Rupayta, killata y qoyllurkunata adorayanqanpita Tayta Dios rabyakunqan
8
Tayta Diosmi nin: “Tsay witsanmi contraykikuna shamur wanuqkunapa tullunkuna pamparanqanpita jipiyanqa. Tsay tullukunami kanqa wanuq reykunapa, Judá nacionpa wakin mandaqninkunapa, sacerdötikunapa, profëtakunapa y Jerusaléncho unay runakunapa. 2 (Tsay runakunami manarä wanur rupayta, killata y qoyllurkunata qonqurikuykur adorayarqan. Imatapis musyayta munarmi rupayta, killata y qoyllurkunata tapukuyarqan.) Tsay wanuqkunapa tullunkunata qorinanpä ni pampananpä pipis mana kaptinmi uywakunapa iskannö mashtaräyanqa. Tsaymi tullunkuna jitaraykaqta rupaypis, killapis y qoyllurkunapis rikayanqa.†3 “Wanuypita qeshpiq kaqtaqa maytsaymanmi qarqushä. Juklä nacionman qarquptïmi pasaypa llakikur wanuyta munayanqa. Llapanta mandaq Tayta Dios karmi tsaynö nï.
Jutsa rurayta mana kachariyanqan
4 “Tsaynöpis Jerusalén runakunata ninki:
“ ‘Tayta Diosmi nin:
Pipis ishkirqa shärinmi.
Nänita pantarqa aywananpä kaq nänimanmi kutin.
5 Tsaynö kaykaptinqa ¿imanirtä Jerusalén runakuna näniman mana kutiqnö ninqäkunata cäsukayämantsu?
¿Imanirtä conträ rikakuyashqa?
Paykunaqa mana väliq ïdulukunaman yärakurmi noqaman kutimuytapis munayannatsu.
6 “ ‘Paykuna parlayanqantapis wiyaykämi.
Manami mayqallantapis wiyashqätsu rasunllata nikaqta.
Tsaynöpis manami mayqallantapis wiyashqätsu jutsa rurayanqanta wanakur perdonta mañakayämanqanta.
Tsaypa trokinqa guërraman cawallu mana mantsariypa yaykuqnömi llapanpis mana mantsapakuypa jutsata rurayan.
7 Cigüeñaqa usya tiempu y tamya tiempu maypa aywananpä kanqanta musyanmi.
Kullkushpis, grüllapis y wayanïtupis imay witsan jukläman witikunanpä kanqanta musyanmi.
Kuyanqä runakunami itsanqa leynïkunata musyaykarpis cäsukuyantsu.†
Sacerdötikuna y profëtakuna llutanta yachatsiyanqan
8 “ ‘¿Imanöpatä niyankiman leynïkunata tsararar musyaq yachaq kayanqaykita?
Leynïkunata yachatsiyäshuqnikikunapis llutantami yachatsiyäshunki.
9 Tsay yachatsikuqkunami castigaptï penqakuycho kayanqa.
Toqllaman yaykuq uywanömi mantsariyanqa.
Ninqäkunata mana cäsukurqa manami rasunpaypatsu yachaq kayan.
10 Paykunaqa llapanpis yarpaykäyan suwakuypa imatapis tariyänanpämi.
Tsaymi paykunata castigar warminkunatapis y chakrankunatapis jäpa runakunata qaraykushä.
“ ‘Qamkunacho kaq profëtakunapis sacerdötikunapis llutantami yachatsiyan.
11 Paykunaqa kuyanqä runakuna däñakushqanö kayaptinpis manami alli jampiqnötsu kaykäyan.
Castïgu kananpä kaykaptinpis “manami ima castïgupis kanqatsu” niyanmi.†
12 Melanaypä jutsata rurarpis manami penqakuyantsu.
Manami penqakuytapis yachayantsu.
Tsaynö kayanqanpita castigaptïmi wakin runakunawan iwal wanuyanqa.
Noqa Tayta Diosmi tsaynö nï.†
13 “ ‘Paykunataqa muchuqyätsishämi.
Üva chakrankunapis y hïgus chakrankunapis manami wayunqanatsu.
Llapan murukuyanqanpis tsakirmi ushakanqa.
Llapan kamaripanqätapis qechushämi.
Noqa Tayta Diosmi tsaynö nï’ ”.
Castïguwan wanuyänanpä kanqanta runakuna tantiyayanqan
14 “Tsaymi runakuna niyanqa:
‘Chikimaqnintsikkunawan ushakätsimänantsikpämi Tayta Diosnintsik destinamashqantsik.
Tayta Diosta ajanätsir jutsata ruranqantsikpita venenashqa yakuta uputsimaqnintsiknömi kanqa.
Tsaynö kaptinqa amparakunantsikpä alli sigurashqa markakunaman juklla aywakushun.
Kaycho wanunantsikpa trokinqa mejor tsaycho wanushun.
15 Alli kawanantsikpä kanqanta yarpashqapis manami yarpanqantsiknötsu kashqa.
Tayta Dios yanapamänantsikpä kanqanta yarpashqapis jinallami desgracia tsarimantsik.
16 Contrantsikkuna shamuptin cawallunkunapa jamayninpis Dan markapita patsami wiyakämun.
Cawallunkuna wishushüyaptinmi llapan jirkakuna tsuktsukyan.
Contrantsikkunami shamuykäyan nacionnintsikta ushakätsiyänanpä.
Markakunata juchutsirmi tsaycho taqkunatapis llapanta wanutsiyanqa’ ”.
17 Tayta Diosmi nin:
“Qamkunamanmi venënuyuq culebrakunatanö contraykikunata kachamushä.
Culebrata manshuyätsiyta mana kamäpakuptin kaninqannömi tsay contraykikunapis ushakätsiyäshunki.
Noqa Tayta Diosmi tsaynö nï”.
Jeremías pasaypa llakikunqan
18 Tayta Dios tsaynö niptinmi pasaypa llakikuyllawan shonqüpis tsapakayparä nanäman.
19 Marka mayïkunapis maytsaycho waqarmi nikäyan Siónta Tayta Dios kacharinqanta.
Tsaynöpis nikäyan Tayta Dios mandaqnin rey kaykarpis paykunawan manana kaykanqanta.
Tayta Diosnami nin:
“¿Imanirtä ajanätsiyämashqayki?
Jäpa runakuna adorayanqan mana väliq ïdulukunata ¿imanirtä adoraykäyanki?”
20 Runakunanami nikäyan:
“Trïgu cosëcha chämushqana kaptinpis
y üva, hïgus y olïvus cosëcha chämushqana kaptinpis
noqantsikqa jinallami muchuycho kaykantsik”.
21 Marka mayïkuna tsaynö llakikuyanqanta rikarmi noqapis pasaypa llakikü.
Pasaypa mantsariymi tsariman.
22 Cuerpun qeshyaptinqa jampipis y jampikuqpis Galaadcho kanmi.
Jutsata rurayanqanpämi itsanqa ima jampipis ni jampikuqpis kantsu.