptinpis ïdulukunata ushakätsirqan. Tsaykunata Judá nacioncho y Jerusaléncho ushakätsirqan sacerdöti Hilcías tarinqan librucho qellqaraykaq leykuna ninqannöllami. 25 Unay reykunapis y qepa reykunapis manami rey Josíasnöqa llapan shonqunwan, llapan voluntäninwan, llapan kallpanwan Tayta Dios munanqannö kawayarqantsu. Moisés qellqanqan leykunacho ninqannöllami payqa llapantapis rurarqan.

26 Tsaynö kaptinpis rey Manasés mana mantsariypa jutsata ruranqanpitami Judá nación runakunawan Tayta Dios pasaypa ajanashqa karqan. 27 Tsaymi Tayta Dios nirqan: “Israel nación runakunata qarqunqänöllami Judá nación runakunatapis ñöpäpita qarqushä. Akranqä Jerusalénta y tänä templutapis mananami tsapäshänatsu”.

28 Rey Josías imata ruranqankunapis llapanmi qellqaraykan Judá nacionpa mandaqnin reykunapa acta libruncho.

29 Tsay witsanmi Egipto nacionpa mandaqnin rey Faraón Necao karqan. Paymi Éufrates mayu kaqläpa soldädunkunawan aywayta munarqan Asiria nacionpa mandaqnin reyta yanapayänanpä. Yanapayänanta mana munarmi michänanpä rey Josíasqa soldädunkunawan yarquyarqan. Meguiduman chaykur Egipto runakunawan pelyaykäyaptinmi Josíasta Faraón Necao wanutsirqan. 30 Rey Josíasta wanuskatsiptinmi ayanta soldädunkunapa capitanninkuna carrëtaman joqarkur Meguidupita Jerusalénman apayarqan. Tsayman chaykatsirmi ruratsinqan sepultüranman pampayarqan. Paypa trokin rey kananpämi tsurin Joacaztana churayarqan.

31 Joacazqa ishkay chunka kimsa (23) watayuq kaykarmi rey kayta qallaykurqan. Payqa kimsa killallami Jerusalénpita mandarqan. Mamannami karqan Libna markapita Jeremíaspa tsurin Hamutal. 32 Joacazpis unay castankunanömi Tayta Diosta mana cäsukur jutsata rurarqan.

33 Jerusaléncho rey mana kananpämi Joacazta Faraón Necao prësu tsariskir Ribla markaman aparqan. Riblaqa Hamat partichömi kaykan. Nirkurmi Judá runakunata nirqan kimsa waranqa kimsa pachak (3,300) kïlu yuraq qellayta y kimsa chunka kimsa (33) kïlu qorita qoriskir impuestuta pägayänanpä. 34 Tsaypitanami Faraón Necaoqa Josíaspa tsurin Eliaquimta Jerusaléncho taytanpa trokin rey kananpä churarqan. Nirkurmi Eliaquimpa jutinta trukatsirqan Joacim jutin kananpä. Joacaztanami Egiptuman prësu apaykur wanunqanyaq tsarararqan.^†

35 Rey Joacimnami Faraón mandanqannö multata pägananpä Judá nacioncho taq runakunata qellaytapis qoritapis cobrarqan. Cobrakuskirnami Faraón Necaoman apatsirqan.

36 Joacimqa^† ishkay chunka pitsqa (25) watayuq kaykarmi Judá nacioncho rey kayta qallaykurqan. Payqa chunka juk watami Jerusalénpita mandarqan. Mamanpa jutinmi karqan Zebuda. Payqa Rumapita Pedaíaspa wamranmi karqan. 37 Unay castankuna jutsata rurar kawayanqannöllami Joacimpis Tayta Diosta mana cäsukur jutsata rurarqan.